ພີ່ນ້ອງຮ່ວມຊາດ ທີ່ຮັກແພງທັງຫລາຍ;
ມື້ນີ້ ພວກເຮົາ ໄດ້ພ້ອມກັບບັນດາປະເທດໃນທົ່ວໂລກ ສະເຫລີມສະຫລອງ ວັນສາກົນຕ້ານຢາເສບຕິດ ຄົບຮອບ28 ປີ ເຊິ່ງບັນຫາດັ່ງກ່າວນີ້ ສປປ ລາວ ກໍໄດ້ຈັດຕັ້ງ ສະເຫລີມສະຫລອງ ໃນແຕ່ລະປີ ຕະຫລອດໄລຍະຫລາຍປີ ຜ່ານມາ.
ບັນດາທ່ານ ທີ່ຮັກແພງ;
ເປັນທີ່ຊາບນໍາກັນແລ້ວວ່າ ບັນຫາຢາເສບຕິດ ແມ່ນບັນຫາທີ່ເປັນໄພອັນຕະລາຍ ຢ່າງຮ້າຍແຮງຕໍ່ມວນມະນຸດ, ເປັນອຸປະສັກກົດໜ່ວງຖ່ວງດຶງ ການສ້າງສາພັດທະນາ ຂອງແຕ່ລະປະເທດ, ເປັນບໍ່ເກີດຂອງການກໍ່ອາຊະຍາກຳ, ການສໍ້ລາດບັງຫລວງ ແລະ ຍັງໄດ້ນຳເອົາຄວາມເຊື່ອມເສຍ ມາສູ່ຊີວິດ, ຊັບສິນ ແລະ ຄອບຄົວ ຂອງຜູ້ທີ່ພົວພັນ ກັບຢາເສບຕິດ. ຍ້ອນແນວນັ້ນ, ພັກ ແລະ ລັດຖະບານ ຈຶ່ງໄດ້ຖືເອົາການສະກັດກັ້ນ ແລະ ແກ້ໄຂບັນຫາຢາເສບຕິດ ເປັນໜ້າທີ່ສຳຄັນ ແລະ ຈໍາເປັນ ໂດຍຊີ້ນຳ-ນຳພາ ທຸກພາກສ່ວນໃນສັງຄົມ ເອົາໃຈໃສ່ສະກັດກັ້ນ ແລະ ແກ້ໄຂບັນຫານີ້ຢ່າງຈິງຈັງ ຕະຫລອດມາ. ກ່ຽວກັບມາດຕະການ ແກ້ໄຂບັນຫາດັ່ງກ່າວ ພວກເຮົາໄດ້ເອົາໃຈໃສ່ສຶກສາ ອົບຮົມປະຊາຊົນ ໂດຍສະເພາະ ແມ່ນຊາວໜຸ່ມ-ເຍົາວະຊົນ ໃຫ້ຮັບຮູ້ ແລະ ເຂົ້າໃຈ ກ່ຽວກັບພິດໄພ ແລະ ຜົນຮ້າຍຂອງຢາເສບຕິດ ດ້ວຍການໂຄສະນາເຜີຍແຜ່ແນວທາງນະໂຍບາຍ, ລະບຽບກົດໝາຍ ແລະ ມະຕິ-ຄຳສັ່ງຕ່າງໆ ກ່ຽວກັບບັນຫາຢາເສບຕິດ ຢ່າງເປັນປົກກະຕິ. ພ້ອມກັນນັ້ນ ກໍໄດ້ຊ່ວຍເຫລືອ ແລະ ສ້າງເງື່ອນໄຂໃຫ້ປະຊາຊົນ ຢູ່ເຂດພູດອຍ ຫ່າງໄກສອກຫລີກ ໄດ້ມີຊີວິດການເປັນຢູ່ດີຂຶ້ນ ດ້ວຍການຫັນໄປ ປະກອບອາຊີບອື່ນທີ່ໝັ້ນຄົງ ແທນການປູກຝິ່ນ; ໄດ້ປິ່ນປົວ, ຟື້ນຟູສຸຂະພາບ ແລະ ຝຶກວິຊາຊີບໃຫ້ຜູ້ຖືກເຄາະຮ້າຍ ຈາກຢາເສບຕິດໃນແຕ່ລະປີ ເປັນຈຳນວນຫລາຍສົມຄວນ; ສຳລັບການປະຕິບັດມາດຕະການ ທາງດ້ານກົດໝາຍ ຫລາຍທ້ອງຖິ່ນກໍເຮັດໄດ້ດີ ເປັນຕົ້ນ ແມ່ນເຈົ້າໜ້າທີ່ໄດ້ມ້າງຄະດີ ແລະ ຈັບຄຸມຜູ້ລະເມີດກົດໝາຍ ດ້ວຍການຢຶດຢາເສບຕິດປະເພດຕ່າງໆ ໄດ້ເປັນຈຳນວນຫລວງຫລາຍ. ການປະຕິບັດວຽກງານ 3 ສ້າງ ເປັນຕົ້ນແມ່ນການສ້າງບ້ານ ແລະ ໂຮງຮຽນປອດຢາເສບຕິດ ໃນແຕ່ລະທ້ອງຖິ່ນ ກໍໄດ້ເຮັດຢ່າງເປັນຂະບວນ ແລະ ເກີດມີໂຮງຮຽນ ຕົວແບບປອດຢາເສບຕິດ ຢູ່ຫລາຍທ້ອງຖິ່ນ. ນອກຈາກນັ້ນ ກໍໄດ້ເອົາໃຈໃສ່ປະຕິບັດພັນທະ ແລະ ສົນທິສັນຍາສາກົນ ທີ່ ສປປ ລາວ ເປັນພາຄີ ເຊິ່ງອັນນີ້ ກໍແມ່ນໝາກຜົນຂອງການປະກອບສ່ວນ ຂອງທຸກພາກສ່ວນໃນສັງຄົມ ກໍຄື ການຮ່ວມມືຊ່ວຍເຫລືອ ຂອງບັນດາປະເທດເພື່ອນມິດ ແລະ ອົງການຈັດຕັ້ງ ສາກົນຕ່າງໆ ຢ່າງມີໝາກມີຜົນຕົວຈິງ.
ໃນນາມລັດຖະບານ ຂ້າພະເຈົ້າ ຂໍຖືໂອກາດນີ້ ສະແດງຄວາມຍ້ອງຍໍຊົມເຊີຍ ທຸກພາກສ່ວນທັງຢູ່ຂັ້ນສູນກາງ ແລະ ທ້ອງຖິ່ນ ກໍຄື ປະຊາຊົນບັນເຜົ່າ ໃນທົ່ວປະເທດ ທີ່ໄດ້ປະກອບສ່ວນຢ່າງຫ້າວຫັນ ເຂົ້າໃນການສະກັດກັ້ນ ແລະ ແກ້ໄຂບັນຫາຢາເສບຕິດ ຢູ່ປະເທດເຮົາ.
ຂໍສະແດງຄວາມຂອບໃຈ ມາຍັງບັນດາປະເທດເພື່ອນມິດ, ອົງການຈັດຕັ້ງສາກົນ, ສະຖາບັນການເງິນ ລະຫວ່າງປະເທດ, ອົງການຈັດຕັ້ງທີ່ບໍ່ຂຶ້ນ ກັບລັດຖະບານ ແລະ ຜູ້ປະກອບການທັງພາຍໃນ ແລະ ຕ່າງປະເທດ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອແກ່ ສປປ ລາວ ໃນການແກ້ໄຂບັນຫາຢາເສບຕິດຕະຫລອດມາ.
ພີ່ນ້ອງຮ່ວມຊາດ ທີ່ຮັກແພງ ທັງຫລາຍ;
ການຜະລິດ ແລະ ຈຳໜ່າຍຢາເສບຕິດ ໄດ້ກາຍເປັນຂະບວນການຂ້າມຊາດ, ເຖິງວ່າຫລາຍປະເທດ ໄດ້ເພີ່ມທະວີມາດຕະການ ແລະ ຄວາມພະຍາຍາມໃນການປ້ອງກັນ ແລະ ແກ້ໄຂບັນຫານີ້ປານໃດກໍ່ຕາມ ແຕ່ການເຄື່ອນໄຫວ ກ່ຽວກັບບັນຫາດັ່ງກ່າວ ກໍຍັງມີທ່າອ່ຽງຂະຫຍາຍຕົວ ແລະ ເພີ່ມທະວີຄວາມຮຸນແຮງຂຶ້ນຢ່າງ. ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນ ໃນສັງຄົມ ກໍຄື ອົງການຈັດຕັ້ງສາກົນ ແລະ ປະເທດເພື່ອນມິດ ຢູ່ໃນໂລກ ຈົ່ງຮ່ວມມືກັນ ເພື່ອແກ້ໄຂບັນຫາຢາເສບຕິດນີ້ ຢ່າງຈິງຈັງ.
ສຳລັບຢູ່ ສປປ ລາວ, ການຄ້າຂາຍຢາເສບຕິດ ກໍໄດ້ແຜ່ລາມຈາກຕົວເມືອງ ໄປສູ່ເຂດຊົນນະບົດ ຫ່າງໄກສອກຫລີກຢ່າງໄວວາ ແລະ ມີຊາວໜຸ່ມ, ນັກຮຽນ-ນັກສຶກສາ ແລະ ກຳມະກອນ ຈຳນວນບໍ່ໜ້ອຍ ໄດ້ຕົກເປັນທາດຂອງຢາເສບຕິດ ເຊິ່ງຜູ້ໄດ້ຮັບເຄາະຮ້າຍເຫລົ່ານີ້ ໄດ້ສ້າງບັນຫາໃຫ້ແກ່ສັງຄົມ ແລະ ຄອບຄົວຕົນເອງ, ກາຍເປັນປະກົດການຫຍໍ້ທໍ້ຢູ່ໃນສັງຄົມ ເປັນຕົ້ນ ແມ່ນຂີ້ລັກງັດແງະ, ປຸ້ນຈີ້ຊີງຊັບ, ອຸບັດເຫດທ້ອງຖະໜົນ, ການກໍ່ອາລະວາດຕີກັນ ແລະ ອື່ນໆ.
ສະນັ້ນ, ເພື່ອສະກັດກັ້ນບໍ່ໃຫ້ບັນຫາຢາເສບຕິດ ແຜ່ລະບາດອອກສູ່ວົງກວ້າງ ແລະ ເພີ່ມທະວີຄວາມຮຸນແຮງຂຶ້ນຕື່ມນັ້ນ, ຂ້າພະເຈົ້າ ຂໍສະເໜີໃຫ້ທຸກພາກສ່ວນໃນສັງຄົມ ຈົ່ງເອົາໃຈໃສ່ບາງບັນຫາຕົ້ນຕໍ ດັ່ງນີ້:
1. ໃຫ້ສືບຕໍ່ເປີດຂະບວນການສຶກສາອົບຮົມ ແລະ ໂຄສະນາເຜີຍແຜ່ຢ່າງກວ້າງຂວາງ ດ້ວຍຫລາຍຮູບການ ໂດຍຜ່ານສື່ມວນຊົນ ລວມທັງການປະຊຸມ-ສຳມະນາ, ການສ້າງຂະບວນການກິລາ, ການສະແດງສິນລະປະ ວັນນະ ຄະດີ ແລະ ການສ້າງຂະບວນການອື່ນໆ ເພື່ອສ້າງຈິດສໍານຶກໃຫ້ທຸກຄົນ ເຫັນໄດ້ພິດໄພ ແລະ ຜົນຮ້າຍຂອງຢາເສບຕິດ ທັງປຸກລະດົມໃຫ້ເຂົາເຈົ້າຕື່ນຕົວ ແລະ ສະໝັກໃຈເຂົ້າຮ່ວມຂະບວນການແກ້ໄຂຢາເສບຕິດຢ່າງຕັ້ງໜ້າ.
2. ເອົາໃຈໃສ່ຕິດຕາມກວດກາ, ສຶກສາອົບຮົມ ແລະ ຊ່ວຍເຫລືອປະຊາຊົນ ທີ່ໄດ້ຢຸດເຊົາປູກຝິ່ນແລ້ວນັ້ນ ໃຫ້ມີເງື່ອນໄຂປະກອບອາຊີບອື່ນທີ່ໝັ້ນຄົງ ພ້ອມກັນນັ້ນ ກໍໃຫ້ເອົາໃຈໃສ່ຕິດຕາມຢ່າງໃກ້ຊິດ ເພື່ອບໍ່ໃຫ້ເຂົາເຈົ້າກັບຄືນໄປປູກຝິ່ນອີກ.
3. ໃຫ້ສືບຕໍ່ເອົາໃຈໃສ່ ການບໍາບັດປິ່ນປົວ, ຟື້ນຟູສຸຂະພາບ ແລະ ຝຶກວິຊາຊີບ ໃຫ້ຜູ້ທີ່ໄດ້ຮັບເຄາະຮ້າຍຈາກຢາເສບຕິດປະເພດຕ່າງໆ ໃຫ້ຄືນສູ່ສະພາບປົກກະຕິ, ຄືນສູ່ສັງຄົມ, ມີວຽກເຮັດງານທຳ ແລະ ກາຍເປັນພົນລະເມືອງດີຂອງຊາດ. ຄຽງຄູ່ກັນນັ້ນ ກໍຕ້ອງໄດ້ປັບປຸງ ແລະ ຍົກລະດັບບັນດາສູນປິ່ນປົວທີ່ມີແລ້ວ ໃຫ້ໄດ້ມາດຕະຖານ ເພື່ອບໍລິ ການຮັບໃຊ້ສັງຄົມ ໃຫ້ດີກວ່າເກົ່າ.
4. ໃຫ້ຖືເອົາການແກ້ໄຂ ບັນຫາຢາເສບຕິດ ເຂົ້າເປັນວຽກງານຈຸດສຸມ ໃນວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ ຢູ່ຂັ້ນບ້ານ ແລະ ກຸ່ມບ້ານ. ພ້ອມກັນນີ້ ກໍໃຫ້ສືບຕໍ່ຂຶ້ນບັນຊີບັນດາເປົ້າໝາຍ ທີ່ພົວພັນກັບບັນຫາຢາເສບຕິດ ເພື່ອຫາວິທີແກ້ໄຂຢ່າງທັນການ, ສຳລັບຜູ້ຄ້າຂາຍຢາເສບຕິດ ກໍຕ້ອງດຳເນີນຄະດີຕາມ ລະບຽບກົດໝາຍ ຢ່າງເຂັ້ມງວດ.
5. ໃຫ້ແຕ່ລະແຂວງ ຄົ້ນຄວ້າເພື່ອສ້າງຕັ້ງກອງທຶນຕ້ານຢາເສບຕິດ ດ້ວຍແຫລ່ງທຶນຕ່າງໆຕາມເງື່ອນໄຂ ແລະ ຄວາມສາມາດຕົວຈິງ.
6. ໃຫ້ສືບຕໍ່ປັບປຸງກົງຈັກການຈັດຕັ້ງ ຂອງອົງການກວດກາ ແລະ ຄວບຄຸມຢາເສບຕິດ ໃຫ້ມີຄວາມເຂັ້ມແຂງ ສາມາດເປັນເສນາທິການໃຫ້ ພັກ-ລັດ ໃນການແກ້ໄຂບັນຫາຢາເສບຕິດ.
7. ເພີ່ມທະວີການພົວພັນ ແລະ ຮ່ວມມື ກັບບັນດາປະເທດເພື່ອນມິດ ແລະ ອົງການຈັດຕັ້ງສາກົນຕ່າງໆໃຫ້ ຫລາຍຂຶ້ນກວ່າເກົ່າ ເພື່ອພ້ອມກັນແກ້ໄຂການລັກລອບຄ້າ-ຂາຍ ແລະ ລຳລຽງຂົນສົ່ງຢາເສບຕິດ ໄດ້ຢ່າງທັນການ.
ສຸດທ້າຍນີ້, ຂ້າພະເຈົ້າ ຂໍຮຽກຮ້ອງມາຍັງພະນັກງານ, ທະຫານ, ຕຳຫລວດ ແລະ ປະຊາຊົນທຸກຊັ້ນຄົນ ຈົ່ງເປັນເຈົ້າການເຂົ້າຮ່ວມ ໃນຂະບວນການສະກັດກັ້ນ ແລະ ຕ້ານຢາເສບຕິດ ໃຫ້ແຂງແຮງກ່ວາເກົ່າ ແລະ ຫວັງວ່າບັນ ດາປະເທດເພື່ອນມິດ ກໍຄື ອົງການຈັດຕັ້ງສາກົນຕ່າງໆ ຈະສືບຕໍ່ໃຫ້ການສະໜັບສະໜູນ, ຮ່ວມມື ແລະ ຊ່ວຍເຫລືອດ້ານທຶນຮອນ ແກ່ ສປປ ລາວ ເພື່ອແກ້ໄຂບັນຫາຢາເສບຕິດ ໃຫ້ມີໝາກມີຜົນຕົວຈິງຫລາຍຂື້ນ.
ຂໍຂອບໃຈ