ທ່ານ ສີລາ ວຽງແກ້ວ ລັດຖະ ມົນຕີຊ່ວຍວ່າການກະຊວງການ ເງິນໄດ້ອອກມາຊີ້ ແຈງກ່ຽວກັບຄຳສະເໜີ ແລະ ຊັກຖາມຂອງປະຊາ ຊົນຜ່ານສາຍດ່ວນ 165 ໃນວາລະ ດຳເນີນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດ ທີ VII, ເຊິ່ງມີປະຊາຊົນສະເໜີ ກ່ຽວກັບພະນັກງານຮັ່ງມີລ້ຳລວຍຜິດປົກກະຕິ, ໂດຍສະເພາະພະນັກ ງານພາສີມີການໃຊ້ຈ່າຍຫລີ້ນກິນ ຟູມເຟືອຍຈະມີວິທີການ ແລະ ມາດ ຕະການຄຸ້ມຄອງ, ແກ້ໄຂແນວໃດ ພ້ອມຮັບປະກັນບໍ່ໃຫ້ເງິນຂອງລັດ ຮົ່ວໄຫລ.
ຕໍ່ບັນຫາດັ່ງກ່າວ ທ່ານລັດຖະ ມົນຕີຊ່ວຍຕອບວ່າ: ໃນໄລຍະຜ່ານ ມາກະຊວງການເງິນໄດ້ເອົາໃຈໃສ່ກວດກາ ແລະ ຕ້ານບັນດາປະກົດ ການຫຍໍ້ທໍ້ໃນຖັນພະນັກງານຂະ ແໜງການເງິນຕະຫລອດມາ, ໂດຍສະເພາະຂົງເຂດພາສີ ແລະ ອາກອນ, ຊຶ່ງໄດ້ມີການລົງກວດ ກາຕິດຕາມໃນ 2 ລັກສະນະຄື: ກວດກາຕິດຕາມແບບປົກກະຕິ ເຊັ່ນ: ການດຳເນີນວຽກງານແຈ້ງ ຊັບສິນຂອງພະນັກງານ, ການ ເປີດບັ້ນດຳເນີນຊີວິດການເມືອງ, ກວດກາການປະຕິບັດວຽກງານຂອງບັນດາດ່ານພາສີຊາຍແດນ ເພື່ອໃຫ້ການເກັບລາຍຮັບໄດ້ຕາມ ແຜນການ, ຊຶ່ງຕິດພັນກັບຄວາມ ຮັບຜິດຊອບຂອງແຕ່ລະບຸກຄົນ ແລະ ການຈັດຕັ້ງກ່ຽວຂ້ອງ ແລະ ກວດກາຕາມປະກົດການ ແລະ ຫາງສຽງຂອງແຕ່ລະບຸກຄົນເຊັ່ນ: ໄດ້ມີການສົມທົບກັບຂະແໜງການກ່ຽວຂ້ອງ ແລະ ອົງການປົກຄອງ ທ້ອງຖິ່ນ, ຊຶ່ງຜ່ານມາກໍສາມາດ ປະຕິບັດວິໄນພະນັກງານຜູ້ທີ່ກະທຳຜິດໄດ້ຫລາຍຄະດີ.
ມາຮອດປັດຈຸບັນນີ້ ລັດຖະ ບານກໍໄດ້ມີລະບຽບລັດຖະກອນ ເພື່ອເປັນບ່ອນອີງໃຫ້ແກ່ອົງການ ຈັດຕັ້ງລັດໃນການຄຸ້ມຄອງ ແລະ ຕິດຕາມກວດກາພະນັກງານລັດ, ຊຶ່ງລວມມີການກວດສອບ ແລະ ການປະຕິບັດຕໍ່ລັດຖະ ກອນຜູ້ກະ ທຳຜິດ. ນອກຈາກນີ້ ໃນຂົງເຂດ ພະນັກງານການເງິນຍັງໄດ້ກຳນົດວິໄນ 9 ຂໍ້, ຊຶ່ງເປັນວິໃນ ແລະ ຂໍ້ ຫ້າມສຳລັບພະນັກງານ. ສະນັ້ນ ເພື່ອເຮັດໃຫ້ວຽກງານພາສີ ແລະ ອາກອນມີຄວາມເຂັ້ມແຂງ ແລະ ໂປ່ງໃສຈຶ່ງຮຽກຮ້ອງມາຍັງທຸກ ພາກສ່ວນໃນສັງຄົມຈົ່ງໄດ້ຊ່ວຍກັນຕິດຕາມກວກກາ ແລະ ປະກອບ ສ່ວນຢ່າງຈິງຈັງແຈ້ງຂໍ້ມູນ ຫລື ປະກົດການທີ່ເຫັນວ່າເປັນການກະທຳຜິດທາງກົດໝາຍພາສີ, ທັງເຈົ້າ ໜ້າທີ່ພາສີ ແລະ ຜູ້ປະກອບການ ທີ່ມີການສົມຮູ້ຮ່ວມຄິດໃນການກະທຳຜິດເພື່ອຈະໄດ້ພ້ອມກັນກວດກາ ແລະ ແກ້ໄຂປະກົດການຫຍໍ້ທໍ້ໃນ ຂົງເຂດວຽກງານດັ່ງກ່າວມີປະສິດທິຜົນສູງ.
ແຫລ່ງຂ່າວ: ລາວພັດທະນາ