ຫ້ອງນອນຄືຫ້ອງທີ່ຕ້ອງການບັນຍາກາດອັນປອດໂປ່ງເພື່ອຊ່ວຍສ້າງຄວາມຮູ້ສຶກຜ່ອນຄາຍໃຫ້ກັບການພັກອາໄສແຕ່ສຳລັບຫ້ອງນອນຫລາຍໆເຮືອນອາດຈະປົກຄຸມໄປດ້ວຍກິ່ນອັບຂອງສົບໝອນ,ຜ້າຫົ່ມແລະຜ້າປູບ່ອນຊຶ່ງບໍ່ໄດ້ຮັບການເບິ່ງແຍງເອົາໃຈໃສ່ມາດົນ ສົ່ງຜົນໃຫ້ຝຸ່ນລະອອງສິ່ງສົກກະປົກແລະຄາບເຫື່ອຂອງເຮົາສະສົມຢູ່ຕາມເນື້ອຜ້າແບບບໍ່ຮູ້ໂຕ
ເຊັ່ນດຽວກັນກັບຫ້ອງນອນທີ່ມີລູກນ້ອຍເຂົ້າມາເປັນສ່ວນປະກອບຂອງຄອບຄົວແມ່ຫລາຍຄົນເຄີຍພົບປະສົບການລູກນ້ອຍຍ່ຽວໃສ່ບ່ອນນອນຢູ່ເລື້ອຍໆກິ່ນຍ່ຽວອາດຈະຕິດສະສົມແມ່ນຈະພະຍາຍາມເຮັດຄວາມສະອາດເທົ່າໃດກໍ່ບໍ່ໝົດຈົນເຮັດໃຫ້ບາງເທື່ອຕ້ອງປ່ຽນຜ້າປູບ່ອນນອນຂອງລູກນ້ອຍໃໝ່ແຕ່ຜືນເກົ່າຍັງສາມາດໃຊ້ງານໄດ້ຢູ່ກ່ອນການເຮັດຄວາມສະອາດເຫລົ່ານີ້ຈະກາຍເປັນເລື່ອງໜ້າເຈັບຫົວເຮົາລອງມາຫາທາງອອກດີໆທີ່ແມ່ຫລາຍຄົນຍັງບໍ່ຮູ້ຈາກເຄັດລັບຕໍ່ໄປນີ້ກັນດີກວ່າ
ການໃຊ້ນ້ຳສົ້ມສາຍຊູແລະເບກກິງໂຊດາຫລືແປ້ງຝຸ່ນເດັກນ້ອຍກຳຈັດກິ່ນ
ຫລັງຈາກທີ່ພົບວ່າລູກນ້ອຍຍ່ຽວໃສ່ບ່ອນນອນແບບສົດໆຮ້ອນໆຄວນເຮັດຄວາມສະອາດໃນທັນທີເພື່ອປ້ອງກັນບໍ່ໃຫ້ຍ່ຽວຊຶມເລິກເຂົ້າໄປເຖິງຊັ້ນໃນບ່ອນນອນຫລັກການງ່າຍໆ ພຽງແຕ່ນຳເອົາຜ້າເຊັດໂຕໜາໆຜືນທີ່ບໍ່ໃຊ້ແລ້ວມາຮອງຊັບເອົາໄວ້ບໍລິເວນນັ້ນພ້ອມຮອງອີກ1ຊັ້ນດ້ວຍເຈ້ຍອານາໄມແບບໜາເປັນການປ້ອງກັນເບື້ອງຕົ້ນເພື່ອໃຫ້ບ່ອນນອນບໍ່ປຽກຈົນເກີນໄປຫລັງຈາກເຊັດຄາບຍ່ຽວອອກໄປໄດ້ແລ້ວບາງສ່ວນໃຫ້ໃຊ້ຜ້າຂົນໜູຜືນ ໃໝ່ຈຸ່ມນ້ຳໝາດໆວາງທັບລົງໄປທີ່ຮອຍຄາບເທນ້ຳລ້າສະອາດລົງໄປເທື່ອລະນ້ອຍ ແນະນຳວ່າໃຫ້ເລືອກໃຊ້ເປັນນ້ຳອຸ່ນເພື່ອຂ້າເຊື້ອໄປໃນໂຕຈາກນັ້ນຄ່ອຍໆກົດເຊັດຄາບເຫລືອງທີ່ປາກົດອອກໄປໃຫ້ໄດ້ຫລາຍທີ່ສຸດຕາມດ້ວຍການສີດນ້ຳສົ້ມສາຍຊູສີດພົມລົງໄປໃຫ້ທົ່ວ(ໃຊ້ຟອກກີ້ໃນການສີດ)ອາດຈະປະສົມນ້ຳໜ້ອຍໜຶ່ງຖິ້ມເອົາໄວ້ໄລຍະໜຶ່ງ ຈາກນັ້ນໂຮຍດ້ວຍແປ້ງຝຸ່ນທາໂຕຂອງລູກນ້ອຍຊຶ່ງມີສ່ວນໃນການຊ່ວຍດູດຊັບນ້ຳແລະມີກິ່ນຫອມບາງຄົນອາດຈະໃຊ້ເບກກິງໂຊດາໂຮຍໄປໃຫ້ທົ່ວເປັນການກຳຈັດກິ່ນແລະຂ້າເຊື້ອໄປໃນໂຕ
ຫລັງຈາກສຳເລັດຂະບວນການດັ່ງກ່າວຂ້າງຕົ້ນໃຫ້ຖິ້ມຜ້າປູບ່ອນນອນຫລືສ່ວນຂອງຜ້າທີ່ຖືກຍ່ຽວລູກນ້ອຍເອົາໄວ້2-3ຊົ່ວໂມງຖ້າມີກິ່ນຮຸນແຮງໃຫ້ຖິ້ມໄວ້ຂ້າມມື້ກ່ອນນຳມາຊັກແລະຂັດຖູບໍລິເວນນັ້ນໆໃຫ້ສະອາດໝົດນຳໄປຕາກແດດໃຫ້ແຫ້ງ
ພຽງເທົ່ານີ້ກິ່ນອັນບໍ່ປະສົງກໍຈະຈາງຫາຍໄປຖ້າກິ່ນຍັງຢູ່ນຳເລັກໜ້ອຍໃຫ້ເປີດປ່ອງຢ້ຽມໃນໄລຍະຕອນສວາຍຮັບແສງເພື່ອກຳຈັດເຊື້ອພະຍາດບໍ່ດົນບ່ອນນອນຂອງລູກກໍຈະກັບມາຫອມແລະໃຊ້ງານໄດ້ຕໍ່ໄປແລ້ວ