ເມື່ອໄລຍະທ້າຍເດືອນກຸມພາ ທີ່ຜ່ານມາ, ຜູ້ຂຽນໄດ້ມີໂອກາດ ເຂົ້າຮ່ວມກອງປະຊຸມສໍາມະນາໃຫ້ແກ່ສື່ມວນຊົນ ກ່ຽວກັບການກ້າວສູ່ປະຊາຄົມອາຊຽນ (ເອອີຊີ) ໃນທ້າຍປີ 2015 ແລະ ຄວາມພ້ອມຂອງລາວເຮົາ ໃນການເປັນປະທານອາຊຽນ ໃນປີ 2016 ນີ້ ຢູ່ທີ່ສູນຝຶກອົບຮົມ ແລະ ຮ່ວມມືສາກົນ (ໄອຊີທີຊີ) ນະຄອນຫຼວງວຽງຈັນ ພາຍໃຕ້ການເປັນປະ ທານຮ່ວມ ລະຫວ່າງທ່ານ ອາລຸນແກ້ວ ກິດຕິຄຸນ, ລັດຖະມົນຕີຊ່ວຍວ່າການກະຊວງຕ່າງ ປະເທດ ທັງເປັນເຈົ້າໜ້າທີ່ອາວຸໂສອາຊຽນ ຂອງລາວເຮົາ ກັບທ່ານ ສະຫວັນຄອນ ຣາຊມຸນ ຕຣີ, ລັດຖະມົນຕີຊ່ວຍວ່າການກະຊວງຖະແຫລງຂ່າວ-ວັດທະນະທໍາ ແລະ ທ່ອງທ່ຽວ.
ງານດັ່ງກ່າວ ເປັນການຮ່ວມມືກັນຈັດຂຶ້ນ ລະຫວ່າງບັນດາພະນັກງານວິຊາການ ກໍຄືເຈົ້າໜ້າທີ່ ຈາກສາມກະຊວງຫຼັກ ເຊິ່ງມີບົດບາດຮັບຜິດຊອບການກຽມຄວາມພ້ອມກ້າວສູ່ເອອີຊີ ທັງສາມເສົາຄໍ້າ ຂອງລາວເຮົາ ຄື: ກະຊວງການຕ່າງປະເທດ (ຮັບຜິດຊອບປະຊາຄົມການເມືອງ-ຄວາມໝັ້ນຄົງອາຊຽນ), ກະຊວງອຸດສາຫະກໍາ-ການຄ້າ (ຮັບຜິດຊອບປະຊາຄົມເສດຖະກິດອາຊຽນ) ແລະ ກະຊວງຖະແຫຼງຂ່າວ-ວັດທະນະທໍາ ແລະ ທ່ອງທ່ຽວ (ຮັບຜິດ ຊອບປະຊາຄົມວັດທະນະທໍາ-ສັງຄົມອາຊຽນ) ພ້ອມທັງຖັນແຖວສື່ມວນຊົນ ທີ່ຢູ່ອ້ອມຂ້າງສູນກາງເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ, ທ່ານ ໄຊຊະນະ ໄຊຍະກອນ, ຮອງຫົວໜ້າກົມນະໂຍບາຍການຕ່າງ ປະເທດ, ກະຊວງອຸດສາຫະກໍາ ແລະ ການຄ້າ ໄດ້ເປີດເຜີຍໃຫ້ຮູ້ວ່າ: ທີ່ຜ່ານມາ ບັນດາສື່ມວນຊົນເຮົາ ເຮັດພາລະບົດບາດນໍາສະເໜີຂ່າວ “ເອອີຊີ” ໄດ້ດີພໍສົມຄວນ, ແຕ່ໃນຕໍ່ໜ້າ ກໍຢາກຮຽກຮ້ອງໃຫ້ເພີ່ມທະວີການນໍາສະເໜີຂ່າວ “ເອອີຊີ” ຕື່ມອີກ ໂດຍການສອດແຊກເລື່ອງດັ່ງກ່າວ ເຂົ້າທຸກຂົງເຂດວຽກງານ ທີ່ເຮົາຈະນໍາສະເໜີຕໍ່ສັງຄົມ (ຕ້ອຍເລື່ອງ “ເອອີຊີ” ໃສ່ໜ້ອຍໜຶ່ງກໍໄດ້), ຕ້ອງໃຊ້ສັບພາສາອະທິບາຍໃຫ້ຄົນເສບຂ່າວເຂົ້າໃຈງ່າຍ, ທີ່ສໍາຄັນຕ້ອງກ່າວເຖິງຄວາມໝາຍຂອງ “ເອອີຊີ” ແມ່ນຫຍັງ? ຜົນໄດ້-ຜົນເສຍຂອງປະຊາຊົນເຮົາເດ ພາຍຫຼັງເຂົ້າ “ເອອີຊີ”? ຕ້ອງນໍາສະເໜີບັນຫາໃກ້ຕົວພົວພັນເຖິງສັງຄົມເຮົາແດ່ ເຂົາເຈົ້າຈຶ່ງມີຄວາມສົນໃຈຢາກຮູ້ ແລະ ຕ້ອງໄຂຂໍ້ຂ້ອງໃຈ ຕໍ່ບາງເລື່ອງທີ່ຫຼາຍຄົນໃນສັງຄົມຢາກຮູ້ຫຼືຍັງເຂົ້າໃຈແບບຄາດເຄື່ອນວ່າບໍ່ຟ້າວຊື້ລົດໃນຕອນນີ້ ຖ້າເຮົາເຂົ້າ “ເອອີຊີ” ປອດພາສີນໍາເຂົ້າ ແລ້ວລາຄາລົດລາງພາຫະນະ ຊິມີລາຄາຖືກລົງຈຶ່ງຊື້ ເລື່ອງນີ້ແມ່ນແທ້ຫຼືບໍ? ຖ້າບໍ່ແມ່ນຄວາມຈິງເດ ຍ້ອນສາເຫດຫຍັງ ປອດພາສີນໍາເຂົ້າແລ້ວ ຍັງເລື່ອງອາກອນນໍາໃຊ້ເດ? ທັງໝົດນີ້ ສື່ມວນຊົນເຮົາຈະຕ້ອງເປັນຂົວຕໍ່ນໍາ ເອົາຂໍ້ມູນຕົວຈິງຈາກພາກສ່ວນກ່ຽວຂ້ອງມານໍາສະເໜີຕໍ່ສັງຄົມ.
ທາງດ້ານ ທ່ານ ຄໍາພູ ເພຍສາຂາ, ຫົວໜ້າພະແນກຮ່ວມມື, ກົມພົວພັນສາກົນ, ກະ ຊວງຖະແຫຼງຂ່າວ-ວັດທະນາທໍາ ແລະ ທ່ອງທ່ຽວ ຍັງໄດ້ແນະນໍາໃຫ້ແກ່ສື່ມວນຊົນເຮົາ ໃນການນໍາສະເໜີຂ່າວ “ເອອີຊີ” ຕື່ມອີກວ່າ: ສໍາລັບເສົາຄໍ້າທີສາມ ກໍຄືປະຊາຄົມວັດທະນະທໍາ-ສັງຄົມອາຊຽນ, ສື່ມວນຊົນເຮົາ ກ່ອນອື່ນຕ້ອງທໍາຄວາມເຂົ້າໃຈ ແລະ ນໍາສະເໜີກ່ຽວ ກັບບັນຫາ “ຄົນ” ເປັນຕົ້ນຕໍກ່ອນບັນຫາອື່ນໃດ ແລະ ຄົນທີ່ວ່ານີ້ ກໍແມ່ນຄົນຢູ່ໃນສັງຄົມກວ້າງຂວາງບໍ່ແມ່ນລະດັບປະເທດຫຼືລະດັບຊາດເທົ່ານັ້ນ, ແຕ່ມັນໝາຍເຖິງຄົນໃນສັງຄົມໃຫຍ່ລະດັບພາກພື້ນ (10 ປະເທດ) ເຊິ່ງຄົນເຫຼົ່ານີ້ ໄດ້ຕິດພັນກັບຫຼາຍຂົງເຂດວຽກງານ ເຊັ່ນ: ການສຶກສາທິການ, ກີລາ, ສາທາລະນະສຸກ, ແຮງງານ-ສະຫວັດດີການ, ວັດທະນະທໍາ, ການທ່ອງທ່ຽວ… ດັ່ງນັ້ນ ຕ້ອງຄໍານຶງສະເໝີວ່າ ປະຊາຄົມອາຊຽນ ຫຼື “ເອອີຊີ” ແມ່ນການໂຮມກັນເຂົ້າເປັນໜຶ່ງດຽວ ໂດຍໃຫ້ໄດ້ມາເຊິ່ງຄວາມສາມັກຄີ ກໍຄືການຮ່ວມມືກັນ ຂອງຄົນຈໍານວນ 600 ກວ່າລ້ານຄົນ ຈາກ 10 ປະເທດ ໃນບັນດາຊາດສະມາຊິກອາຊຽນ, ຢາກໃຫ້ເຂົາເຈົ້າເຫຼົ່ານັ້ນ ມີຄວາມສາມັກຄີ ແລະ ຮ່ວມມືກັນ, ກ່ອນອື່ນ ກໍຕ້ອງເຮັດແນວໃດ ໃຫ້ຄົນ 600 ກວ່າລ້ານນັ້ນ ມີຄວາມເຂົ້າອົກເຂົ້າໃຈກັນກ່ອນ ແລະ ກ່ອນທີ່ເຂົາເຈົ້າ ຈະເຂົ້າອົກເຂົ້າໃຈກັນ ກໍຕ້ອງຮູ້ຈັກກັນກ່ອນ “ຮູ້ເຂົາຮູ້ເຮົາ”. ເມື່ອເຊື່ອມໂຍງກັນແບບນີ້ແລ້ວ ບັນຫາແຮງງານເດ ຕ່າງຊາດຊິບໍ່ເຂົ້າມາຍາດແຍ່ງອາຊີບ ກໍຄືວຽກເຮັດງານທຳຂອງເຮົາເບາະ? ນີ້ແຫຼະຄື “ໂຈດ” ທີ່ສື່ມວນຊົນເຮົາຈະຕ້ອງແກ້ໃຫ້ອອກ ເພື່ອນໍາສະເໜີຂ່າວຄາວໃຫ້ຄວາມກະຈ່າງແຈ້ງ ຕໍ່ປະຊາຄົມອາຊຽນ ເວົ້າລວມ, ເວົ້າສະເພາະ ຕໍ່ສັງຄົມລາວ ກໍຄືຕໍ່ປະຊາຊົນຊາວລາວເຮົາ.
[ໂດຍ: ຈານຈ່ອຍ]