ສະມາຊິກສະພາແຫ່ງຊາດ ສສຊ ເຂດເລືອກຕັ້ງຕ່າງໆໄດ້ເຫັນດີເປັນເອກະພາບຮັບຮອງເອົາກົດໝາຍ 2 ສະບັບດ້ວຍສຽງສ່ວນຫລາຍຄື: ຮ່າງກົດໝາຍວ່າດ້ວຍພາສີສະບັບປັບປຸງ. ກົດໝາຍດັ່ງກ່າວປະກອບມີ 17 ພາກ, 21 ໝວດ, 122 ມາດຕາ, ປັບປຸງຄັ້ງນີ້ປະກອບມີ 11 ມາດຕາ, ເພີ່ມເຂົ້າໃໝ່ 2 ມາດຕາ ແລະ ກົດໝາຍວ່າດ້ວຍການປິ່ນປົວສະບັບປັບປຸງ ກົດ ໝາຍດັ່ງກ່າວປະກອບມີ 10 ໝວດ, 78 ມາດຕາ. ໃນນັ້ນສ້າງໃໝ່ 1 ໝວດ, 19 ມາດຕາ ແລະ ປັບປຸງ 25 ມາດຕາ, ຕັດອອກ 6 ມາດຕາ, ຮັກສາໄວ້ຄືເກົ່າ 34 ມາດຕາ.ໃນກອງປະຊຸມສະໄໝສາມັນເທື່ອທີ່ 8 ຂອງສະພາແຫ່ງຊາດຊຸດທີ VII ໃນວັນທີ 24 ທັນວາ 2014 ພາຍໃຕ້ການເປັນປະທານຂອງທ່ານ ດຣ.ໄຊສົມພອນ ພົມວິຫານ ຮອງປະທານສະພາແຫ່ງຊາດ.
ໃນພາກເຊົ້າທ່ານ ດຣ.ລຽນ ທິແກ້ວ ລັດຖະມົນຕີວ່າການກະຊວງການເງິນໄດ້ສະເໜີວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍພາສີສະບັບເລກທີ 04/ສພຊ, ລົງວັນທີ 20 ທັນວາ 2011 ວ່າ: ການຈັດຕັ້ງຜັນຂະຫຍາຍກົດໝາຍສະບັບປັບປຸງຜ່ານມາໄດ້ເລັ່ງໃສ່ສ້າງອົງການບໍລິຫານ ແລະ ວິຊາການແຕ່ບໍ່ທັນມີລະບຽບການບໍລິຫານ ແລະ ຄຸ້ມຄອງພະນັກງານ, ລັດຖະກອນ ແລະ ພາລະກອນເຊັ່ນ: ການຈັດຕັ້ງພາສີເຂດພຽງແຕ່ເປັນການເຕົ້າໂຮມເອົາບັນດາການຈັດຕັ້ງພາສີແຂວງມາເປັນການຈັດຕັ້ງຢູ່ຮ່ວມກັນໃນເຂດໃດໜຶ່ງ, ເຖິງວ່າຈະກຳນົດ 13 ສິດ, ໜ້າທີ່ໃຫ້ປະຕິບັດແຕ່ລະບອບການພົວພັນກັບອົງການປົກຄອງທ້ອງຖິ່ນແມ່ນບໍ່ທັນກຳນົດອອກຢ່າງຈະແຈ້ງເທື່ອ, ບໍ່ທັນໄດ້ອອກເປັນດຳລັດກ່ຽວກັບລະບຽບການສະເພາະ ໃນການຄຸ້ມຄອງ ພາສີ ເຫັນວ່າຍັງບໍ່ທັນສອດຄ່ອງກັບຫລັກການຂອງສາກົນໃນການເຊື່ອມໂຍງເສດຖະກິດໃນພາກພື້ນ ແລະ ສາກົນ, ບັນດາຫລັກການສາກົນທີ່ ສປປ ລາວ ໄດ້ເຂົ້າເປັນພາຄີເປັນຕົ້ນ: ອົງການການຄ້າໂລກ, ອົງການພາສີໂລກ, ບັນດາປະເທດລຸ່ມແມ່ນ້ຳຂອງ, ອາຊຽນ ແລະ ອື່ນໆ.
ເພື່ອເຮັດໃຫ້ຂະແໜງການເງິນໂດຍສະເພາະໃນຂົງເຂດວຽກງານພາສີໃນການຫັນບັນດາລະບຽບການ ແລະ ຂັ້ນຕອນດຳເນີນງານຕ່າງໆໃຫ້ທັນສະໄໝເຊິ່ງ ສາມາດປະຕິບັດຂໍ້ຜູກພັນຕ່າງໆ. ພາຍໃນອາຊຽນ ແລະ ອົງການການຄ້າໂລກ ກໍຄືການຮັບຮອງເອົາບັນດາມາດຕະ ຖານຂອງອົງການພາສີໂລກໄດ້ຖືກຈັດຕັ້ງປະຕິ ບັດຢ່າງເປັນຮູບປະທຳ, ໄດ້ມີການປັບປຸງນິຕິກຳຕ່າງໆ. ພ້ອມດຽວກັນນີ້ກໍເພື່ອອຳນວຍຄວາມສະດວກທາງດ້ານພາສີ ແລະ ການຄ້າເຊິ່ງເປົ້າໝາຍຫລັກແມ່ນການແຈ້ງພາສີດ້ວຍລະບົບອັດໂຕໂນມັດ(ອາຊີກູດາ) ລວມທັງການພັດທະນາສ້າງຂີດຄວາມສາມາດໃຫ້ແກ່ເຈົ້າໜ້າທີ່ພາສີ ກໍຄືຜູ້ແຈ້ງພາສີໃຫ້ສາມາດດຳເນີນການຕາມລະບຽບກົດໝາຍກຳນົດ ເຊິ່ງໃນປີ 2013 ສາມາດຈັດຕັ້ງຜັນຂະຫຍາຍໄດ້ຢູ່ 11 ດ່ານພາສີສາກົນ, ໄດ້ມີການນຳໃຊ້ເຄື່ອງກວດກາດ້ວຍລະບົບສາຍແສງຢູ່ໃນ 9 ດ່ານພາສີ, ສາມາດສັງລວມຂໍ້ມູນຕ່າງໆຢູ່ກົມພາສີໂດຍກົງ, ພັດທະນາການຄຸ້ມຄອງການຈັດເກັບກຳຄ່າທຳນຽມ, ຄ່າພາສີ ແລະ ພັນທະອື່ນດວ້ຍລະບົບທັນສະໄໝລວມທັງການຊຳລະຄ່າພາສີດ້ວຍບັດ Smart Tax.
ສຳລັບພາກບ່າຍພາຍໃຕ້ການເປັນປະທານຂອງທ່ານ ສົມພັນແພງ ຄຳມີ ຮອງປະທານສະພາແຫ່ງຊາດ. ທ່ານ ສຈ.ດຣ ເອກສະຫວ່າງ ວົງວິຈິດ ລັດຖະມົນຕີວ່າການກະຊວງສາທາລະນະສຸກ ໄດ້ສະເໜີເຖິງເຫດຜົນ ແລະ ຄວາມຈຳເປັນໃນການປັບປຸງກົດໝາຍວ່າດ້ວຍການປິ່ນປົວວ່າ: ຜ່ານມາລັດຖະບານໄດ້ສຸມທຶນຮອນເຂົ້າໃນການຂະຫຍາຍຕາໜ່າງ ແລະ ປັບປຸງຄຸນນະພາບຂອງການບໍລິການປິ່ນປົວໃນຂອບເຂດທົ່ວປະເທດ. ເຮັດໃຫ້ຈຳນວນສະຖານທີ່ບໍລິການປິ່ນປົວຂອງລັດ ແລະ ເອກະຊົນໄດ້ເພີ່ມຂຶ້ນ ແລະ ຄຸນນະພາບກໍດີຂຶ້ນເລື້ອຍໆ, ພ້ອມນັ້ນປະເທດເຮົາຍັງມີການເຊື່ອມໂຍງກັບພາກພື້ນ ແລະ ສາກົນຫລາຍຂຶ້ນ. ໃນປີ 2015 ສປປ ລາວ ກໍຈະໄດ້ເຂົ້າສູ່ປະຊາຄົມເສດຖະກິດອາຊຽນ, ການບໍລິການສຸຂະພາບກໍຈະຕ້ອງຮຽກຮ້ອງໃຫ້ມີການປັບປຸງຄຸນນະພາບສູງຂຶ້ນ. ພ້ອມນັ້ນກໍເພື່ອຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກ ກ່ຽວກັບນະໂຍບາຍດ້ານສາທາລະນະສຸກຕາມທິດຖືເອົາການກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ່, ໄປພ້ອມກັບການຖືເອົາການປິ່ນປົວທີ່ມີຄຸນນະພາບ ແລະ ສະໜອງການບໍລິການດ້ານສາທາລະນະສຸກຢ່າງທົ່ວເຖິງເປັນສຳຄັນ. ຜ່ານການຈັດຕັ້ງປະຕິບັດກົດໝາຍວ່າດ້ວຍການປິ່ນປົວແຕ່ປີ 2005 ເປັນຕົ້ນມາເຫັນວ່າເນື້ອໃນບາງສ່ວນບໍ່ທັນຮັດກຸມ ແລະ ສອດຄ່ອງກັບສະພາບການພັດທະນາເສດຖະກິດ-ສັງຄົມ ຂອງປະເທດເຮົາໃນປັດຈຸບັນ, ຍຸດທະສາດການປະຕິຮູບລະບົບສາທາລະນະສຸກໄດ້ຖືກຮັບຮອງຈາກສະພາແຫ່ງຊາດໃນປີ 2013, ການສ້າງຕັ້ງປະຊາຄົມເສດຖະກິດອາຊຽນໃນປີ 2015 ຈຶ່ງມີຄວາມຈຳເປັນປັບປຸງບາງເນື້ອໃນ.
ທ່ານລັດຖະມົນຕີວ່າການກະຊວງສາທາລະນະສຸກຍັງກ່າວຕື່ມວ່າ: ການປັບປຸງກົດ ໝາຍສະບັບນີ້ເມື່ອໄດ້ຖືກຮັບຮອງ ແລະ ປະກາດໃຊ້ຈະສາມາດເຮັດໃຫ້ການປະຕິບັດແຜນຍຸດທະສາດການປະຕິຮູບລະບົບສາທາລະນະສຸກກ່ຽວກັບການບໍລິການສຸຂະພາບທີ່ລັດຖະບານ ແລະ ສະພາແຫ່ງຊາດຮັບຮອງເອົາສຳເລັດຕາມແຜນ ການທີ່ວາງໄວ້, ເຮັດໃຫ້ການຄຸ້ມຄອງ, ກວດກາວຽກງານບໍລິການປິ່ນປົວທັງພາກລັດ ແລະ ເອກະຊົນມີປະສິດທິພາບ, ພ້ອມນັ້ນທັງເປັນບ່ອນອີງໃຫ້ແກ່ວຽກງານຄຸ້ມຄອງ, ຕິດຕາມກວດກາຜູ້ປະກອບວິຊາຊີບປິ່ນປົວເປັນລະບົບສອດຄ່ອງກັບຂົງເຂດອາຊຽນ ແລະ ພາກພື້ນ.
ຂອບໃຈເນື້ອໃນຈາກ: ຂປລ