ລັດຖະບານສະເໜີລົບລ້າງພາສີປະຈຳເຂດຢູ່ທ້ອງຖິ່ນທີ່ມີຢູ່ປະຈຸ ບັນ ໃຫ້ຍັງເຫຼືອພຽງແຕ່ດ່ານພາສີຊາຍແດນທີ່ຂຶ້ນ
ໂດຍກົງກັບກົມພາສີ ກະຊວງການເງິນ ທັງນີ້ ກໍເພື່ອເປັນການກະກຽມເຂົ້າປະຊາຄົມເສດຖະກິດອາຊຽນ ແນໃສ່ອຳ
ນວຍຄວາມສະດວກດ້ານການຄ້າ, ການນຳເຂົ້າ-ສົ່ງອອກສິນຄ້າ ແລະ ການສົ່ງຜ່ານແດນໃຫ້ສອດຄ່ອງກັບຫຼັກການ
ຄຸ້ມຄອງລວມສູນດ້ານ ງົບປະມານທີ່ເປັນເອກະພາບແຕ່ສູນກາງຮອດທ້ອງຖີ່ນ ຂະນະທີ່ການສະເໜີປັບປຸງດັ່ງກ່າວ
ຖືກເຫັນດີຮັບຮອງຈາກບັນດາ ສະມາຊິກສະພາແຫ່ງຊາດແລ້ວ.
ເຊົ້າວັນທີ 24 ທັນວາ 2014 ທ່ານ ດຣ. ລຽນ ທິແກ້ວ ລັດຖະມົນຕີວ່າການກະຊວງການເງິນໄດ້ນຳຮ່າງກົດໝາຍ ວ່າ
ດ້ວຍພາສີສະບັບປັບປຸງສະເໜີຕໍ່ກອງປະຊຸມສະພາ ເພື່ອໃຫ້ບັນດາຕົວແທນປະຊາຊົນ ຫຼື ສສຊ ແຕ່ລະເຂດ ເລືອກ
ຕັ້ງທີ່ເຂົ້າຮ່ວມ ໄດ້ສຸມໃສ່ປະກອບ ຄວາມຄິດຄວາມເຫັນ ໃສ່ໃຫ້ມີເນື້ອໃນຄວາມ ໝາຍຄົບຖ້ວນ, ຮັດ ກຸມ ແລະ
ແທດເໝາະ ກັບສະພາບການພັດ ທະນາເສດຖະກິດ-ສັງຄົມໃນປະຈຸບັນ.
ກົດໝາຍ ວ່າດ້ວຍພາສີສະບັບປະຈຸບັນ ແມ່ນໄດ້ປະກາດໃຊ້ໃນປີ 2011 ປະກອບມີທັງໝົດ 17 ພາກ, 21 ໝວດ, 122
ມາດຕາ ແລະ ເນື້ອໃນທີ່ນຳມາປັບປຸງໃນຄັ້ງນີ້ປະກອບມີ 11 ມາດຕາ ຊຶ່ງໃນນັ້ນໄດ້ມີການຮ່າງເນື້ອໃນເພີ່ມເຂົ້າໃໝ່
2 ມາດ ຕາ ໂດຍສະເໜີຂໍດັດແປງໂຄງປະກອບ ການຈັດຕັ້ງຄຸ້ມຄອງບໍລິຫານລັດຖະ ການພາສີຈາກ 3 ຂັ້ນໃຫ້ເຫຼືອ
ພຽງ 2 ຂັ້ນຄື: ກົມພາສີ ແລະ ດ່ານພາສີຊາຍແດນ.
ທັງນີ້ ໄດ້ລົບລ້າງພາສີປະຈຳເຂດທີ່ແມ່ນການຈັດຕັ້ງຂອງກະຊວງຢູ່ ທ້ອງຖິ່ນແລ້ວເອົາສິດ, ໜ້າທີ່ສ່ວນໜຶ່ງມາໃຫ້
ກົມ ແລະ ເພີ່ມສ່ວນໃດໜຶ່ງໃຫ້ດ່ານພາສີຊາຍແດນຈັດຕັ້ງປະຕິບັດ ພ້ອມກັນນັ້ນ ກໍໄດ້ກຳນົດອົງການຄຸ້ມຄອງ
ວຽກງານພາສີລະຫວ່າງກະຊວງການເງິນ ກັບອົງການປົກຄອງທ້ອງຖິ່ນໃຫ້ແຈ້ງຕື່ມຕະຫຼອດຮອດມາດຕະການ,
ຮູບການທາງວິໄນຕໍ່ພະນັກງານ, ລັດຖະ ກອນ, ເຈົ້າໜ້າທີ່ພາສີທີ່ເຮັດວຽກຢູ່ໃນລັດຖະການພາສີໃຫ້ຈະແຈ້ງ ແລະ
ເຂັ້ມ ງວດຂຶ້ນຕື່ມ.
ໂດຍການປັບປຸງກົດໝາຍພາສີເທື່ອນີ້ທ່ານລັດຖະມົນຕີລະບຸວ່າ: ແມ່ນເພື່ອແນໃສ່ສ້າງສິ່ງເອື້ອອຳນວຍຄວາມສະ
ດວກທາງດ້ານການຄ້າ, ການນຳເຂົ້າ-ສົ່ງອອກ, ການສົ່ງຜ່ານແດນໃນການປະຕິບັດພັນທະຕໍ່ປະຊາຄົມເສດຖະກິດ
ອາຊຽນ ຫຼື AEC ໃນປີ 2015 ທີ່ຈະມາເຖິງນີ້ພ້ອມດຽວກັນນັ້ນກໍເປັນການສ້າງເງື່ອນໄຂໃຫ້ ກະຊວງການເງິນປະສານ
ສົມທົບການຈັດວາງຊັບຊ້ອນໝຸນວຽນ ພະນັກງານພາສີໃຫ້ທັນຕາມເວລາ ເພື່ອຮັບປະກັນຄວາມເປັນເຈົ້າການ
ຂອງລັດຖະບານໃນການຈັດສັນ ງົບປະມານຢ່າງຍຸຕິທຳ ແລະ ສົມເຫດສົມຜົນ.
ຂະນະທີ່ໃນຕອນທ່ຽງຂອງມື້ດຽວກັນຮ່າງກົດຫມາຍ ວ່າດ້ວຍພາສີສະບັບປັບປຸງໃໝ່ກໍໄດ້ຮັບການເຫັນດີຮັບຮອງ
ດ້ວຍ ສຽງສ່ວນຫຼາຍຈາກບັນດາສະມາຊິກສະພາແຫ່ງຊາດ.
ສຳລັບພາສີປະຈຳເຂດທີ່ມີຢູ່ປະຈຸບັນປະກອບມີທັງໝົດ 5 ເຂດຄື: ພາສີປະຈຳເຂດ I ມີແຂວງຫຼວງນ້ຳທາ, ບໍ່ແກ້ວ,
ຜົ້ງສາລີ, ອຸດົມໄຊ; ເຂດ II ຫຼວງພະບາງ, ຫົວພັນ, ຊຽງຂວາງ, ໄຊຍະບູລີ; ເຂດ III ສະຫວັນນະເຂດ, ຄຳມ່ວນ ແລະ
ແຂວງບໍລິຄຳໄຊ; ເຂດ IV ແຂວງຈຳປາສັກ, ສາລະວັນ, ເຊກອງ, ອັດຕະປື ສ່ວນພາສີປະຈຳເຂດ V ມີນະຄອນຫຼວງ
ແລະ ແຂວງວຽງຈັນ.
ແຫລ່ງຂ່າວ: ເສດຖະກິດ – ສັງຄົມ