ໃນວັນທີ 11 ກໍລະກົດ 2015 ຜ່ານມານີ້, ຢູ່ທີ່ໂຮງຮຽນມັດທະຍົມບ້ານນາຄົກ ເມືອງງາ ແຂວງອຸດົມໄຊ, ໄດ້ມີພິທີເຊັນສັນຍາການປຸກສ້າງອາຄານຮຽນຫຼັງໃໝ່ຂອງໂຮງຮຽນມັດທະຍົມບ້ານນາຄົກຂື້ນ, ຕາງໜ້າຝ່າຍເຈົ້າຂອງໂຄງການເຊັນໂດຍແມ່ນ ທ່ານ ໄມ່ຕາ ພົມມະໃຈ ປະທານບ້ານນາຄົກ ແລະ ຝ່າຍຜູ່ຮັບເໝົາເຊັນໂດຍແມ່ນ ທ່ານ ຈານຄໍາ ຈັນທະພານິດ ອໍານວຍການບໍລິສັດວັງຄໍາກໍ່ສ້າງ.
ເຂົ້າຮ່ວມມີ ທ່ານ ຈິນດາວົງ ສົມສາມາດ ຮອງຫົວໜ້າພະແນກສຶກສາທິການ ແລະ ກິລາ, ທ່ານ ບຸນເພັງ ແລງສຸທິພົງ ຮອງຫົວໜ້າຫ້ອງການບໍລິຫານ ຜູ່ຮັບຜິດຊອບວຽກງານກໍ່ສ້າງ ພະແນກສຶກສາທິການ ແລະ ກິລາ, ພ້ອມດ້ວຍ ຄະນະພັດທະນາການສຶກສາຂັ້ນເມືອງ, ຂັ້ນບ້ານ ແລະ ຄູອາຈານ ເຂົ້າຮ່ວມນໍາ.
ອາຄານຮຽນຫຼັງໃໝ່ທີ່ຈະໄດ້ຮັບການປຸກສ້າງໃນຄັ້ງນີ້, ເປັນອາຄານຮຽນແບບເຄິ່ງຖາວອນ 1 ຫຼັ້ງ, ມີ 4 ຫ້ອງຮຽນ, ຂະໜາດ 32,4 x 8 ແມັດ, ໃນມູນຄ່າ 290 ລ້ານກີບ. ພາຍຫຼັງເຊັນສັນຍາກັນແລ້ວ ແມ່ນຈະໄດ້ເລີ່ມລົງມືດໍາເນີນການກໍ່ສ້າງ ຊ້າສຸດແມ່ນໃນກາງເດືອນ ກໍລະກົດ ນີ້, ໂດຍກໍານົດໄລຍະເວລາການກໍ່ສ້າງ 3 ເດືອນ ຄາດວ່າ ຮອດທ້າຍເດືອນ ກັນຍາ 2015 ແມ່ນໃຫ້ສໍາເລັດ 100%, ໂດຍໄດ້ຮັບທຶນຊ່ວຍເຫຼືອລ້າຈາກອົງການວັນໃໝ່ ປະເທດຝຣັ່ງ ເປັນຜູ່ໃຫ້ທຶນ ເພື່ອຊ່ວຍພັດທະນາພື້ນຖານໂຄງລ່າງການສຶກສາແຂວງອຸດົມໄຊ.
