ເສັ້ນທາງຊຳໃຕ້-ທ່າເຫຼົ້າ ເປັນເສັ້ນທາງຫຼວງຂອງເມືອງຊຳໃຕ້ ແຂວງຫົວພັນທີ່ນອນຢູ່ໃນແຜນພັດທະນາເສດຖະກິດ
-ສັງຄົມ ເພື່ອເປັນການພັດ ທະນາພື້ນຖານໂຄງລ່າງສ້າງເງື່ອນໄຂ ອຳນວຍຄວາມສະດວກໃຫ້ແກ່ການໄປມາຂອງປະຊາ
ຊົນເປັນຕົ້ນແມ່ນ ຂົນສົ່ງ ສິນຄ້າທັງພາຍໃນ ແລະ ອອກສູ່ປະເທດໃກ້ຄຽງສະນັ້ນ ລັດຖະບານຈິ່ງຈົກເງິນເກືອບ 400 ຕື້
ສ້າງເສັ້ນທາງດັ່ງກ່າວ.
ພິທີເຊັນສັນຍາໂຄງການກໍ່ສ້າງທາງຊຳໃຕ້-ທ່າເຫຼົ້າ ລະຫວ່າງກົມຂົວທາງກັບບໍລິສັດທີ່ປຶກສາໄດ້ຈັດຂຶ້ນ ໃນວັນທີ 27 ທັນ
ວາຜ່ານມາ ໂດຍການຮ່ວມລົງນາມຂອງທ່ານ ເລົາຄຳ ສົມເພັດ ຫົວໜ້າກົມຂົວທາງ ແລະ ທ່ານ ແສງທະວີໃສ ມາລີວັນ
ອຳນວຍການທີ່ປຶກສາລັດວິສາຫະກິດວິສາວະກຳຄົມມະນາຄົມ ( LTEC ) ກັບທ່ານ ຫວຽນ ມິນຖັງ ຮອງຜູ້ອຳນວຍການ
ບໍລິສັດສຳຫຼວດອອກແບບ ( TEDI ) ແລະ ເຊັນສັນຍາລະຫວ່າງກົມຂົວທາງກັບບໍລິສັດຜູ້ຮັບເໝົາກໍ່ສ້າງທ່ານ ສົມຫວັງ
ວົງວິໄລ ຜູ້ອຳນວຍການບໍລິສັດຈິດຈະເລີນກໍ່ສ້າງ ຈຳກັດ ຊຶ່ງພາຍໃຕ້ການເຂົ້າຮ່ວມຂອງ ທ່ານ ດຣ. ບຸນຈັນ ສິນທະວົງ
ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ, ທ່ານ ດຣ. ຈັນແສງ ພິມມະວົງ ຮອງເຈົ້າແຂວງໆຫົວພັນ ພ້ອມ
ດ້ວຍຜູ້ຕາງໜ້າຈາກບັນດາກະຊວງ, ຂະແໜງການ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ເລົາຄຳ ສົມເພັດ ຫົວໜ້າກົມຂົວທາງກະຊວງໂຍທາທິການ ແລະ ຂົນ ສົ່ງ(ຍທຂ) ກ່າວວ່າ: ເສັ້ນທາງຊຳໃຕ້-ທ່າເຫຼົ້າ
ເປັນເສັ້ນທາງຫຼວງຂອງແຂວງຫົວພັນ ເລກທີ 3206 ເລີ່ມຕົ້ນຈາກເທສະບານເມືອງຊຳໃຕ້ຫາບ້ານທ່າເຫຼົ້າ ເມືອງຊຳໃຕ້
ແຂວງຫົວພັນຕິດຈອດກັບຊາຍແດນລາວ-ຫວຽດນາມຫຼັກໝາຍຊາຍແດນເລກທີ 353 ຕິດກັບບ້ານແຄ້ວ ເມືອງ
ເທືອງເຊິນ ແຂວງແທັງຮວາ ສສ ຫວຽດນາມ ເສັ້ນທາງດັ່ງກ່າວໄດ້ຜ່ານ 19 ໝູ່ບ້ານມີ 929 ຄອບຄົວພົນລະເມືອງທັງ
ໝົດ 5.733 ຄົນ ພາຍຫຼັງສຳເລັດການເຊັນສັນຍາເງິນກູ້ລະຫວ່າງກະຊວງການເງິນຂອງລາວ ກັບທະນາຄານ ເພື່ອການ
ລົງທຶນ ແລະ ພັດທະນາແຫ່ງ ສສ ຫວຽດນາມໃນວັນທີ 20 ມິຖຸນາ 2014, ກົມຂົວ ທາງໄດ້ວ່າຈ້າງບໍລິສັດທີ່ປຶກສາ LTEC
ຮ່ວມກັບ TEDI ດຳເນີນການສຳຫຼວດ ແລະ ອອກແບບ ໂດຍຍົກລະດັບໃຫ້ເປັນເສັ້ນທາງຊັ້ນ IV ເຂດພູດອຍ, ປູຢາງ
2 ຊັ້ນ ຍາວ 67 ກິໂລແມັດ, ໜ້າທາງກວ້າງ 7 ແມັດ, ຂົວ 7 ແຫ່ງຍາວ 373 ແມັດ, ພ້ອມດ້ວຍອາຄານດ່ານນ້ອຍຢູ່ບ້ານ
ທ່າເຫຼົ້າ.
ເພື່ອຈັດຕັ້ງປະຕິບັດໂຄງການໃນຂັ້ນຕໍ່ໄປກົມຂົວທາງກະຊວງ ຍທຂ ຈະໄດ້ວ່າຈ້າງບໍລິສັດ ທີ່ປຶກສາ LTEC ຮ່ວມກັບບໍ
ລິສັດທີ່ປຶກສາ TEDI ຈາກ ສສ ຫວຽດນາມເປັນທີ່ປຶກສາໂຄງການສຳລັບຄວບຄຸມການກໍ່ສ້າງມູນຄ່າ 13,45 ຕື້ກວ່າ
ກີບ ຫຼື ປະມານ 1,68 ລ້ານກວ່າ ໂດລາສະຫະລັດ ແລະ ຈະໄດ້ວ່າຈ້າງບໍລິສັດຈິດຈະເລີນກໍ່ສ້າງ ຈຳກັດ ເປັນຜູ້ຮັບເໝົາກໍ່
ສ້າງດ້ວຍມູນຄ່າ 396 ຕື້ກວ່າໃນກຳນົດການກໍ່ສ້າງທັງໝົດ 36 ເດືອນ ໂດຍຈະເລີ່ມກໍ່ສ້າງໃນເດືອນມັງກອນ 2015
ແລະ ຄາດຄະເນຈະໃຫ້ສຳເລັດໃນປີ 2018.
ແຫລ່ງຂ່າວ: ເສດຖະກິດ - ສັງຄົມ