ໃນຕອນບ່າຍຂອງວັນທີ 17 ກໍລະກົດນີ້, ຢູ່ສະພາແຫ່ງຊາດ ນະຄອນຫລວງວຽງຈັນ ທ່ານດຣ. ອຸ່ນແກ້ວວຸທິລາດຫົວໜ້າຫ້ອງວ່າການສະພາແຫ່ງຊາດ, ຫົວໜ້າອະນຸກຳມະການຮ່າງກົດໝາຍວ່າດ້ວຍສະພາປະຊາຊົນທ້ອງຖິ່ນ ໄດ້ນຳເອົາຮ່າງກົດໝາຍດັ່ງກ່າວສະເໜີຕໍ່ກອງປະຊຸມ ເພື່ອໃຫ້ສະມາຊິກສະພາແຫ່ງຊາດປະກອບຄຳເຫັນໃສ່ຮ່າງກົດໝາຍດັ່ງກ່າວ ເພື່ອຈະນຳເຂົ້າພິຈາລະນາ ແລະຮັບຮອງເອົາໃນທ້າຍປີນີ້ວ່າ: ລັດຖະທຳມະນູນສະບັບປີ 2003, ເຊິ່ງເປັນກົດໝາຍພື້ນຖານໃນລະບົບກົດໝາຍແຫ່ງລັດສປປລາວ ໄດ້ຮັບການປັບປຸງໃຫ້ສອດຄ່ອງກັບການຜັນຂະຫຍາຍ ແລະການຈັດຕັ້ງປະຕິບັດເນື້ອໃນ, ຈິດໃຈ, ມະຕິກອງປະຊຸມໃຫຍ່ຄັ້ງທີ IX ຂອງພັກ ແລະສ້າງເງື່ອນໄຂໃຫ້ແກ່ການຜັນຂະຫຍາຍ ແລະການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ເຊິ່ງມັນຈະເຮັດໃຫ້ກົງຈັກການປົກຄອງທ້ອງຖິ່ນມີຄວາມເຂັ້ມແຂງຂຶ້ນ, ຊຸກຍູ້ການພັດທະນາຂັ້ນທ້ອງຖິ່ນ, ຮາກຖານໃຫ້ຂະຫຍາຍຕົວຖືກຕ້ອງຕາມເງື່ອນໄຂ ແລະທ່າແຮງຕົວຈິງ, ເພີ່ມທະວີການຄຸ້ມຄອງລັດຕໍ່ການພັດທະນາເສດຖະກິດ-ສັງຄົມຕາມກົນໄກຕະຫລາດ ແລະການເຊື່ອມໂຍງສາກົນຕິດພັນກັບການແກ້ໄຂປະກົດການຫຍໍ້ທໍ້ເຊັ່ນ: ການສໍ້ລາດບັງຫລວງ, ການສວຍໃຊ້ໜ້າທີ່ການງານໄປໃນທາງທີ່ບໍ່ຖືກຕ້ອງ, ຢາເສບຕິດ ແລະການລະເມີດກົດໝາຍ ແລະລະບຽບການອື່ນໆ ທີ່ນຳເອົາຄວາມເສຍຫາຍມາໃຫ້ອຳນາດການປົກຄອງ ແລະ ປະຊາຊົນບັນດາເຜົ່າຢູ່ທ້ອງຖິ່ນ.
ສຳລັບກົດໝາຍດັ່ງກ່າວປະກອບມີ 57 ມາດຕາ, XII ໝວດ ແລະ ພາຍຫລັງກົດໝາຍດັ່ງກ່າວ ໄດ້ຖືກຮັບຮອງ ແລະ ປະກາດໃຊ້ຈະເຮັດໃຫ້ປະຊາຊົນຢູ່ທ້ອງຖິ່ນມີຊີວິດດີຂຶ້ນຂະບວນການຜະລິດເປັນສິນຄ້າ, ການລົບລ້າງຄວາມທຸກຍາກ ແລະຂະບວນການເຮັດທົດລອງ 3 ສ້າງຈະຂະຫຍາຍຕົວໄວຂຶ້ນ ແລະ ໄດ້ຮັບປະໂຫຍດ ຫລາຍກວ່າເກົ່າ ຍ້ອນການປົກຄອງທ້ອງຖິ່ນກໍຕິດແທດກັບປະຊາຊົນຫລາຍຂຶ້ນ, ເຮັດໃຫ້ປະຊາຊົນມີສ່ວນຮ່ວມໃນການຕິດຕາມກວດກາການບໍລິຫານຂອງອົງການລັດທ້ອງຖິ່ນຫລາຍຂຶ້ນນຳອີກ.
ຂອບໃຈຂ່າວຈາກ:
