ຂປລ. ບັນດານັກລົງທຶນ ແລະ ນັກວິເຄາະຍີ່ປຸ່ນ ສະ ເໜີໃຫ້ລັດຖະບານລາວ ເພີ່ມຄວາມພະຍາຍາມຫລາຍຂຶ້ນ ເພື່ອສ້າງສະພາບແວດລ້ອມ ທີ່ເອື້ອອຳນວຍໃຫ້ແກ່ ການລົງທຶນທີ່ດີຂຶ້ນ ໃນນີ້ລວມທັງການລົງທຶນເຂົ້າໃນ ການສ້າງພື້ນຖານໂຄງລ່າງໃຫ້ຫລາຍຂຶ້ນ ແລະ ການພັດທະນາ ຊັບພະຍາກອນມະນຸດ ທີ່ມີຄຸນນະພາບໃນຕໍ່ໜ້າ.
ໃນຊຸມປີຜ່ານມາ ຈຳນວນບໍລິສັດຍີ່ປຸ່ນ ທີ່ລົງທຶນໃນ ສປປ ລາວ ໄດ້ເພີ່ມຂຶ້ນຢ່າງແຂງແຮງ ຈາກ 60 ບໍລິສັດ ໃນປີ 2011 ມາເປັນ 111 ບໍລິສັດ ໃນປີ 2014. ທັງນີ້ກໍເນື່ອງຈາກ ປະກົດການທີ່ເອີ້ນກັນວ່າ “Thai + 1” ຫລື “ໄທ+1” ເຊິ່ງໝາຍຄວາມວ່າ ນອກຈາກປະເທດໄທ ແລ້ວ ນັກລົງທຶນຍີ່ປຸ່ນ ຈະຕ້ອງເລືອກເອົາອີກປະເທດໜຶ່ງ ໃນຂົງເຂດແມ່ນ້ຳຂອງ ເປັນຖານການຜະລິດສຳຮອງ ເພື່ອກະຈາຍຄວາມສ່ຽງ ທາງດ້ານການລົງທຶນຂອງຕົນ ໃນຂົງເຂດດັ່ງກ່າວອັນໃນນັ້ນ ລວມມີ: ສປປ ລາວ, ກຳປູເຈຍ, ມຽນມາ ແລະ ຫວຽດນາມ.
ສາ ເຫດທີ່ກໍ່ໃຫ້ເກີດມີປະກົດການ “ໄທ+1” ສ່ວນໜຶ່ງກໍເນື່ອງຈາກ ເຫດການໄພນ້ຳຖ້ວມຄັ້ງໃຫຍ່ ຢູ່ປະເທດໄທ ໃນປີ 2011 ແລະ ຄ່າແຮງງານທີ່ຍັງສືບຕໍ່ເພີ່ມຂຶ້ນ ຢູ່ໃນປະເທດໄທ ເຊິ່ງເປັນສະພາບການທີ່ຄ້າຍຄືກັນກັບຢູ່ ສປ ຈີນ ໃນຫລາຍສິບປີກ່ອນ ຄ່າແຮງງານຢູ່ ສປ ຈີນ ແມ່ນຕ່ຳ ແຕ່ໃນປະຈຸບັນ ກໍມີການເພີ່ມຂຶ້ນຫລາຍ.
ທ່ານ ຮິເດະກາຊຶ ໂອຊິຕະ ເລຂາທິການໃຫຍ່ ຄະນະກຳມາທິການຮ່ວມມື ທຸລະກິດຍີ່ປຸ່ນ-ແມ່ນ້ຳຂອງ ຂອງສະພາການຄ້າ ແລະ ອຸດສາຫະກຳ ປະເທດຍີ່ປຸ່ນ ໄດ້ເວົ້າໃຫ້ຮູ້ວ່າ ມີຂໍ້ແນະນຳຫລາຍຢ່າງສຳລັບ ສປປ.ລາວ ຊິ່ງຂໍ້ແນະນຳເຫລົ່ານີ້ ບໍ່ພຽງແຕ່ເປັນຜົນດີສຳລັບການດຶງດູດ ເອົາບັນດາບໍລິສັດຍີ່ປຸ່ນ ເທົ່ານັ້ນ ແຕ່ຍັງເປັນຜົນດີສຳລັບ ການຂະຫຍາຍຕົວທາງດ້ານເສດຖະກິດ ໃນອະນາຄົດຂອງ ສປປ ລາວ ອີກດ້ວຍ.
ທ່ານ ໂອຊິຕະ ໃຫ້ຮູ້ຕື່ມອີກວ່າ ເພື່ອສ້າງບັນຍາກາດທີ່ເອື້ອອຳນວຍ ຕໍ່ການລົງທຶນຂອງຍີ່ປຸ່ນ ໃນສປປ ລາວ ນັ້ນພື້ນຖານໂຄງລ່າງ ເປັນຕົ້ນແມ່ນເສັ້ນທາງໃນ ສປປ.ລາວ ຕ້ອງມີຄຸນນະພາບສູງ ແລະ ການສ້າງທາງລົດ ແລະ ທາງລົດໄຟ ເຊື່ອມຕໍ່ລະຫວ່າງ ບັນດາເຂດອຸດສາຫະກຳຂອງໄທ ໃຫ້ເຂົ້າໃກ້ກັບຕົວເມືອງໃຫຍ່ໆຂອງ ສປປ ລາວ ກໍຈະເປັນການປະກອບສ່ວນອີກອັນໜຶ່ງ ໃຫ້ແກ່ການຂະຫຍາຍຕົວ ຂອງເສດຖະກິດຂອງ ສປປ ລາວ.
ທ່ານ ໂອຊິຕະ ຍັງຍົກໃຫ້ເຫັນເຖິງຄວາມຈຳເປັນທີ່ ສປປ ລາວ ຈະຕ້ອງມີລະບົບສະໜອງພະລັງງານ ທີ່ສະໝ່ຳສະເໝີ ແລະ ໝັ້ນທ່ຽງ ລວມເຖິງວິທີການຜະລິດພະລັງງານ ທີ່ເປັນມິດຕໍ່ສິ່ງແວດລ້ອມ ແລະ ມີປະສິດທິພາບອີກດ້ວຍ. ຢ່າງ ໃດກໍຕາມທ່ານ ຍັງໃຫ້ຮູ້ອີກວ່າ ບັນຫາການລົງທຶນເຂົ້າໃນ ລະບົບພື້ນຖານໂຄງລ່າງ ແລະ ການພັດທະນາຊັບພະຍາກອນມະນຸດ ໃນບັນດາປະເທດຂົງເຂດແມ່ນ້ຳຂອງ ແມ່ນມັກຈະຖືກຍົກຂຶ້ນມາປຶກສາຫາລືເປັນປະຈຳ ໃນເວທີປະຊຸມລະຫວ່າງ ສະພາການຄ້າ ແລະ ອຸດສາຫະກຳຂອງຍີ່ປຸ່ນ ແລະ ບັນດາບໍລິສັດເອກະຊົນ ຍີ່ປຸ່ນ.
ທ່ານ ຮິກຸຈິ ຮາຈິເມະ, ຮອງຫົວໜ້າພະແນກ ອາຊີຕາເວັນອອກສ່ຽງໃຕ້ ແລະ ປາຊີຟິກ ຂອງອົງການຮ່ວມມືສາກົນ ປະເທດຍີ່ປຸ່ນ (JICA) ຜູ້ຮັບຜິດຊອບວຽກງານກ່ຽວກັບ ສປປ ລາວ ໄດ້ກ່າວວ່າ: “ປະຈຸ ບັນຄົນລາວ ມີຄວາມອຸທິດຕົນສູງ ແລະ ມີທັກສະການຜະລິດຫັດຖະກຳທີ່ດີຫລາຍ ແຕ່ວ່າຖ້າ ສປປ ລາວ ຕ້ອງການໃຫ້ມີການລົງທຶນເຂົ້າມາໃນປະເທດຫລາຍຂຶ້ນ ຂ້າພະ ເຈົ້າຄິດວ່າ ສິ່ງສຳຄັນແມ່ນເລື່ອງການສຶກສາ ແລະ ການສຶກສາໃນຂັ້ນມັດທະຍົມ ທີ່ມີຄຸນນະພາບນັ້ນແມ່ນ ເປັນສິ່ງສຳຄັນສຳລັບການສ້າງກຳລັງແຮງງານ ທີ່ມີຄຸນນະພາບ.”
ໃນປະຈຸບັນເຫັນວ່າມີພຽງແຕ່ 60% ຂອງ ຈຳນວນເດັກນ້ອຍ ທັງໝົດໃນທົ່ວປະເທດ ໄດ້ຮັບການສຶກສາໃນລະດັບມັດທະຍົມ ດັ່ງນັ້ນຕົວເລກດັ່ງກ່າວ ຄວນສູງກວ່ານີ້ ຈຶ່ງຈະເປັນການສົ່ງເສີມການຂະຫຍາຍຕົວ ທາງດ້ານເສດຖະກິດ ແລະ ດຶງດູດການລົງທຶນຂອງຕ່າງປະເທດ.