ກອງປະຊຸມຄະນະກຳມະທິການຮ່ວມມືດ້ານເສດຖະກິດ ການຄ້າ ແລະເທັກນິກລະຫວ່າງລາວ-ຈີນ ຄັ້ງທີ 7 ທີ່ນະຄອນຫຼວງວຽງຈັນ ເມື່ອທ້າຍເດືອນພຶດສະພາທີ່ຜ່ານມາ ໂດຍມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳຂົງເຂດເສດຖະກິດການຜະລິດ ແລະຈາລະຈອນ, ທ່ານນາງ ເກົາຫຍຽນ ລັດຖະມົນຕີຊ່ວຍວ່າການ ກະຊວງການຄ້າຂອງຈີນ ເປັນປະທານ ໃນກອງປະຊຸມຮ່ວມກັນ ໄດ້ບັນລຸຂໍ້ຕົກລົງຮ່ວມກັນວ່າ ຈະຊຸກຍູ້ໃຫ້ມີການເລີ່ມລົງມື ກໍ່ສ້າງທາງລົດໄຟ ເພື່ອເຊື່ອມຕໍ່ຈາກເມືອງຄຸນໝິງ ຂອງຈີນມາຍັງນະຄອນຫຼວງວຽງຈັນ ໃຫ້ໄດ້ຢ່າງເປັນຮູບປະທຳໃນເດືອນຕຸລາ 2015 ນີ້.
ໂດຍທາງການຝ່າຍຈີນໄດ້ໃຫ້ການຢືນຢັນໃນກອງປະຊຸມວ່າການກໍ່ສ້າງທາງລົດໄຟຕາມກຳນົດດັ່ງກ່າວນີ້ ຈະເປັນການເລີ່ມລົງມືພ້ອມກັນ ທັງຢູ່ເບື້ອງລາວ ເພື່ອເປັນການຮ່ວມສະເຫຼີມສະຫຼອງ ໃນໂອກາດການສະຖາປະນາ ສປປ ລາວ ຄົບຮອບ 40 ປີ ໃນວັນທີ 2 ທັນວາ ທີ່ຈະເຖິງນີ້ ແຕ່ວ່າກ່ອນທີ່ຈະເລີ່ມລົງມືກໍ່ສ້າງ ໃນພາກຕົວຈິງໄດ້ນັ້ນ ກໍຈະຕ້ອງຈັດທຳສັນຍາລົງທຶນ ຮ່ວມກັນໃຫ້ແລ້ວສຳເລັດເສຍກ່ອນ.
ທັງນີ້ໂດຍທ່ານ ສົມສະຫວາດ ເລັ່ງສະຫວັດ ຄາດໝາຍວ່າລັດຖະບານລາວກັບຈີນຈະບັນລຸຂໍ້ຕົກລົງກ່ຽວກັບການກໍ່ສ້າງທາງລົດໄຟດັ່ງກ່າວ ພາຍໃນເດືອນມິຖຸນາ 2015 ນີ້ ແລະ ຫລັງຈາກນັ້ນ ກໍຈະສະເໜີຂໍ້ຕົກລົງ ເພື່ອຂໍການອະນຸມັດຈາກສະພາແຫ່ງຊາດລາວໃນໄລຍະທີ່ຕໍ່ເນື່ອງກັນ.
ທ່ານ ສົມສະຫວາດ ໄດ້ໃຫ້ການຢືນຢັນດ້ວຍວ່າ ຮູບແບບຂອງການຮ່ວມມືລະຫວ່າງ ລັດຖະບານລາວກັບຈີນ ໃນການ
ກໍ່ສ້າງທາງລົດໄຟດັ່ງກ່າວນີ້ ຈະເປັນການຮ່ວມລົງທຶນດ້ວຍການສ້າງຕັ້ງບໍລິສັດຂຶ້ນມາ ເພື່ອຮັບຜິດຊອບການກໍ່ສ້າງ ແລະ
ບໍລິຫານໂຄງການທັງໝົດ, ໂດຍໃນປັດຈຸບັນ ຄະນະຮັບຜິດຊອບຂອງທັງສອງຝ່າຍ ຍັງສືບຕໍ່ການເຈລະຈາເພື່ອຕົກລົງກັນ ກ່ຽວກັບແບບກໍ່ສ້າງ ແລະ ກຳນົດສັດສ່ວນ ຂອງການລົງທຶນ ລວມທັງການຫາແຫລ່ງເງິນທຶນກູ້ຢືມດ້ວຍ ດັ່ງທີ່ທ່ານໄດ້ໃຫ້ການຊີ້ແຈງວ່າ:
ເລັ່ງປຶກສາຫາລືກັນ ເຖິງການເຂົ້າຫາແຫລ່ງທຶນ ກັບການລົງທຶນເບື້ອງຕົ້ນ ຂອງ
ບໍລິສັດຮ່ວມລາວ-ຈີນ ເຮົາຄວນເອົາເທົ່າໃດ ຈະເອົາ 30 ເປີເຊັນບໍໍ່ 40
ເປີເຊັນບໍ່ ກະຍັງຢູ່ໃນຂັ້ນປຶກສາກັນເລື້ອງນີ້ຢູ່.”
ໂດຍຄາດໝາຍວ່າ ລັດຖະບານລາວກັບຈີນ ຈະລົງທຶນຂັ້ນເບື້ອງຕົ້ນໃນມູນຄ່າ 840 ລ້ານໂດລາເຖິງ 1,260 ລ້ານໂດລາ ແລະ ຈະກູ້ຢືມຈາກທະນາຄານການຄ້າຂາອອກ-ຂາເຂົ້າຂອງລັດຖະບານຈີນ ໃນມູນຄ່າລວມບໍ່ເຖິງ 5,000 ລ້ານໂດລາ.
ກ່ອນໜ້ານີ້ ທ່ານຫລີ ເກີ້ຈຽງ ນາຍົກລັດຖະມົນຕີຈີນ ໄດ້ໃຫ້ການຢືນຢັນວ່າ ການເຈລະຈາຮອບໃໝ່ຈະມີການກຳນົດຮູບແບບ ການຮ່ວມມື ທີມີປະສິດທິພາບ ທີ່ທຸກຝ່າຍໄດ້ຮັບຜົນປະໂຫຍດ ແລະ ສອດຄ່ອງກັບສະພາບຕົວຈິງ, ໂດຍທາງການຈີນເຫັນວ່າ ລົດໄຟຄວາມໄວສູງອາດບໍ່ເມາະສົມ ກັບສະພາບພູມິປະເທດ ໃນລາວທີ່ສ່ວນໃຫຍ່ເປັນເຂດພູດອຍ ຈຶ່ງສະເໜີໃຫ້ປ່ຽນເປັນລົດໄຟ ຄວາມໄວປານກາງ ລະບົບລາງຄູ່ ທີ່ຂະບວນໂດຍສານ ແລະຂົນສົ່ງສິນຄ້າມີຄວາມໄວ 160 ແລະ 120 ກິໂລແມັດຕໍ່ຊົ່ວໂມງຕາມລຳດັບ.
ນອກຈາກນັ້ນ, ທາງການໄທກັບຈີນ ກໍໄດ້ລົງນາມໃນບັນທຶກຄວາມເຂົ້າໃຈ ວ່າດ້ວຍການຮ່ວມມື ໃນການກໍ່ສ້າງທາງລົງໄຟລາງຄູ່ຄວາມໄວປານກາງ ເມື່ອທ້າຍປີ 2014 ຢູ່ທີ່ບາງກອກ ໂດຍແນໃສ່ການພັດທະນາທາງລົດໄຟ ເພື່ອເຊື່ອມຕໍ່ກັນ ໃຫ້ໄດ້ພາຍໃນປີ 2022 ດ້ວຍການ ຮ່ວມລົງທຶນເພື່ອກໍ່ສ້າງທາງລົດໄຟລາງຄູ່ ຄວາມໄວປານກາງ 2 ເສັ້ນທາງ ຢູ່ໃນໄທ ດັ່ງທີ່ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີໄທ ໄດ້ໃຫ້ການຢືນຢັນວ່າ:
“ການລົງນາມບັນທຶກຄວາມເຂົ້າໃຈ ທີ່ເອີ້ນວ່າ MOU ຄວາມຮ່ວມມື່ລະຫວ່າງໄທ ກັບ ສາທາລະນະລັດ ປະຊາຊົນຈີນ ເລື່ອງການພັດທະນາໂຄງສ້າງພື້ນຖານທາງລົດໄຟ ຄວາມໄວປານກາງ 2 ເສັ້ນທາງ ໜອງຄາຍ-ແກ່ງຄອຍ-ມາບຕາພຸດ ແລະ ແກ່ງຄອຍ-ກຸກເທບ ໃນຍຸດທະສາດ 2558-2565 (ປີ 2015-2022) ເປັນໜຶ່ງໃນຍຸດທະສາດ ສຳຄັນຂອງລັດຖະບານ ທີ່ຈະຍົກລະດັບຂອງເຮົາໃຫ້ເປັນ HUB ໃນການເຊື່ອມຕໍ່ໃນກຸ່ມປະເທດເອເຊຍຕາເວັນອອກສຽງໃຕ້ ກັບຈີນໃຫ້ໄດ້.”
ໂດຍເສັ້ນທາງລົດໄຟດັ່ງກ່າວນີ້ ຈະເຊື່ອມຕໍ່ກັບລາວ ແລະຈີນ ທັງກໍຍັງມີເປົ້າໝາຍຈະເຊື່ອມຕໍ່ໃຫ້ໄປເຖິງ ມາເລເຊຍແລະ ສິງກະໂປ ພາຍໃຕ້ແຜນການເຊື່ອມຕໍ່ທາງລົດໄຟລະຫວ່າງ ຈີນກັບອາຊ່ຽນອີກດ້ວຍ.
