ເມື່ອລະດູຝົນມາຮອດແລ້ວບໍ່ພຽງນຳຄວາມຊຸ່ມຊື່ນມາຝາກຜືນດິນແລະຜູ້ຄົນແຕ່ຝົນທີ່ຕົກຍັງມາພ້ອມພະຍາດຕ່າງໆທີ່ຕ້ອງລະວັງປັດໄຈສຳຄັນພະຍາດລະບາດໃນລະດູຝົນ
ສຳລັບປັດໄຈສຳຄັນໃນການເກີດພະຍາດລະບາດຫລືພະຍາດຕິດຕໍ່ຕ່າງໆມີຢູ່ນຳກັນ 3 ຢ່າງຄື:
– ເຊື້ອພະຍາດ
– ຮ່າງກາຍຄົນ
– ສິ່ງແວດລ້ອມທີ່ປ່ຽນແປງໄປ
ສຳລັບໃນລະດູຝົນສະພາບສິ່ງແວດລ້ອມທີ່ປ່ຽນແປງໄປກໍຄືມີຝົນຕົກອາກາດເຢັນລົງແລະສຸ່ມຊຶ່ງຈະເຮັດໃຫ້ເຊື້ອພະຍາດບາງຊະນິດຢູ່ໃນສິ່ງແວດລ້ອມໄດ້ດົນຂຶ້ນເຊັ່ນ:ໄວຣັສ,ໄຂ້ຫວັດໃຫຍ່ແລະໃນລະດູຝົນກໍຈະເປັນໄລຍະທີ່ສັດບາງຊະນິດເຊັ່ນ:ຍຸງລາຍມີການຈະເລີນພັນແລະມີໂອກາດສຳຜັດກັບຄົນຫລາຍຂຶ້ນດັ່ງນັ້ນຈຶ່ງເປັນໄລຍະທີ່ມີການລະບາດຂອງໄຂ້ເລືອດອອກນອກຈາກນັ້ນໃນບາງບ່ອນຍັງມີນ້ຳຖ້ວມຂັງເມື່ອໄປສຳຜັດຖືກນ້ຳຈຶ່ງອາດເຮັດໃຫ້ເກີດພະຍາດທີ່ມາກັບນ້ຳເຊັ່ນ:ພະຍາດເລັບໂຕດໄປໂລຊີດຫລືຍ່ຽວໜູ
ສັງເກດແບບໃດວ່າເຈັບປ່ວຍແລ້ວ
ສຳລັບພະຍາດຕິດຕໍ່ຫລືພະຍາດຕິດເຊື້ອອາການທໍາອິດທີ່ສຳຄັນກໍຄືເປັນໄຂ້ຊຶ່ງຖ້າເປັນໄຂ້ຫວັດທຳມະດາຜູ້ປ່ວຍຈະມີອາການທາງລະບົບຫາຍໃຈເຊັ່ນ:ເຈັບຄໍ,ໄອ,ຄັນດັງ,ມີນ້ຳມູກແຕ່ຖ້າອາການຮຸນແຮງເປັນໄຂ້ຫວັດໃຫຍ່ຫລືປອດບວມຜູ້ປ່ວຍກໍຈະມີໄຂ້ສູງເຈັບຫົວຫລາຍຫລືມີອາການຫອບຫືດ
ຖ້າເປັນໄຂ້ເລືອດອອກໂດຍທົ່ວໄປຈະບໍ່ມີອາການທາງລະບົບຫາຍໃຈແຕ່ຈະເປັນໄຂ້ສູງຟູ ແໜ້ນທ້ອງຮາກໂດຍຜູ້ປ່ວຍຈະມີໄຂ້ສູງຢູ່ປະມານ2-4ມື້ແລະເມື່ອໄຂ້ຫລຸດກໍອາດຈະມີເລືອດອອກຫລືຊັອກໄດ້ຊຶ່ງສ່ວນໃຫຍ່ຈະພົບພະຍາດນີ້ໃນເດັກນ້ອຍ
ສ່ວນພະຍາດຍ່ຽວໜູຜູ້ປ່ວຍຈະມີໄຂ້ສູງປວດເມື່ອຍຕາມໂຕ,ຕາແດງ,ຫມາກໄຂ່ຫລັງວາຍ ແຕ່ສ່ວນໃຫຍ່ຄົົນທີ່ປ່ວຍເປັນພະຍາດນີ້ຈະມີການສຳຜັດກັບນ້ຳໂດຍຕີນມີບາດແຜຊຶ່ງພົບໄດ້ທັງໃນເມືອງແລະຊົນນະບົດໂດຍໂອກາດໃນການຕິດເຊື້ອຂຶ້ນຢູ່ກັບປະລິມານຂອງເຊື້ອໃນນ້ຳແລະໄລຍະເວລາໃນການແຊ່ນ້ຳເພາະແມ່ນຈະບໍ່ມີບາດແຜແຕ່ຖ້າແຊ່ນ້ຳຕິດຕໍ່ກັນດົນເກີນ6ຊົ່ວໂມງຜິວໜັງທີ່ແຊ່ນ້ຳກໍຈະຫ່ຽວແລະສາມາດຕິດເຊື້ອຈາກຜິວໜັງທີ່ຫ່ຽວນັ້ນໄດ້ເຊັ່ນດຽວກັນ
ສາເຫດສຳຄັນຂອງພະຍາດລະບາດໃນລະດູຝົນ
ຄວາມເຈັບປ່ວຍທີ່ເກີດຂຶ້ນໃນລະດູຝົນສ່ວນໃຫຍ່ເກີດຈາກການຕາກຝົນຫລືເຄື່ອງນຸ່ງຫົ່ມປຽກຊຸ່ມເຮັດໃຫ້ອຸນຫະພູມໃນຮ່າງກາຍຫລຸດລົງສົ່ງຜົນໃຫ້ພູມຕ້ານທານຫລຸດລົງ ປະກອບກັບເຊື້ອພະຍາດບາງຊະນິດມີຄວາມແຂງແຮງຂຶ້ນຕາມລະດູການຈຶ່ງເຮັດໃຫ້ເກີດການເຈັບປ່ວຍໄດ້ງ່າຍຂຶ້ນ
ການປິ່ນປົວພະຍາດລະບາດໃນລະດູຝົນ
ທັງ3ພະຍາດມີວິທີການເບິ່ງແຍງໃນເບື້ອງຕົ້ນຄືກັນແຕ່ວິທີການປິ່ນປົວຈະແຕກຕ່າງກັນອອກໄປໂດຍໄຂ້ຫວັດໃຫຍ່ຫລືປອດບວມຊຶ່ງເກີດຈາກເຊື້ອໄວຣັສໃນບາງກໍລະນີແພດອາດຈະໃຫ້ຢາຕ້ານໄວຣັສແລະປິ່ນປົວແບບເບິ່ງອາການສ່ວນໄຂ້ເລືອດອອກໃນໄລຍະທີ່ໄຂ້ຫລຸດແລະອາດເກີດອາການຊັອກກໍອາດຈະຕ້ອງມີການໃຫ້ນ້ຳເກືອຫລືຕິດຕາມອາການຢ່າງໃກ້ຊິດສ່ວນພະຍາດຍ່ຽວໜູຈະຕ້ອງມີການໃຫ້ຢາປະຕິຊີວນະໃນການຂ້າເຊື້ອຢ່າງຖືກຕ້ອງລວມທັງຖ້າມີຫມາກໄຂ່ຫລັງວາຍກໍຈະຕ້ອງມີການຟອກຫມາກໄຂ່ຫລັງນໍາອີກ
ພະຍາດລະບາດໃນລະດູຝົນເບິ່ງແຍງປ້ອງກັນແບບໃດ?
ສຳລັບໃນລະດູຝົນສິ່ງທີ່ສຳຄັນຄືປິ່ນປົວຮ່າງກາຍໃຫ້ອົບອຸ່ນຖ້າຕາກຝົນໂຕປຽກກໍຄວນຮີບອາບນ້ຳ,ເຊັດໂຕໃຫ້ແຫ້ງໂດຍສະເພາະຫົວໃສ່ເສື້ອຜ້າທີ່ອົບອຸ່ນແລະຖ້າໃນເຮືອນມີແຫລ່ງເພາະພັນລູກນ້ຳຍຸງລາຍກໍຄວນສຳຫລວດແລະກຳຈັດຖ້າມີຝົນຕົກແລະນ້ຳຖ້ວມຂັງກໍຢ່າໄປແຊ່ນ້ຳໂດຍສະເພາະໃນກໍລະນີທີ່ມີບາດແຜຢູ່ຕີນຖ້າມີຄວາມຈຳເປັນກໍຄວນໃສ່ເກີບບູທຫລືຖ້າຫລີກລ້ຽງບໍ່ໄດ້ກໍຄວນຮີບເຮັດຄວາມສະອາດຕີນໂດຍໃຊ້ສະບູແລະເຊັດເຮັດຄວາມສະອາດໃຫ້ແຫ້ງນອກຈາກນັ້ນຍັງຄວນອອກກຳລັງກາຍຢ່າງສະຫມ່ຳສະ ເໝີລ້າງມືໃຫ້ສະອາດກິນອາຫານທີ່ມີປະໂຫຍດແລະຖ້າມີອາການຜິດປົກກະຕິໂດຍສະເພາະເປັນໄຂ້ກໍບໍ່ຄວນຫາຊື້ຢາມາກິນເອງເພາະຢາບາງຊະນິດອາດຈະເຮັດໃຫ້ຜູ້ປ່ວຍມີອາການຮ້າຍກວ່າເກົ່າເຊັ່ນຢາແກ້ໄຂ້ທີ່ມີລິດແຮງອາດເຮັດໃຫ້ຜູ້ປ່ວຍໄຂ້ເລືອດອອກມີເລືອດອອກງ່າຍຍິ່ງຂຶ້ນດັ່ງນັ້ນຖ້າມີອາການຜິດປົກກະຕິຈຶ່ງຄວນໄປພົບໝໍໂດຍສະເພາະໃນຜູ້ທີ່ມີພະຍາດປະຈຳຕົວຫລືຮ່າງກາຍບໍ່ແຂງແຮງເຊັ່ນ:ເດັກນ້ອຍອາຍຸຕ່ຳກວ່າ2ປີຜູ້ສູງອາຍຸທີ່ມີອາຍຸຫລາຍກວ່າ65ປີຫລືຜູ້ທີ່ມີພະຍາດປະຈຳຕົວຊຳເຮື້ອເຊັ່ນ:ພະຍາດປອດ,ມະເຮັງ,ພະຍາດຫົວໃຈເນື່ອງຈາກອາດຈະມີອາການປ່ວຍຮຸນແຮງຫລາຍກວ່າຄົນປົກກະຕິໄດ້