ເປີດບໍລິການສັກຢາກັນພະຍາດ ໄຂ້ສະໝອງອັກເສບຍີ່ປຸ່ນ ໂດຍບໍ່ໄດ້ເສຍຄ່າ
ກະຊວງສາທາລະນະສຸກ ຮ່ວມກັບນະຄອນຫຼວງວຽງຈັນ ໄດ້ຈັດພິທີເປີດຂະບວນການສັກວັກຊິນກັນພະຍາດໄຂ້ສະໝອງອັກເສບ ຍີ່ປຸ່ນ ຂຶ້ນວັນທີ 1 ເມສາ 2015 ທີ່ຫໍວັດທະນະທຳແຫ່ງຊາດ ໂດຍເປັນປະທານຮ່ວມຂອງທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການກະຊວງສາທາລະນະສຸກ ແລະ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ເປັນກຽດເຂົ້າຮ່ວມຂອງທ່ານ ດຣ. ພັນຄຳ ວິພາວັນ ຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກີລາ ພ້ອມດ້ວຍທ່ານຜູ້ຕາງໜ້າກອງທຶນກາວີ ອົງການອະນາໄມໂລກ ອຸຍນີເຊບ ທູຕານຸທູດ ແລະ ຕາງໜ້າອົງການຈັດຕັ້ງສາກົນ ປະຈຳລາວ.
ທ່ານລັດຖະມົນຕີວ່າການກະຊວງສາທາລະນະສຸກ ໄດ້ກ່າວວ່າ: ການເປີດຂະບວນການສັກວັກຊິນກັນພະຍາດໄຂ້ອັກເສບສະໝອງຍີ່ປຸ່ນ ແມ່ນຈະໄດ້ເປີດຢູ່ໃນ 10 ແຂວງພາກກາງແລະ ພາກໃຕ້ ໂດຍເຊີນຊວນພໍ່ແມ່ປະຊາຊົນທຸກທົ່ວໜ້າ ຈົ່ງນຳພາລູກຫຼານຂອງຕົນ ນັບແຕ່ອາຍຸ 1 ຫາລຸ່ມ 15 ປີ ໄປຮັບບໍລິການສັກຢາກັນພະຍາດໄຂ້ສະໝອງອັກເສບຍີ່ປຸ່ນ ທີ່ໂຮງໝໍສຸກສາລາ ແລະ ນຳໜ່ວຍແພດທີ່ລົງມາສັກຢາໃນບ້ານຂອງທ່ານ ໃນລະຫວ່າງວັນທີ 20-30 ເມສາ 2015 ໂດຍບໍ່ໄດ້ເສຍຄ່າ ເພື່ອສ້າງເງື່ອນໄຂໃຫ້ ສປປ ລາວ ຫຼຸດຜ່ອນອັດຕາການເຈັບເປັນ ແລະ ເສຍຊີວິດຂອງເດັກນ້ອຍລົງເທື່ອລະກ້າວ ດ້ວຍຄວາມມຸ້ງຫວັງສູ້ຊົນໃຫ້ບັນລຸຄາດໝາຍສະຫັດສະວັດ ດ້ານການພັດທະນາ ແລະ ທັງເປັນການສ້າງຂະບວນການສະເຫຼີມສະຫຼອງ 2 ວັນປະຫວັດສາດຂອງຊາດ.
ພະຍາດໄຂ້ສະໝອງອັກເສບຍີ່ປຸ່ນ ແມ່ນພະຍາດຊະນິດໜຶ່ງທີ່ຮ້າຍແຮງ ເກີດຈາກເຊື້ອຈຸລະໂຣກສະໝອງອັກເສບຍີ່ປຸ່ນ ເຊິ່ງໄດ້ຄົ້ນພົບຢູ່ ສປປ ລາວ ໂດຍນັກວິທະຍາສາດຍີ່ປຸ່ນ ໃນປີ 1950 ເປັນຕົ້ນມາ ພະຍາດດັ່ງກ່າວແມ່ນຕິດຕໍ່ມາຈາກຍຸງ ເຊື້ອດັ່ງກ່າວອາໄສຢູ່ນຳໝູ ແລະ ຢູ່ນຳນົກທຳມະຊາດ ເຊື້ອນີ້ໄດ້ຕິດມາໃສ່ຄົນໂດຍຍຸງ ເຊິ່ງໃນລາວ ແມ່ນມີການລະບາດຢູ່ຫຼາຍແຂວງພາກເໜືອ ແລະ ຂະຫຍາຍແຜ່ລາມມາຍັງແຂວງພາກກາງ ແລະ ພາກໃຕ້ຢ່າງຕໍ່ເນື່ອງ ພະຍາດນີ້ເຂົ້າໄປທຳລາຍໂດຍກົງ ຕໍ່ເນື້ອສະໝອງຂອງຄົນໃນທຸກກຸ່ມອາຍຸ ແລະ ອັນຕະລາຍທີ່ສຸດແມ່ນໃນກຸ່ມອາຍຸ 15 ປີລົງມາ ຜູ້ເປັນພະຍາດນີ້ແມ່ນບໍ່ສາມາດປິ່ນປົວໃຫ້ຫາຍຂາດໄດ້ ໃນນັ້ນ 30% ຂອງຜູ້ເປັນພະຍາດ ຈະເສຍຊີວິດ ແລະ 70% ຈະລອດຊີວິດ ແຕ່ມີການພິການທາງດ້ານສະໝອງ ແລະ ຮ່າງກາຍບາງສ່ວນ ເຊິ່ງການປ້ອງກັນທີ່ມີປະສິດທິຜົນທີ່ສຸດ ແມ່ນການສັກຢາກັນພະຍາດນີ້ເທົ່ານັ້ນ ປັດຈຸບັນສາມາດຜະລິດວັກຊິນທີ່ມີປະສິດທິຜົນສູງ ອອກມາສັກໃຫ້ລູກຫຼານ ເພື່ອໃຫ້ເຂົາເຈົ້າໄດ້ມີພູມຕ້ານທານຕໍ່ພະຍາດ ແລະ ສາມາດຄຸ້ມກັນໄດ້ຕະຫຼອດຊີວິດ.
ສຳລັບປີນີ້ແມ່ນໄດ້ວາງເປົ້າໝາຍ ບໍລິການສັກຢາໃນອາຍຸ 1 ປີ ຫາລຸ່ມ 15 ປີ ໃນ 10 ແຂວງ ທັງໝົດ 1.468.000 ຄົນ.
ແຫລ່ງຂ່າວ: ວຽງຈັນໃໝ່