ອີງຕາມເວບໄຊຂອງສຳນັກຂ່າວໄທ ລາຍງານໃຫ້ຮູ້ວ່າ: ເມື່ອເວລາ 09:00 ໂມງ ຂອງວັນທີ 22 ມິຖຸນາ, ພົນຕຳຫລວດເອກ ສິປະນັນ ສັນຄຸນແກ້ວ ຫົວໜ້າຕຳຫລວດຊາຍແດນ ເປີດເຜີຍວ່າ: ເມື່ອເວລາ 20:00 ໂມງ ຄືນວັນທີ 21 ມິຖຸນາ ໄດ້ຮັບແຈ້ງຈາກສາຍຂ່າວວ່າຈະມີຂະບວນການລັກລອບຂົນຢາເສບຕິດຈາກປະເທດເພື່ອນບ້ານ ເຂົ້າມາໃນພື້ນທີ່ເມືອງທ່າອຸເທນ ຈຶ່ງສັ່ງໃຫ້ພົນຕຳຫລວດເອກ ທະນາພົນ ທ້າວໜູ ຮອງຫົວໜ້າຕຳຫລວດຊາຍແດນ, ພົນຕຳຫລວດໂທ ທະວີ ສາຣະການ ວາງແຜນເຂົ້າຈັບກຸມ.
ພົນຕຳຫລວດໂທ ທະວີ ກ່າວວ່າ: ພາຍຫລັງຮູ້ຂໍ້ມູນ ຈຶ່ງວາງແຜນຈັດເຈົ້າໜ້າແບ່ງກຳລັງອອກ 4 ຊຸດ ພ້ອມກຳລັງພົນ 20 ຄົນ ດັກຊຸ່ມບໍລິເວນແຄມຝັ່ງແມ່ນ້ຳຂອງບ້ານຊຽງຍືນ ແລະ ຕໍ່ມາກວດພົບເຮືອຫາງຍາວ 1 ລຳ ຂີ່ມາຈາກບ້ານເນໄຊຢອນ ເມືອງທ່າແຂກ ແຂວງຄຳມ່ວນ ມາຈອດແຄມຝັ່ງຫ່າງຈາກຝັ່ງໄທປະມານ 100 ແມັດ ໂດຍພາຍໃນເຮືອເຫັນຜູ້ຊາຍ 4 ຄົນ ຊ່ວຍກັນລຳລຽງວັດຖຸສີດຳຂະໜາດໃຫຍ່ອອກຈາກເຮືອມາວາງໄວ້ແຄມຝັ່ງ, ຊຸດຈັບກຸມຈຶ່ງໄດ້ສະແດງຕົວຂໍກວດຄົ້ນ ແຕ່ຄົນຮ້າຍທັງໝົດໄດ້ແລ່ນຫລົບໜີ ຈຶ່ງໄລ່ຈັບກຸມໄດ້ພຽງທ້າວ ແອັດ ພິມມະຈັກ ອາຍຸ 30 ປີ ແລະ ທ້າວ ໄຂ ສີຂຽວ ອາຍຸ 30 ປີ ຊາວລາວໄດ້ໃນຈຸດເກີດເຫດ, ສ່ວນອີກ 2 ຄົນອາໄສຄວາມມືດຫລົບໜີໄປໄດ້.
ຈາກການກວດສອບພົບເປົາປຸ໋ຍສີຂາວ 8 ເປົາ ຫຸ້ມດ້ວຍຖົງປລາສຕິກ ພາຍໃນບັນຈຸກັນຊາແຫ້ງ ຈຳນວນ 310 ແທ່ງ ຄິດເປັນມູນຄ່າກວ່າ 1 ລ້ານບາດ ຈຶ່ງກວດຢຶດເຮືອ ແລະ ຂອງກາງໄວ້ເປັນຫລັກຖານ.
ສອບສວນເບື້ອງຕົ້ນຜູ້ຕ້ອງຫາທັງສອງຄົນຮັບສາລະພາບວ່າ: ໄດ້ຮັບຄ່າຈ້າງຄົນລະ 2.000 ບາດ ຈາກນາຍທຶນໃຫ້ຂົນເປົາປຸ໋ຍຂຶ້ນເຮືອຈາກຝັ່ງລາວມາວາງໄວ້ຢູ່ຈຸດນັດພົບ ຫລັງຈາກນັ້ນຈະມີຄົນມາຮັບອີກເທື່ອໜຶ່ງ.
ຫລັງຈາກນັ້ນເຈົ້າໜ້າທີ່ຈຶ່ງນຳຕົວສົ່ງພະນັກງານສືບສວນທ່າອຸເທນ ເພື່ອດຳເນີນຄະດີ ໂດຍແຈ້ງຂໍ້ຫາຮ່ວມກັນມີຢາເສບຕິດໃຫ້ໂທດປະເພດ 5 (ກັນຊາ) ເຂົ້າມາໃນຣາຊະອານາຈັກໂດຍຜິດກົດໝາຍ ແລະ ລັກລອບຫລົບໜີເຂົ້າເມືອງໂດຍບໍ່ໄດ້ຮັບອະນຸຍາດ.
ແຫລ່ງຂ່າວ: ລາວພັດທະນາ