ທ່ານ ເຣວັດ ສຸວັນນະກິດຕິ ຮອງຜູ້ອຳນວຍການບໍລິສັດ ໄຊຍະບູລີພາວເວີ ຈຳກັດ ໄດ້ໃຫ້ຮູ້ໃນໂອກາດທີ່ ທ່ານ ວິລະພົນ
ວິຣະວົງ ລັດຖະມົນຕີຊ່ວຍວ່າການ ກະຊວງພະລັງງານ ແລະ ບໍ່ແຮ່ ພ້ອມຄະນະໄດ້ລົງຢ້ຽມຢາມ ແລະ ຕິດຕາມຄວາມ
ຄືບໜ້າຂອງການກໍ່ສ້າງໂຄງການໄຟຟ້າພະລັງນ້ຳໄຊຍະບູລີ ໃນວັນທີ 29 ທັນວາ 2014 ຜ່ານມານີ້.
ໂຄງການໄຟຟ້າພະລັງນ້ຳໄຊຍະບູລີ ມີທີ່ຕັ້ງຢູ່ເມືອງ ແລະ ແຂວງໄຊຍະບູລີ ໄດ້ເລີ່ມລົງມືກໍ່ສ້າງມາແຕ່ປີ 2012 ເປັນຕົ້ນ
ມາ ແລະ ມາຮອດປັດຈຸບັນ ໜ້າວຽກລວມມີຄວາມຄືບໜ້າສຳເລັດແລ້ວປະມານ 40% ພາຍຫຼັງສຳເລັດການກໍ່ສ້າງຕົວ
ເຂື່ອນຝັ່ງເບື້ອງຂວາ ແລະ ກາງເດືອນມັງກອນ 2015 ທີ່ຈະມາເຖິງນີ້ ທາງໂຄງການຈະໄດ້ມີການອ່ວຍແລວນ້ຳຂອງມາ
ເບື້ອງຝັ່ງຂວາທີ່ກໍ່ສ້າງສຳເລັດແລ້ວ ແລະ ຈະເລີ່ມລົງມືກໍ່ສ້າງຕົວເຂື່ອນຝັ່ງເບື້ອງຊ້າຍ ເຊິ່ງໂຄງການດັ່ງກ່າວມີມູນຄ່າ
ຫຼາຍກວ່າ 3 ຕື້ໂດລາສະຫະລັດ ແລະ ການກໍ່ສ້າງຈະໃຫ້ສຳເລັດພາຍໃນປີ 2019 ໂຄງການມີ 8 ເຄື່ອງຈັກ ມີກຳລັງການຜະ
ລິດໄຟຟ້າ 1.280 ເມກາວັດ ໃນນັ້ນ ຮັບໃຊ້ພາຍໃນ 60 ເມກາວັດ ທີ່ເຫຼືອນັ້ນສົ່ງຂາຍໃຫ້ໄທ ໂຄງການເກີດຂຶ້ນຈາກການ
ຮ່ວມຮຸ້ນຫຼາຍພາກສ່ວນ ທັງພາຍໃນ ແລະ ຕ່າງປະເທດຄື: ລັດຖະບານລາວຖືຮຸ້ນ 20% ນັກທຸລະກິດລາວຖືຮຸ້ນ 5% ແລະ
ບໍລິສັດພາຍໃນປະເທດໄທຖືຮຸ້ນ 75% ການກໍ່ສ້າງແມ່ນປະຕິບັດຕະຫຼອດ 24 ຊົ່ວໂມງ ມີແຮງງານເຮັດວຽກທັງໝົດ
9.000 ຫາ 10.000 ຄົນ ໃນນັ້ນ ມີແຮງງານລາວກວມເອົາ 60% ອັນໄດ້ສ້າງວຽກເຮັດງານທຳ ສ້າງລາຍຮັບໃຫ້ແກ່ແຮງ
ງານລາວເປັນຈຳນວນຫຼວງຫຼາຍພໍສົມຄວນ.
ໂຄງການໄຟຟ້າພະລັງນ້ຳໄຊຍະບູລີ ເປັນໂຄງການໄຟຟ້າພະລັງນ້ຳແບບນ້ຳໄຫຼຜ່ານ ທີ່ບໍ່ມີການເກັບກັກນ້ຳ ດັ່ງນັ້ນ
ຄວາມຈຳເປັນໃນການອົບພະຍົບປະຊາຊົນອອກຈາກພື້ນທີ່ໂຄງການ ຈຶ່ງມີຈຳນວນບໍ່ຫຼາຍ ເມື່ອທຽບກັບເຂື່ອນທີ່ມີອ່າງ
ເກັບນ້ຳຂະໜາດໃຫຍ່ ໂດຍມີປະຊາຊົນພຽງແຕ່ 458 ຄອບຄົວ ຈາກ 19 ບ້ານທີ່ຢູ່ແຄມສອງຝັ່ງຂອງ ລະຫວ່າງແຂວງໄຊ
ຍະບູລີ ແລະ ແຂວງຫຼວງພະບາງ ໃນຈຳນວນນີ້ 15 ບ້ານຈະໄດ້ຮັບຜົນກະທົບຈາກລະດັບນ້ຳທີ່ສູງຂຶ້ນ ແລະ ອີກ 4 ບ້ານທີ່
ຢູ່ບໍລິເວນພື້ນທີ່ກໍ່ສ້າງ ເຊິ່ງຕ້ອງຍ້າຍບ້ານເຮືອນໄປຍັງພື້ນທີ່ຈັດສັນໃຫ້ໃໝ່ໃນບໍລິເວນໃກ້ ຄຽງ ປະຊາຊົນບັນດາຄອບ
ຄົວດັ່ງກ່າວ ແມ່ນໄດ້ຮັບການຊ່ວຍເຫຼືອຈາກໂຄງການເປັນຢ່າງດີ ອັນໄດ້ເຮັດໃຫ້ຊີວິດການເປັນຢູ່ ກໍ່ຄືຄຸນະພາບຊີວິດດີ
ຂຶ້ນ ຜູ້ໄດ້ຮັບຜົນກະທົບໄດ້ຮັບການຊົດເຊີຍ ແລະ ຊ່ວຍເຫຼືອດ້ານຕ່າງໆ.
ຜົນປະໂຫຍດທີ່ຈະໄດ້ຮັບແມ່ນເປັນຈຳນວນຫຼວງຫຼາຍ ພາຍຫຼັງທີ່ໂຄງການສ້າງສຳເລັດຄື: ປະຊາຊົນລາວ ແລະ ປະຊາຊົນ
ໃນພາກພື້ນເຂດແມ່ນ້ຳຂອງຕອນລຸ່ມ ຈະໄດ້ຮັບການພັດທະນາລຸ່ມແມ່ນ້ຳຂອງ ເປັນຕົ້ນການໃຊ້ນ້ຳໃຫ້ເກີດປະໂຫຍດ
ສູງສຸດ ການຜະລິດໄຟຟ້າທີ່ໝັ້ນຄົງ ຄຸນະພາບດີ ແລະ ລາຄາຖືກ ກາຍເປັນຮາກຖານຂອງການພັດທະນາເສດຖະກິດ
ແບບມະຫາພາກ ການພັດທະນາສັງຄົມໃຫ້ປະຊາຊົນມີຄວາມເປັນຢູ່ດີຂຶ້ນ ການສ້າງຄວາມຮ່ວມມືລະຫວ່າງປະເທດໃນ
ພາກພື້ນ ການຊ່ວຍລົດສະພາວະໂລກຮ້ອນ ເພາະບໍ່ມີການປ່ອຍກ໊າສກາໂບນິກສູ່ຊັ້ນບັນຍາກາດຂອງໂລກ ນອກນີ້ ລັດ
ຖະບານລາວ ຍັງຈະໄດ້ຮັບຜົນປະໂຫຍດຈາກໂຄງການຕະຫຼອດໄລຍະສຳປະທານ 29 ປີຄື: ໄດ້ຈາກອາກອນກຳໄລຄ່າພາກ
ຫຼວງ ແລະ ໄດ້ຈາກເງິນປັນຜົນທີ່ລັດຖະບານຖືຮຸ້ນ 20% ໂດຍລວມແລ້ວ ໂຄງການດັ່ງກ່າວໄດ້ສ້າງຜົນປະໂຫຍດທາງກົງ
ແລະ ທາງອ້ອມໃຫ້ແກ່ ສປປ ລາວ ເປັນຈຳນວນມະຫາສານ.
ແຫລ່ງຂ່າວ: ວຽງຈັນໃໝ່