ຈາກບົດລາຍງານວິໄຈສະພາບຊາວໜຸ່ມ ແລະ ເຍົາວະຊົນ ຢູ່ ສປປ ລາວ ໃຫ້ຮູ້ວ່າ: ເປັນທີ່ຮັບຮູ້ກັນແລ້ວວ່າ ສປປ ລາວ ເປັນປະເທດໜຶ່ງທີ່ມີອັດຕາການດື່ມເຫຼົ້າ-ເບຍຫຼາຍທີ່ສຸດ ທັງກຸ່ມເພດຊາຍ ແລະ ເພດຍິງ, ຈາກຜົນການປະເມີນເຫຼົ້າ ແລະ ເບຍ ສູດທັກສະຊີວິດໄດ້ພົບເຫັນວ່າ 90% ຂອງນັກຮຽນຊັ້ນມັດທະຍົມປາຍ ເຄີຍດຶ່ມຫຼົ້າ ໃນນັ້ນຜູ້ຊາຍ 53% ແລະ ຜູ້ຍິງ 16% ແມ່ນເຄີຍເມົາເຫຼົ້າຮ້າຍແຮງ, ນອກຈາກນີ້ຍັງພົບພຶດຕິກຳສ່ຽງຫຼາຍຢ່າງທີ່ກ່ຽວພັນກັນ ເຊັ່ນ: ການດຶ່ມເຫຼົ້າ-ເບຍ, ສູບຢາ ແລະ ການມີເພດສຳພັນ. ທັດສະນະຄະຕິໃນການດຶ່ມເຫຼົ້າ-ເບຍ ໃນຄວາມເຂົ້າໃຈບັນຫາທີ່ເກີດຂຶ້ນໃນແຕ່ລະຂົງເຂດແມ່ນ: ກຸ່ມຄົນໃນເມືອງບໍ່ຄ່ອຍຄິດວ່າການດຶ່ມເຫຼົ້າເປັນບັນຫາ ເນື່ອງຈາກວ່າບັນຫາທີ່ເຂົາມີຄວາມກັງວົນໃຈກ່ວາ ແມ່ນການໃຊ້ຢາເສບຕິດ ແລະ ສ່ວນຢູ່ຊົນນະບົດພັດມີທັດສະນະວ່າ ການດື່ມເຫຼົ້າ-ເບຍເຮັດໃຫ້ມີຄວາມມ່ວນຊື່ນ ແລະ ຄຽງຄູ່ກັນນັ້ນ ແມ່ນການສະກັດກັ້ນ ແລະ ເຫດຜົນຕ່າງໆ ເພາະຢູ່ປະເທດເຮົາພັດບໍ່ໄດ້ກຳຈັດອາຍຸໃນການບໍ່ໃຫ້ດຶ່ມ.
ໃນຂະນະທີ່ການສູບຢານັ້ນ ກໍຖືວ່າເປັນເລື່ອງປົກກະຕິໃນຊົນນະບົດ ໄດ້ນຳໃຊ້ຢາສູບເພື່ອປ້ອງກັນຍຸງ, ສຳລັບຕົວເມືອງແມ່ນນຳໃຊ້ໜ້ອຍ ແລະ ການເສບຢາບ້າແມ່ນເປັນບັນຫາສຳຄັນ ເຖິງວ່າບໍ່ມີຂໍ້ມູນຈະແຈ້ງກ່ຽວກັບອັດຕາການນຳໃຊ້ຢາບ້າກໍ່ຕາມ, ບົດວິໄຈດັ່ງກ່າວຍັງໃຫ້ຮູ້ວ່າ: ການເສບຢາບ້າເປັນບັນຫາທີ່ພົ້ນເດັ່ນທີ່ສຸດໃນເຂດຕົວເມືອງ ແລະ ຊົນນະບົດ, ອິງຕາມການສຶກສາຂອງຊາວໜຸ່ມທີ່ຕິດຢາ ເຊິ່ງຈຸດເລີ່ມຕົ້ນແມ່ນມາຈາກການຊັກຊວນຂອງໝູ່ກວມ 92,5%.
ແຫລ່ງຂ່າວ: ລາວພັດທະນາ