ເຖິງແມ່ນວ່າລົດເກຍອັດຕະໂນມັດຈະມີຄຸນນະສົມບັດຕ່າງໆທີ່ດີຂຶ້ນ ແຕ່ໃນແງ່ໜຶ່ງທີ່ຫຼາຍຄົນບໍ່ສາມາດປະຕິເສດໄດ້ຄື ມັນມີຄວາມທົນທານໜ້ອຍກວ່າລະບົບເກຍທຳມະດາ, ເຊິ່ງສ່ວນໜຶ່ງກໍມາຈາກອາຍຸການໃຊ້ງານ ແຕ່ໃນອີກດ້ານແມ່ນການທີ່ບໍ່ເຂົ້າໃຈ ແລະ ຂັບຂີ່ບໍ່ຖືກຕ້ອງ ກໍເປັນຕົ້ນຕໍສຳຄັນທີ່ເຮັດໃຫ້ລະບົບເກຍເປ່ເພກ່ອນເວລາທີ່ກຳນົດ ແລະ ມັນກໍໝາຍເຖິງທ່ານອາດຈະໄດ້ເສຍຄ່າສ້ອມແປງຫຼາຍພໍສົມຄວນ ແຕ່ເລື່ອງທັງໝົດສາມາດຫຼີກລ່ຽງໄດ້ ຖ້າຫາກທ່ານຮູ້ຈັກວິທີການເຮັດໃຫ້ມັນຍືດອາຍຸການໃຊ້ງານໃຫ້ໃຊ້ໄດ້ດົນ.
1. ໃຫ້ຈື່ໄວ້ສະເໝີໃຫ້ເບກກ່ອນປ່ຽນເກຍ: ຫຼາຍໆຄົນມັກບໍ່ຮູ້ວ່າລົດເກຍອັດຕະໂນມັດຄວນຈະຢຽບເບກກ່ອນທີ່ເຮົາຈະປ່ຽນເກຍ ໂດຍສະເພາະຈາກຕຳແໜ່ງທີ່ລົດຢຸດຢູ່ໄປສູ່ຕຳແໜ່ງເຄື່ອນທີ່ ເຊິ່ງການຢຽບເບກນັ້ນຈະຊ່ວຍໃຫ້ ລະບົບສົ່ງກຳລັງບໍ່ເກີດການດຶງກັບ ແລະ ການທີ່ບໍ່ດຶງກັບກໍໝາຍເຖິງການທີ່ລະບົບເກຍເຮັດວຽກຢ່າງລື່ນໄຫຼ ເຊິ່ງເປັນສິ່ງດຽວທີ່ກ່ຽວໂຍງກັນໂດຍກົງຕໍ່ການຫຼຸ້ຍຫ້ຽນຂອງລະບົບເກຍ ໂດຍສະເພາະຢ່າງຍິ່ງໃນລະບົບເກຍໃໝ່ໆຄື CVT ເຊິ່ງມີຄວາມອ່ອນບາງທາງດ້ານກົນໄກພໍສົມຄວນ.
2. ຂັບແບບສະມູດລົດດຶງກັບ: ທຸກມື້ນີ້ຄົນຈຳນວນຫຼາຍເຂົ້າໃຈຜິດກ່ຽວກັບລະບົບເກຍອັດຕະໂນມັດຫຼາຍພໍສົມຄວນ ໂດຍສະເພາະການໃຊ້ວິທີຄິກດາວເກືອບທຸກເທື່ອທີ່ຕ້ອງການເລັ່ງແຊງ ຫຼື ເມື່ອຕ້ອງການກຳລັງ ການຄິກດາວອາດຈະເປັນໂປຼແກຼມໜຶ່ງທີ່ເຮັດໜ້າທີ່ໃນການຫຼຸດຕຳແໜ່ງເພື່ອໃຫ້ໄດ້ອັດຕາເລັ່ງທີ່ຕອບສະໜອງໄດ້ໄວຂຶ້ນ, ເຊິ່ງອາດຈະບໍ່ໄດ້ໝາຍເຖິງການຫຼຸ້ຍຫ້ຽນໂດຍກົງ ແຕ່ເມື່ອທ່ານໃຊ້ມັນເປັນປະຈຳ ແລະ ເຮັດໃຫ້ເກຍມີຮອບເຄື່ອນທີ່ສູງຢູ່ຕະຫຼອດເວລາກໍຈະມີຄວາມຮ້ອນສະສົມໃນນ້ຳມັນເກຍ ເຊິ່ງເຮັດໃຫ້ນ້ຳມັນເສື່ອມສະພາບໄວ ແລະ ມັນກໍໝາຍເຖິງເກຍລົດຂອງທ່ານຈະເສື່ອມສະພາບນັ້ນເອງ.
3. ເບິ່ງຕຳແໜ່ງອື່ນໆ: ທຸກມື້ນີ້ລະບົບເກຍອໍໂຕບໍ່ໄດ້ມີພຽງແຕ່ P R N D ເທົ່ານັ້ນ. ແຕ່ບາງເທື່ອຍັງມີຕົວເລືອກຕ່າງມາໃຫ້ ເຊິ່ງຕົວເລືອກຕ່າງໆທີ່ອອກມາສະໜອງຄວາມຕ້ອງການນີ້ ສ່ວນໜຶ່ງກໍເພື່ອຍືດອາຍຸການໃຊ້ງານອີກດ້ວຍ ລອງຮຽນໃຊ້ພວກມັນລອງເຍິ່ງເຊັ່ນວ່າ S ອາດຈະເປັນໂໝດສະປອດ ແຕ່ສາມາດປະຍຸກເພື່ອໃຊ້ຂັບໃນທາງທີ່ມີຄວາມຊັນ ໂດຍທີ່ຮອບເຄື່ອງຈັກບໍ່ສູງເກີນໄປຫຼາຍ.
4. ຢຽບເບກຄ້າງ D ມີຂໍ້ເສຍຫຼາຍກວ່າຂໍ້ດີ: ທຸກມື້ນີ້ຜູ້ທີ່ຂັບລົດເກຍອັດຕະໂນມັດ ສ່ວນໃຫຍ່ເບິ່ງວ່າການຂັບຂີ່ເກຍອັດຕະໂນມັດແບບ ຂັບໆເບກໆງ່າຍໆ ສະບາຍແບບນີ້ ເຮັດໃຫ້ຫຼາຍຄົນຕິດກັບການໃຊ້ເບກ ເຖິງແມ່ນວ່າລົດຈະຕິດຕໍ່ເນື່ອງເປັນເວລາດົນນານ ກໍຈະຄົງຕຳແໜ່ງໄວ້ທີ່ເກຍ D ແລ້ວຢຽບເບກເອົາໄວ້ເພື່ອພ້ອມໃຊ້ງານເມື່ອລົດເຄື່ອນທີ່. ຄວາມຈິງແລ້ວໃນການເຮັດໃນລັກສະນະດັ່ງກ່າວບໍ່ຜິດ ແຕ່ຈະມີຜົນເສຍໃນໄລຍະຍາວຫຼາຍກວ່າ ຕໍ່ຊິ້ນສ່ວນ ໂດຍສະເພາະແມ່ນຊຸດ Torque Converter ເຊິ່ງເຮັດໜ້າທີ່ຮັບກຳລັງຈາກເຄື່ອງຈັກໂດຍກົງ ໂດຍດ້ານໜຶ່ງຕິດກັບເຄື່ອງຍົນ ອີກດ້ານໜຶ່ງຕິດກັບຊຸດເກຍ ເຊິ່ງການທີ່ເຮົາເບກຄືການທີ່ເຮົາຢຸດລົດບໍ່ໃຫ້ເຄື່ອນທີ່ໄປທາງໜ້າ ແຕ່ໃນຊຸດເກຍນັ້ນຍັງຄົງເຮັດວຽກຢູ່ ແລະ ຈະມີແຮງສະສົມຫຼາຍ ດ້ວຍແຮງດັນນ້ຳມັນທີ່ໝຸນວົນຕະຫຼອດເວລາ ເຊິ່ງໝາຍເຖິງຄວາມຮ້ອນທີ່ເພີ່ມຂຶ້ນອີກດ້ວຍ. ດັ່ງນັ້ນ ທາງທີ່ດີຄວນຈະປົດກັບມາສູ່ເກຍ N ເພື່ອຫຼຸດພາວະນັ້ນ ໂດຍສະເພາະເມື່ອລົດຕິດດົນກວ່າ 2 ນາທີຂຶ້ນໄປ.
5. ຖອຍກັບຫຼັງແລ້ວເດີນໜ້າ ຢ່າເຮັດເດັດຂາດ: ທຸກມື້ນີ້ອາລົມສະປອດມັກຈະເຂົ້າສິງຫຼາຍໆຄົນ ໂດຍສະເພາະແມ່ນການຂັບຂີ່ຖອຍຫຼັງ ທີ່ບາງເທື່ອການຟ້າວຝັ່ງເຮັດໃຫ້ເຮົາລືມຢຸດໄປເລີຍແລ້ວປົດເກຍເພື່ອເດີນໜ້າ ແຕ່ໃຊ້ວິທີລັດໂດຍຖອຍຫຼັງແລ້ວເດີນໜ້າທັນທີ ການເຮັດແບບນັ້ນບໍ່ເຄີຍມີຜົນດີຕໍ່ລະບົບເກຍເລີຍ ເພາະແຮງທີໝຸນສວນທາງກັນຢ່າງຮຸນແຮງ ຈະເປັນອັນຕະລາຍຮ້າຍແຮງຕໍ່ຊຸດເຟືອງ, ສາຍພານ ແລະ ລູກປືນຕ່າງໆ. ແລ້ວຍັງເຮັດໃຫ້ມີອາຍຸສັ້ນລົງ ດັ່ງນັ້ນ ສິ່ງທີ່ສຳຄັນຄືການທີ່ຈະເຮັດຫຍັງກໍຕາມແຕ່ຢ່າລັດຂັ້ນຕອນມັນ ເພາະມັນອາດຈະສ້າງຄວາມເສຍຫາຍໄດ້ຫຼາຍກວ່າທີ່ທ່ານຄິດເສຍອີກ.
≠ ລະບົບເກຍອັດຕະໂນມັດ ເຖິງແມ່ນວ່າຈະມີການຂັບຂີ່ທີ່ດີ ແລະ ງ່າຍ ແຕ່ຢ່າງລືມວ່າການໃຊ້ງານລົດປະເພດນີ້ຢ່າງຖືກຕ້ອງນັ້ນ ກໍເປັນເລື່ອງທີ່ສຳຄັນບໍ່ໜ້ອຍເລີຍ ໃນການທີ່ຈະຍືດອາຍຸການໃຊ້ງານຂອງລົດ ລວມເຖິງການດູແລຮັກສາທີ່ຕ້ອງໝັ່ນຈັດການເມື່ອເຖິງເວລາ ເຊິ່ງຈະຊ່ວຍໃຫ້ເກຍນັ້ນຢູ່ໄປກັບທ່ານອີກດົນເລີຍລະ!