ຈາກສະຖານະການເດັກນ້ອຍຕິດເກມພົບວ່າ:ປັດໄຈທີ່ມີສ່ວນໃນການເພີ່ມຄວາມສ່ຽງໃຫ້ເດັກນ້ອຍມີໂອກາດຕິດເກມຄື:ການລ້ຽງດູຂອງຄອບຄົວ
ຊຶ່ງ“ພໍ່ແມ່”ມີບົດບາດຫນ້າທີ່ຫລັກໃນການອົບຮົມສັ່ງສອນເຖິງແມ່ນວ່າການໃຫ້ເດັກນ້ອຍໄດ້ເຕີບໃຫຍ່ຂຶ້ນມາເປັນຄົນດີແລະມີຄວາມຮັບຜິດຊອບຈະເປັນເປົ້າໝາຍຂອງການເບິ່ງແຍງລູກແຕ່ສິ່ງສຳຄັນທີ່ຈະຊ່ວຍໃຫ້ສາມາດໄປເຖິງເປົ້າໝາຍນັ້ນໄດ້ຢ່າງສົມບູນກໍຄື ການເປັນພໍ່ແມ່ທີ່ປະຕິບັດຢ່າງເໝາະສົມຊຶ່ງຈະຊ່ວຍສົ່ງເສີມແລະສ້າງພູມຄຸ້ມກັນໃຫ້ກັບລູກໄດ້ຂໍ້ສັງເກດ8ພໍ່ແມ່ກຸ່ມສ່ຽງທີ່ລູກມີໂອກາດຕິດເກມໂດຍມີລັກສະນະດັ່ງນີ້
1.ພໍ່ແມ່ຄາວຽກ
ພໍ່ແມ່ຄາວຽກຄື:ພໍ່ແມ່ທີ່“ຄິດຫລືອ້າງວ່າໂຕເອງຫຍຸ້ງ”ມີພາລະກິດເປັນຂອງໂຕເອງບໍ່ຢາກໃຫ້ລູກວົນ,ຂ້ອງແຄ່ງຂ້ອງຂາ,ຫລືຢູ່ໃກ້ຕົນເອງໂດຍຈະໃຊ້ອຸປະກອນITເຊັ່ນ:ເກມ,ສະມາດໂຟນIPadຫລືເອື້ອຍລ້ຽງເດັກນ້ອຍຕົນເອງຈະໄດ້ມີເວລາສ່ວນໂຕຫລາຍຍິ່ງຂຶ້ນ
2.ພໍ່ແມ່ທີ່ຮູ້ເທົ່າບໍ່ເຖິງການ
ພໍ່ແມ່ທີ່ຮູ້ເທົ່າບໍ່ເຖິງການມັກຈະເຂົ້າໃຈວ່າເດັກນ້ອຍຍຸກນີ້ຈຳເປັນທີ່ຈະຕ້ອງເທົ່າທັນເຕັກໂນໂລຊີເພາະເຮັດໃຫ້ທັນສະໄໝ,ສະຫລາດ,ຮຽນຮູ້ໄວ,ຊ່ວຍເພີ່ມສັກກະຍະພາບດ້ານໄອທີໃຫ້ກັບລູກຈາກທີ່ກ່າວມາຖືກພຽງສ່ວນຫນຶ່ງເທົ່ານັ້ນບໍ່ປະຕິເສດວ່າການທີ່ມີທັກສະດ້ານໄອທີນັ້ນເປັນສິ່ງຈຳເປັນແຕ່ສິ່ງທີ່ພໍ່ແມ່ຂາດຄວາມຮູ້ຕໍ່ເນື່ອງຄື:ຖ້າພໍ່ແມ່ບໍ່ເບິ່ງແຍງຫລືປ່ອຍລູກໃຫ້ໃຊ້ເວລາກັບເລື່ອງເຫລົ່ານີ້ຕັ້ງແຕ່ຍັງນ້ອຍໆ(ປະມານ6ເດືອນຫາ3ປີ)ຈະສົ່ງຜົນຮ້າຍກັບເດັກນ້ອຍເຮັດໃຫ້ພັດທະນາການດ້ານອື່ນໆຈະຊ້າລົງເຊັ່ນ:ເວົ້າຊ້າ,ກ້າມຊີ້ນມັດໃຫຍ່ມັດນ້ອຍເຕີບໃຫຍ່ຊ້າແລະທັກສະທາງສັງຄົມກໍຈະສູນເສຍໄປຖ້າເປັນເດັກນ້ອຍທີ່ເຂົ້າສູ່ໄວຮຽນບັນຫາທີ່ພົບຄື:ເດັກນ້ອຍຈະບໍ່ແບ່ງເວລາໃຫ້ກັບສິ່ງອື່ນເຊັ່ນ:ການຫລິ້ນ, ການຮຽນ,ການເຂົ້າສັງຄົມ
3. ພໍ່ແມ່ທີ່ຢ້ານອາລົມລູກ
ພໍ່ແມ່ທີ່ຢ້ານອາລົມລູກຄື:ພໍ່ແມ່ທີ່ບໍ່ກ້າປະຕິເສດເວລາລູກອາລະວາດ,ຫງຸດຫງິດຫລືຮ້ອງໃສ່ເມື່ອຖືກຢຶດເກມໂທລະສັບຫລືປິດຄອມພິວເຕີພໍ່ແມ່ກໍຈະຕົກໃຈຮ້ອນຮົນແລະເຮັດຫຍັງບໍ່ຖືກພໍ່ແມ່ປະເພດນີ້ຈະບໍ່ສາມາດຈັດການອາລົມຮ້າຍຂອງລູກໄດ້ບໍ່ຮູ້ຈະເຮັດແບບໃດຈົນພໍ່ແມ່ກາຍເປັນລູກໄກ່ໃນກຳມືຂອງລູກ
4.ພໍ່ແມ່ມັກໃຈອ່ອນ
ພໍ່ແມ່ມັກໃຈອ່ອນມັກຈະບໍ່ມັກຄວາມຂັດແຍ້ງ,ບໍ່ກ້າປະຕິເສດ,ບໍ່ຢາກເຮັດໃຫ້ຜິດຫວັງບໍ່ຢາກເຮັດໃຫ້ລູກເສຍໃຈຢ້ານລູກຮ້າຍພໍ່ແມ່ກຸ່ມນີ້ສ່ວນໃຫຍ່ເປັນພໍ່ແມ່ທີ່ເຮັດວຽກຫລາຍ ເຮັດໃຫ້ຕົນເອງເກີດຄວາມຮູ້ສຶກຜິດທີ່ບໍ່ຄ່ອຍໃຫ້ເວລາກັບລູກດັ່ງນັ້ນເວລາລູກຂໍຫຍັງກໍຈະໃຫ້ເພື່ອເປັນການທົດແທນ
5. ພໍ່ແມ່ທີ່ປ່ອຍປະລະເລີຍຄວາມສຳຄັນຂອງວິໄນ
ພໍ່ແມ່ທີ່ປ່ອຍປະລະເລີຍຄວາມສຳຄັນຂອງວິໄນອາດເພາະຕົນເອງບໍ່ມີວິໄນບໍ່ມີເວລາທີ່ຈະຖ່າຍທອດວິໄນຫລືບໍ່ຮູ້ຈະຖ່າຍທອດແບບໃດເພາະສະນັ້ນຈຶ່ງລ້ຽງລູກແບບຂາດວິໄນບໍ່ມີການຕັ້ງລະບຽບພາຍໃນເຮືອນບໍ່ເຝິກຄວາມຮັບຜິດຊອບບໍ່ນັ່ງໂອ້ລົມກັນໃນຄອບຄົວເພື່ອວາງກົດເກນເດັກນ້ອຍຈຶ່ງເຮັດຕາມໃຈຕົນເອງແລະຂາດຄວາມຮັບຜິດຊອບ
6.ພໍ່ແມ່ທີ່ຂັດແຍ້ງກັນເອງ
ພໍ່ແມ່ທີ່ຂັດແຍ້ງກັນເອງຄື:ພໍ່ແມ່ທີ່ຈັດການລູກຄົນລະແນວທາງຊຶ່ງລູກຈະເຊື່ອຄົົນທີ່ໃຫ້ປະໂຫຍດແກ່ຕົວເອງເຊັ່ນ:ຖ້າຄົນໃດຄົນໜຶ່ງໃຈອ່ອນລູກກໍຈະເຮັດຕາມກົດຄົນັ້ນ
7.ພໍ່ແມ່ທີ່ປ່ອຍປະລະເລີຍກິດຈະກຳໃນຄອບຄົວ
ພໍ່ແມ່ທີ່ປ່ອຍປະລະເລີຍກິດຈະກຳໃນຄອບຄົວຄື:ພໍ່ແມ່ທີ່ບໍ່ຮູ້ຈະຫາກິດຈະກຳຫຍັງທີ່ເຮັດຮ່ວມກັບລູກບໍ່ໃຫ້ຄວາມສຳຄັນໃນການເຮັດກິດຈະກຳທີ່ຈະເສີມສ້າງຄວາມສຳພັນໃນຄອບຄົວມັກພົບໃນຄອບຄົວລ້ຽງດ່ຽວຈຶ່ງບໍ່ຄ່ອຍມີຕົ້ນທຶນທາງສັງຄົມໃນມູມມອງຂອງກຸ່ມໝູ່ຫລືມີລູກໃນໄວດຽວກັນຊຶ່ງກິດຈະກຳທີ່ພໍ່ແມ່ປະເພດນີ້ພໍຈະຄິດອອກເຊັ່ນ:ສົ່ງລູກຮຽນພິເສດ,ຍ່າງທ່ຽວຫ້າງສັບພະສິນຄ້າ,ກິນເຂົ້ານອກເຮືອນເປັນຕົ້ນແຕ່ບໍ່ຂົນຂວາຍທີ່ຈະຫາກິດຈະກຳກາງແຈ້ງຊຶ່ງຖ້າພໍ່ແມ່ມີກຸ່ມໝູ່ຫລືມີລູກໃນໄວດຽວກັນກໍບໍ່ຍາກທີ່ຈະຫາກິດຈະກຳເຮັດລະຫວ່າງເດັກນ້ອຍເຊັ່ນ:ກິດຈະກຳຍ່າງປ່າ,ເບິ່ງນົກ,ຖ່າຍຮູບ,ປູກຕົ້ນໄມ້ ອ່ານຫນັງສື,ຂີ່ຈັກລົດຖີບຫລືຫລິ້ນເກມໝາກດ້າມກັບລູກໃນເຮືອນເປັນຕົ້ນ
8.ພໍ່ແມ່ທີ່ເອົາແຕ່ຈົ່ມ
ພໍ່ແມ່ທີ່ເອົາແຕ່ຈົ່ມຄື:ການຈົ່ມທີ່ມັກຕໍ່ທ້າຍດ້ວຍຄຳຕຳໜິການປະຊົດແຕ່ບໍ່ແກ້ໄຂຫລືປັບປ່ຽນພຶດຕິກຳລູກພຽງແຕ່ຈົ່ມແລະຍ່າງໜີໄປໂດຍພຶດຕິກຳກໍຈະເປັນຊ້ຳເຊັ່ນນີ້ໄປເລື່ອຍໆ ພໍ່ແມ່ປະເພດນີ້ຈະເວົ້າແຕ່ຂໍ້ເສຍຂອງເກມມັກບໍ່ຖາມເຖິງອາລົມຄວາມຮູ້ສຶກປ່ອຍປະລະເລີຍຄວາມເປັນຢູ່ຂອງລູກເອົາແຕ່ສົນໃຈສະເພາະເລື່ອງການຮຽນການອ່ານຫນັງສືແລະການມີວຽກບ້ານຈະໃຊ້ຄຳເວົ້າໃນລັກສະນະຈັບຜິດແລະດູຖູກຕົວຢ່າງ“ດຽວຈະເປີດໃຫ້ຫລິ້ນໝົດມື້ໝົດຄືນ”“ຄະແນນເດືອນນີ້ຈະເຖິງຮອດໃສ”ເປັນຕົ້ນຊຶ່ງໃຊ້ຄຳເວົ້າທີ່ບໍ່ສ້າງສັນ ເມື່ອເດັກນ້ອຍຟັງກໍຈະຮູ້ສຶກຕໍ່ຕ້ານບໍ່ຢາກເຮັດຕາມປຸກອາລົມເຮັດໃຫ້ຮ້າຍເຮັດໃຫ້ຮູ້ສຶກບໍ່ດີຕໍ່ໂຕເອງແລະຄົນເວົ້າ
ນອກຈາກ8ຂໍ້ຕ້ອງຫ້າມຂ້າງເທິງແລ້ວຍັງມີອີກ2ສິ່ງທີ່ພໍ່ແມ່ຄວນເຮັດຄືການສື່ສານແລະສ້າງຄຸນຄ່າຂອງໂຕເອງ
-ການສື່ສານພໍ່ແມ່ຄວນມີທັກສະການສື່ສານກັບລູກທີ່ດີໃນກຽດລູກ,ຟັງລູກ,ພະຍາຍາມດຶງລູກມາມີສ່ວນຮ່ວມໃນການສ້າງວິໄນແລະສ້າງຄວາມສຳພັນໃນຄອບຄົວ
-ການສ້າງSelf-Esteem(ສ້າງຄຸນຄ່າຂອງໂຕເອງ)ພໍ່ແມ່ຄວນໃຫ້ຄວາມສຳຄັນກັບເລື່ອງ “ຄວາມຮູ້ສຶກມີຄຸນຄ່າໃນຕົນເອງ”ເພື່ອໃຫ້ລູກຮູ້ສຶກວ່າຕົນເອງມີຄຸນຄ່າມີຄວາມສາມາດເຊັ່ນ:ເມື່ອພໍ່ແມ່ພາລູກເຮັດກິດຈະກຳລູກກໍຈະຄົ້ນພົບວ່າຕົນເອງເຮັດຫຍັງໄດ້ດີແລະຍິ່ງຖ້າປະສົບຄວາມສຳເລັດກໍຈະເກີດຄວາມພາກພູມໃຈແລະໝັ້ນໃຈຊຶ່ງພໍ່ແມ່ຄວນໃຫ້ຄຳຍ້ອງຍໍເປີດໂອກາດແລະສ້າງເວທີໃຫ້ລູກໄດ້ສະແດງອອກຈະເຮັດໃຫ້ເດັກນ້ອຍກຸ່ມນີ້ຫ່າງໄກຈາກການຕິດເກມອີກຢ່າງຊ່ວຍສ້າງພູມຄຸ້ມກັນກັບເດັກນ້ອຍແລະຄອບຄົວນໍາອີກ