ນະຄອນຫລວງວຽງຈັນ, ເປັນສູນກາງທາງດ້ານການເມືອງ ແລະ ເສດຖະ ກິດສຳຄັນຂອງປະເທດ, ເຊິ່ງໃນໄລຍະຫລາຍປີມານີ້, ນະຄອນຫລວງວຽງຈັນ ມີຈັງຫວະການຂະຫຍາຍຕົວທາງດ້ານເສດ ຖະກິດສູງຂຶ້ນເປັນລຳດັບ, ພື້ນຖານໂຄງ ລາງໄດ້ຮັບການພັດທະ ນາປັບປຸງດີຂຶ້ນ, ເຮັດໃຫ້ປະຊາຊົນມີລາຍຮັບຫລາຍຂຶ້ນ ແລະ ຄຽງຄູ່ກັບການຂະຫຍາຍຕົວຄືດັ່ງກ່າວຈຶ່ງກໍໃຫ້ເກີດບັນ ຫາສັບສົນຫລາຍ ຢ່າງຂອງ ຜູ້ດຳລົງຊີວິດຢູ່ໃນສັງຄົມຕ້ອງຜະເຊີນ ແລະ ໜຶ່ງໃນນັ້ນກໍແມ່ນ ສະພາບການສັນຈອນຕິດຂັດແອອັດທີ່ຮ້າຍແຮງຂຶ້ນນັບມື້.
ນັກຂ່າວພວກເຮົາໄດ້ສຳພາດທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງ ວຽງຈັນໃນວັນທີ 28 ເມສານີ້, ກ່ຽວກັບການແກ້ໄຂສະພາບການສັນຈອນແອອັດໃນຕົວເມືອງໂດຍທ່ານໃຫ້ທັດສະນະວ່າ: ປັດຈຸບັນ, ຢູ່ນະຄອນຫລວງວຽງຈັນມີພາຫະນະທີ່ຂຶ້ນທະບຽນແລ້ວປະມານ 650 ພັນກວ່າຄັນ, ໃນນັ້ນລົດໃຫຍ່ປະມານ 2 ແສນກວ່າຄັນ ແລະ ສະພາບການສັນຈອນເຫັນວ່າລົດຈະໄຫລ່ຈາກຊານເມືອງເຂົ້າມາຫາຕົວເມືອງເປັນສ່ວນຫລາຍ, ເນື່ອງ ຈາກວ່າບັນດາສຳນັກ ງານ, ອົງການ, ໂຮງຈັກໂຮງງານ, ຫົວໜ່ວຍທຸລະກິດ, ສະຖາບັນການສຶກສາ, ທະນາຄານ ແລະ
ສູນການຄ້າຕ່າງໆລ້ວນແຕ່ຕັ້ງຢູ່ໃນໃຈກາງຕົວເມືອງ, ຈຶ່ງເຮັດໃຫ້ສະພາບການສັນຈອນມີຄວາມແອອັດສັບສົນຫລາຍຄືດັ່ງ ພວກເຮົາພວມປະເຊີນຢູ່ໃນປັດຈຸບັນ, ໂດຍສະເພາະໃນຊ່ວງໄລຍະຊົ່ວໂມງເລັ່ງດ່ວນເຂົ້າວຽກ-ເລິກວຽກ ແລະ ປັດໄຈສຳຄັນທີ່ພາໃຫ້ເກີດສະພາບດັ່ງກ່າວມີຄື: ອັນທີ 1 ແມ່ນການຈອດລົດຊະຊາຍຕາມແຄມທາງ, 2 ນັກຂັບຂີ່ຈໍານວນ ໜຶ່ງຂາດມາລະຍາດໃນການຂັບຂີ່, 3 ຄວາມບໍ່ເປັນລະບຽບດ້ານສະຖານ ທີ່ຈອດລົດຕາມຈຸດຕ່າງໆເຊັ່ນ: ຫ້ອງການ, ບໍລິສັດຫ້າງຮ້ານ, ຕະຫລາດ, ໂຮງຮຽນ ແລະ 4 ແມ່ນລະບົບໄຟອຳນາດ-ປ້າຍສັນຈອນບໍ່ທັນຕອບສະໜອງຕໍ່ ການລະບາຍລົດທີ່ເພີ່ມຂຶ້ນ, ເຊິ່ງໄລຍະຜ່ານມາຂະແໜງການພວກເຮົາ ແລະ ພາກສ່ວນກ່ຽວຂ້ອງອື່ນໆກໍໄດ້ເ ອົາໃຈໃສ່ການແກ້ໄຂດ້ວຍຫລາຍຮູບການເຊັ່ນ: ຈັດສັນສະຖານທີ່ໃຫ້ບໍລິການຈອດລົດໃນຈຸດຕ່າງໆ ທີ່ເຫັນວ່າມີຄວາມເໝາະສົມ, ປະສານສົມທົບກັບເຈົ້າໜ້າທີ່ຈະລາຈອນລົງປະຕິບັດໜ້າທີ່ຊ່ວຍລະບາຍການ ສັນຈອນໃນເສັ້ນທາງຈຸດທີ່ມີຄວາມແອອັດເຊັ່ນ: ຕະຫລາດຂົວດິນ, ໄຟແດງທາດຫລວງ, ເສັ້ນທາງໂພນພະເນົາ, ໂພນທັນ, ໜອງດ້ວງ, ທົ່ງຂັນຄຳ, ສີບຸນເຮືອງ, ຄູວຽງ ແລະ ອື່ນໆ,
ພ້ອມທັງສຶກສາອົບຮົມຕັກເຕືອນ, ປັບໃໝຜູ້ຂັບຂີ່ທີ່ລະເມີດລະບຽບຕາມລຳດັບ, ແຕ່ກໍຍັງເຫັນວ່າສະພາບດັ່ງກ່າວນັ້ນບໍ່ມີທ່ຽງອ່ຽງຫລຸດຫລົງ, ເນື່ອງຈາກຫລາຍປັດໄຈທີ່ພາໃຫ້ພົບຄວາມຫຍຸ້ງຍາກເຊັ່ນ: ບັນຫາການເພີ່ມຂຶ້ນຂອງຈຳນວນພາຫະນະສະເລ່ຍປະ ມານ 15% ຕໍ່ປີ, ສະຖານທີ່ໃຫ້ບໍລິການຈອດລົດບໍ່ພຽງພໍຈຶ່ງພາໃຫ້ມີການຈອດລົດຊະຊາຍຕາມແຄມທາງຕາມໜ້າສຳນັກງານຕ່າງໆ ແລະ ການບໍ່ສາມາດປະຕິບັດລະບຽບຕໍ່ຜູ້ລະເມີດໄດ້ເດັດຂາດເທົ່າທີ່ຄວນ.
ທ່ານຫົວໜ້າພະແນກດັ່ງກ່າວໃຫ້ຮູ້ວ່າ: ບັນຫາການສັນຈອນແອອັດຢູ່ປະເທດເຮົາ, ນັບວ່າຍັງບໍ່ຮ້າຍແຮງປານໃດເມື່ອທຽບກັບບັນດາປະເທດໃກ້ຄຽງເຊັ່ນ: ປະເທດໄທ ແລະ ຫວຽດນາມ ທີ່ມີຄ່າສະເລ່ຍການເຄື່ອນຍ້າຍຂອງພາຫະນະໃນເວລາຕິດຂັດຮຸນແຮງໃນລະດັບ 5-7 ກິໂລແມັດຕໍ່ຊົ່ວໂມງ, ແຕ່ຢູ່ປະເທດເຮົາແມ່ນ18-25ກິໂລແມັດຕໍ່ຊົ່ວໂມງ, ກໍນັບວ່າຍັງຢູ່ໃນລະດັບປົກກະຕິ, ແຕ່ຜົນສະທ້ອນນີ້ແມ່ນບັນຫາທີ່ຍັງໃໝ່ຈຶ່ງເຮັດໃຫ້ນັກຂັບຂີ່ຈຳນວນບໍ່ໜ້ອຍຍັງບໍ່ທັນປັບສະພາບໄດ້ທັນ. ສຳລັບການແກ້ໄຂສະພາບການສັນຈອນແອອັດດັ່ງກ່າວໃນຕໍ່ໜ້ານີ້, ແມ່ນຈະສືບຕໍ່ກຳກົດ ແລະ ຈັດສັນບ່ອນຈອດລົດໃຫ້ມີຄວາມເປັນລະບຽບກວ່າເກົ່າ, ເພີ່ມທະວີການລົງໂຄສະນາເຜີຍແຜ່ລະບຽບການສັນຈອນຢູ່ຕາມສະຖາບັນການສຶກສາ, ໂຮງຈັກໂຮງງານເພື່ອປຸກຈິດສຳນຶກໃຫ້ນັກຮຽນ-ນັກສຶກສາກໍຄືມວນຊົນມີສະຕິຕື່ນຕົວເຄົາລົບກົດລະບຽບຈະລາຈອນສູງຂຶ້ນ, ທັງແນໃສຫລຸດຜ່ອນການເກີດອຸປະຕິເຫດບົນທ້ອງຖະໜົນອີກດ້ວຍ. ສ່ວນແຜນການແກ້ໄຂໄລຍະຍາວນັ້ນ, ກໍແມ່ນການວາງແຜນກໍ່ສ້າງບັນດາເສັ້ນທາງຄູ່ຂະໜານຈາກຕົວເມືອງຫາຊານເມືອງ ແລະ ສ້າງເສັ້ນທາງເຊື່ອມຕໍ່ລະຫວ່າງເສັ້ນທາງໃຫຍ່ກັບເສັ້ນທາງນ້ອຍເພື່ອຊ່ວຍກະຈາຍການສັນຈອນຂອງລົດເຂົ້າ-ອອກຕົວເມືອງ ໃຫ້ສະດວກໂລ່ງລຽນດີ.
ແຫລ່ງຂ່າວ: ລາວພັດທະນາ