ຂ່າວ: ບຸນທຽມ
ກອງປະຊຸມທົບທວນລະດັບພາກພື້ນອາຊີ-ເອີຣົບ ວ່າດ້ວຍການຈັດຕັ້ງປະຕິບັດງານອານມາຕີກ່ຽວກັບການຮ່ວມມືແກ້ໄຂບັນຫາສະເພາະ ແລະ ຄວາມຕ້ອງການພິເສດຂອງບັນດາປະເທດກຳລັງພັດທະນາທີ່ບໍ່ມີຊາຍແດນຕິດທະເລປິດລົງດ້ວຍສຳເລັດ ພ້ອມທັງຮັບຮອງເອົາຂໍ້ຕົກລົງວຽງຈັນ, ແຜນດຳເນີນງານ ແລະ ຂໍ້ສະເຫນີທີ່ຈະນຳໄປພິຈາລະນາໃນກອງປະຊຸມທົບທວນລະດັບສາກົນທີ່ຈະຈັດຂຶ້ນໃນປີ 2014.
ກອງປະຊຸມດັ່ງກ່າວປິດລົງໃນວັນທີ 7 ມີນາ 2013 ທີ່ໂຮງແຮມລາວພລາຊາ ນະຄອນຫລວງວຽງຈັນພາຍຫລັງໄດ້ດຳເນີນມາເປັນເວລາ 3 ວັນ ນັບແຕ່ວັນທີ 5-7 ມີນາ 2013 ໂດຍການເປັນປະທານຂອງ ທ່ານ ສົມມາດ ພົນເສນາ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ, ມີຄະນະກຳມາທິການເສດຖະກິດ–ສັງຄົມຂອງອົງການສະຫະປະຊາຊາດ (ສປຊ) ສຳລັບພາກພື້ນອາຊີ-ເອີຣົບ, ຜູ້ຕາງຫນ້າຈາກບັນດາປະເທດກຳລັງພັດທະນາທີ່ບໍ່ມີຊາຍແດນຕິດທະເລ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ຕະຫລອດວາລະກອງປະຊຸມຄະນະກຳມາທິການເສດຖະກິດ-ສັງຄົມ ສປຊ ສຳລັບພາກພື້ນອາຊີ-ປາຊິກຟິກ, ຄະນະກຳມາທິ ການເສດຖະກິດ ສປຊ ສຳລັບ ພາກພື້ນເອີຣົບ ແລະ ຫ້ອງການຜູ້ຕາງຫນ້າຂັ້ນສູງທີ່ຮັບຜິດຊອບກຸ່ມປະເທດດ້ອຍພັດທະນາ ທັງຫມົດ 147 ທ່ານ, ປະເທດທີ່ກຳລັງພັດທະນາທີ່ບໍ່ມີຊາຍແດນຕິດທະເລຈາກອາຊີ 8 ປະເທດ, ເອີຣົບ 2 ປະເທດ ແລະ ບັນດາປະເທດທາງຜ່ານເຫັນດີເປັນເອກະພາບກ່ຽວກັບບັນຫາສະເພາະ ແລະ ຄວາມຕ້ອງການພິເສດຂອງບັນດາປະເທດທີ່ກຳລັງພັດທະນາທີ່ບໍ່ມີຊາຍແດນຕິດທະເລຍັງບໍ່ທັນໄດ້ຖືກແກ້ໄຂໄປຫມົດເທື່ອ ແລະ ຍັງເປັນບັນຫາທີ່ອ່ອນໄຫວທີ່ຕ້ອງການໃຫ້ວົງຄະນາຍາດສາກົນສືບຕໍ່ໃຫ້ການຮ່ວມມື ແລະ ຊ່ວຍເຫລືອ ເພື່ອໃຫ້ບັນດາປະເທດເຫລົ່ານີ້ ສາມາດເຊື່ອມໂຍງເສດຖະກິດຂອງຕົນກັບຕະຫລາດໂລກໄດ້ຢ່າງມີປະສິດທິພາບ.
ວາລະທີ່ສຳຄັນກອງປະຊຸມທົບທວນລະດັບພາກພື້ນອາຊີ-ເອີຣົບ ວ່າດ້ວຍການຈັດຕັ້ງປະຕິບັດງານອານມາຕີ ກ່ຽວກັບການຮ່ວມມືແກ້ໄຂບັນຫາສະເພາະ ແລະ ຄວາມຕ້ອງການພິເສດຂອງບັນດາປະເທດກຳລັງພັດທະນາທີ່ບໍ່ມີຊາຍແດນຕິດທະເລ (LLDCS ) ໄດ້ຮັບຮອງເອົາຂໍ້ຕົກລົງວຽງຈັນ (Vientiane Consensus) ເຊິ່ງເປັນເອກະສານທີ່ ໄດ້ສັງລວມເອົາຜົນສຳເລັດການທົບທວນການຈັດຕັ້ງປະຕິບັດແຜນດຳເນີນງານອານມາຕີ ແລະ ຂໍ້ຄົງຄ້າຕ່າງໆ ໂດຍສະເພາະຂໍ້ສະເຫນີ ເພື່ອໃຫ້ມີການແກ້ໄຂບັນຫາຂອງປະເທດກຳລັງພັດທະນາທີ່ບໍ່ມີຊາຍແດນຕິດທະເລໃນອະ ນາຄົດລວມທັງການພັດທະນານະໂຍບາຍການຂົນສົ່ງຜ່ານແດນ, ການປັບປຸງລະບຽບກົດຫມາຍໃຫ້ມີຄວາມກົມກຽວກັນ ແລະ ອື່ນໆ ເຊິ່ງຈະໄດ້ນຳໄປສະເຫນີໃນກອງປະຊຸມທົບທວນລະດັບສາກົນທີ່ຈະຈັດຂຶ້ນໃນຕົ້ນປີ 2014 ແລະ ຈະໄດ້ມີການພິຈາລະນາຕົກລົງເອົາມາດຕະການລະດັບສາກົນສະບັບໃຫມ່ເພື່ອແກ້ໄຂບັນຫາສະເພາະ ແລະ ຄວາມຕ້ອງການພິເສດຂອງບັນດາປະເທດກຳລັງພັດທະນາທີ່ບໍ່ມີຊາຍແດນຕິດທະເລໃນອະນາຄົດ.
ທ່ານ ສະເຫລີມໄຊ ກົມມະສິດ, ເອກອັກຄະລັດຖະທູດລາວປະຈຳ ສປຊ ກ່າວວ່າ: ສປປ ລາວ ໃນຖານະເປັນປະທານກຸ່ມຈະຕ້ອງມີຄວາມພະຍາຍາມສູງໃນການເຄື່ອນໄຫວຊຸກຍູ້ເຮັດໃຫ້ສາກົນຮັບຮູ້ເຖິງຄວາມຕ້ອງການຂອງປະ ເທດຕ່າງໆ ລວມທັງ ສປປ ລາວ ເພື່ອດຶງດູດການຊ່ວຍເຫລືອບໍ່ວ່າດ້ານພື້ນຖານໂຄງລ່າງ, ເສັ້ນທາງຄົມມະນາຄົມ ແລະ ອື່ນໆ ເຖິງວ່າການປະຕິບັດແຜນດຳເນີນງານອານມາຕີ ຄົບ 10 ປີ ແລະ ກໍ່ມີຜົນສຳເລັດບາງດ້ານແຕ່ກໍ່ເຫັນ ວ່າຍັງມີຄວາມອ່ອນໄຫວ ແລະ ມີຂໍ້ຄົງຄ້າງ ເຊິ່ງຈຸດຄົງຄ້າງດັ່ງກ່າວເປັນອຸປະສັກໃນການນຳສົ່ງສິນຄ້າອອກສູ່ຕະຫລາດໂລກ, ບັນດາປະເທດທີ່ບໍ່ມີຊາຍແດນຕິດທະເລຍັງຕ້ອງການຄວາມຊ່ວຍເຫລືອຈາກສາກົນ.
ທີ່ມາhttp://www.ecom.org.la