ທ້າວ ສະຫວຽງ ຈັນທະວົງ ຄອບຄົວຕົວແບບປູກຝັງເຮັດການຜະລິດເປັນສິນຄ້າ ບ້ານທ່າແຂກ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ກ່າວວ່າ: ໄດ້ປະກອບອາຊີບເຮັດສວນປູກຜັກເປັນສິນຄ້າ ມາເປັນເວລາຫຼາຍກວ່າ 20 ປີ ໃນເນື້ອທີ່ 3 ເຮັກຕາກວ່າ ໂດຍໄດ້ປູກພືດຜັກແບບປະສົມປະສານ ຄື: ເຮັດນາ ລ້ຽງປາ ລ້ຽງສັດ ເຮັດສວນກ້ວຍ ແລະ ສາລີ ສຳລັບພືດທີ່ປູກຫຼາຍກວ່າໝູ່ແມ່ນປູກກ້ວຍ ເຊິ່ງຖືວ່າເປັນສິນຄ້າຫຼັກ ໃນເນື້ອທີ່ປະມານ 10 ກວ່າໄລ່ ຮອງລົງມາແມ່ນເຮັດນາໃນເນື້ອທີ່ 5 ໄລ່ ແລະ ເນື້ອທີ່ອີກຈຳນວນໜຶ່ງແມ່ນໄດ້ແບ່ງປູກຜັກ ແລະ ສາລີ.
ສຳລັບຜົນຜະລິດທີ່ສາມາດນຳໄປຈຳໜ່າຍໃນແຕ່ລະມື້ ຄິດເປັນກຳໄລແມ່ນໄດ້ມື້ໜຶ່ງປະມານ 2 ແສນກີບ ຖ້າລວມໝົດປີແລ້ວສາມາດສ້າງຜົນກຳໄລໄດ້ປະມານ 73 ລ້ານກີບ ໂດຍໄດ້ໄປຂາຍເອງຢູ່ຕະຫຼາດທົ່ງຂັນຄຳ ໃຊ້ແຮງງານຕົ້ນຕໍ 2 ຄົນ ສ່ວນແຮງງານສຳຮອງແມ່ນພີ່ນ້ອງ ແລະ ປະຊາຊົນພາຍໃນບ້ານ ເພື່ອເປັນການສ້າງວຽກເຮັດງານທຳໃຫ້ກັບພວກເຂົາເຈົ້າມີລາຍຮັບ ເພີ່ມ.
ກ້ວຍຖືວ່າເປັນພືດຫຼັກທີ່ນຳລາຍຮັບມາໃຫ້ແກ່ຄອບຄົວ ເພາະວ່າກ້ວຍສາມາດເກັບຜົນຜະລິດໄດ້ຕະຫຼອດປີ ພ້ອມນັ້ນ ກ້ວຍຍັງສາມາດຮັກສາສະພາບດິນໄດ້ດີ ໃຊ້ເວລາປູກ 5-6 ເດືອນກໍ່ໃຫ້ໝາກ ແລະ ຫຼັງຈາກນັ້ນ ກໍ່ເກັບຜົນຜະລິດໄປເລື້ອຍໆ ປະມານ 3 ປີຈຶ່ງຈະໝົດອາຍຸ ກ້ວຍທີ່ນຳມາປູກຈະມີກ້ວຍງ້າວ ກ້ວຍຫອມ ກ້ວຍໄຂ່ ທີ່ເປັນສິນຄ້າຕະຫຼາດຕ້ອງການສູງ ເຊິ່ງການປູກກ້ວຍແມ່ນບໍ່ໄດ້ໃຊ້ແຮງງານຫຼາຍ ປູກງ່າຍ ແລະ ພາຍຫຼັງປູກສຳເລັດກໍ່ພຽງແຕ່ບົວລະບັດໃສ່ຝຸ່ນ ແລະ ເບິ່ງແຍ່ງຕົ້ນກ້ວຍໃຫ້ໄດ້ຮັບອາຫານທີ່ພຽງພໍ ສຳລັບເຕັກນິກການເຮັດສວນຂອງທ້າວ ສະຫວຽງ ແມ່ນຈະບໍ່ປູກພືດຊ້ຳເກົ່າ ແຕ່ຈະປູກພືດແບບໝູນວຽນ ປະສົມປະສານ ສະຫຼັບສັບປ່ຽນກັນໄປເລື້ອຍ ເພື່ອຮັກສາສະພາບດິນໃຫ້ມີຄວາມຍືນຍົງ ເຕັກນິກການປູກແມ່ນໄດ້ຮຽນຮູ້ດ້ວຍຕົນເອງ ພ້ອມທັງອາໄສປະສົບການທີ່ໄດ້ເຮັດມາຫຼາຍປີ ແລະ ຮຽນຮູ້ນຳຜູ້ທີ່ມີປະສົບການມາກ່ອນ.
ຜ່ານການປະກອບອາຊີບນີ້ມາໄດ້ 20 ກວ່າປີ ຖືວ່າເປັນອາຊີບຫຼັກຂອງຄອບຄົວ ຄຽງຄູ່ກັບການນຳຜົນຜະລິດຂອງຕົນເອງໄປຂາຍເອງແລ້ວ ແລະ ຄອບຄົວທ້າວ ສະຫວຽງ ຍັງໄດ້ເປັນຜູ້ຮັບຊື້ຜົນຜະລິດຈາກຊາວກະສິກອນຜູ້ອື່ນໆໄປຈຳໜ່າຍ ຕໍ່ ເພື່ອສ້າງລາຍຮັບເພີ່ມ ໂດຍລວມແລ້ວການປະກອບອາຊີບນີ້ສາມາດສ້າງລາຍຮັບໃຫ້ຄອບຄົວປີ ໜຶ່ງຫຼາຍສິບລ້ານກີບ ເຮັດໃຫ້ຊີວິດການເປັນຢູ່ຂອງຄອບຄົວມີຢູ່ມີກິນ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ ອັນທີ່ສຳຄັນສົ່ງເສີມລູກ 3 ຄົນ ໃຫ້ຮຽນຈົບວິຊາສະເພາະ ຊື້ສິ່ງອຳນວຍຄວາມສະດວກຮັບໃຊ້ພາຍໃນຄອບຄົວ ແລະ ມີເງິນເຫຼືອເກັບມ້ຽນໄວ້ໃຊ້ຈ່າຍເວລາຈຳເປັນຕື່ມອີກ.
ແຫລ່ງຂ່າວ: ວຽງຈັນໃໝ່