ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VII ໂດຍເປັນປະທານຂອງທ່ານ ດຣ. ໄຊສົມພອນ ພົມວິຫານ ຮອງປະທານສະພາແຫ່ງຊາດ ໃນວັນທີ 23 ທັນວາ 2014 ບັນດາສະມາຊິກສະພາແຫ່ງຊາດ (ສສຊ) ເຂດເລືອກຕັ້ງຕ່າງໆ ໄດ້ຜັດປ່ຽນກັນຂຶ້ນປະກອບຄຳຄິດເຫັນ ໃສ່ຮ່າງກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ພາຍຫຼັງທີ່ທ່ານ ບຸນເກີດ ສັງສົມສັກ ລັດຖະມົນຕີວ່າການກະຊວງຍຸຕິທຳ ໄດ້ຂຶ້ນຜ່ານຮ່າງກົດໝາຍສະບັບດັ່ງກ່າວ ແລະ ຜ່ານການປະກອບຄຳຄິດຄຳເຫັນ ຕອນທ້າຍຂອງວາລະກອງປະຊຸມ ສສຊ ກໍ່ໄດ້ພ້ອມກັນລົງຄະແນນສຽງສ່ວນຫຼາຍ ຮັບຮອງເອົາຢ່າງເປັນເອກະສັນ ດ້ວຍຄະແນນ 84 ສຽງ ໃນຈຳນວນ 105 ສຽງ.
ທ່ານລັດຖະມົນຕີວ່າການ ກະຊວງຍຸຕິທຳ ໄດ້ກ່າວວ່າ: ຮ່າງກົດໝາຍສະບັບນີ້ ປະກອບມີທັງໝົດ 9 ພາກ 8 ໝວດ ແລະ 82 ມາດຕາ ມີເນື້ອໃນຕົ້ນຕໍຄື: ພາກທີ I ບົດບັນຍັດທົ່ວໄປມີ 8 ມາດຕາ ເຊິ່ງໄດ້ກຳນົດຈຸດປະສົງນິຍາມການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ນິຍາມການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ການອະທິບາຍຄຳສັບ ນະໂຍບາຍຂອງລັດ ຫຼັກການ ຂອບເຂດການນຳໃຊ້ກົດໝາຍ ແລະ ການຮ່ວມມືສາກົນ ພາກທີ II ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ກຳນົດເປັນສອງໝວດຄື: ໝວດທີ 1 ຮູບການຂອງການໃຊ້ຄວາມຮຸນແຮງ ເຊິ່ງໄດ້ກຳນົດແຍກເປັນສອງຮູບການ 1. ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ໂດຍສະມາຊິກໃນຄອບຄົວ 2. ການໃຊ້ຄວາມຮຸນແຮງໂດຍບຸກຄົນອື່ນ ໝວດທີ 2 ປະເພດການໃຊ້ຄວາມຮຸນແຮງ ເຊິ່ງໃນນັ້ນມີການໃຊ້ຄວາມຮຸນແຮງທາງຮ່າງກາຍ ຈິດໃຈ ທາງເພດ ຊັບສິນ ຫຼື ເສດຖະກິດ ຈາກນັ້ນ ກໍ່ໄດ້ສັງລວມບັນດາພຶດຕິກຳ ທີ່ເປັນການໃຊ້ຄວາມຮຸນແຮງໄວ້ໃນມາດຕາທີ 17.
ພາກທີ III ການປ້ອງກັນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ມີ 10 ມາດຕາ ໂດຍໄດ້ກຳນົດຄວາມຮັບຜິດຊອບຂອງພາກສ່ວນຕ່າງໆ ໃນການປ້ອງກັນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ເປັນຕົ້ນ ພາກລັດ ສັງຄົມ ຄອບຄົວ ແມ່ຍິງ ແລະ ຜູ້ຊາຍ.
ພາກທີ IV ການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍຈາກການໃຊ້ຄວາມຮຸນແຮງ ໄດ້ກຳນົດເປັນສອງໝວດຄື: ໝວດທີ 1 ການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍມີ 14 ມາດຕາ ໂດຍໄດ້ກຳນົດກ່ຽວກັບການປົກປ້ອງ ແລະ ຊ່ວຍເຫຼືອເບື້ອງຕົ້ນ ການລາຍງານລະບົບສົ່ງຕໍ່ ສິດຂອງຜູ້ຖືກເຄາະຮ້າຍ ແລະ ການປົກປ້ອງ ແລະ ຊ່ວຍເຫຼືອທີ່ຈຳເປັນ ເປັນຕົ້ນ ການໃຫ້ຄຳປຶກສາ ທີ່ພັກເຊົາທີ່ປອດໄພ ກົດໝາຍການແພດ ເສດຖະກິດ ໝວດທີ 2 ມາດຕະການປົກປ້ອງຜູ້ຖືກເຄາະຮ້າຍມີ 3 ມາດຕາ ເຊິ່ງໄດ້ກຳນົດກ່ຽວກັບບັນດາມາດຕະການປົກປ້ອງຜູ້ຖືກເຄາະຮ້າຍ ອົງການທີ່ມີສິດສະເໜີ ແລະ ນຳໃຊ້ມາດຕະການດັ່ງກ່າວ.
ພາກທີ V ຂໍ້ຫ້າມມີ 2 ມາດຕາຄື: ຂໍ້ຫ້າມສຳລັບເຈົ້າໜ້າທີ່ ຫຼື ການຈັດຕັ້ງທີ່ກ່ຽວຂ້ອງ ແລະ ຂໍ້ຫ້າມສຳລັບບຸກຄົນນິຕິບຸກຄົນ ຫຼື ການຈັດຕັ້ງອື່ນໆ.
ພາກທີ VI ການແກ້ໄຂການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ເຊິ່ງໃນພາກນີ້ໄດ້ກຳນົດແຍກອອກເປັນ 2 ໝວດຄື: ໝວດທີ 1 ການສຶກສາອົບຮົມ ປະນິປະນອມ ຫຼື ໄກ່ເກ່ຍ ມີ 9 ມາດຕາ ກຳນົດກ່ຽວກັບບຸກຄົນ ອົງການທີ່ມີສິດໃນການສຶກສາອົບຮົມ ປະນິປະນອມ ຫຼື ໄກ່ເກ່ຍ ຄວາມຮຸນແຮງທີ່ນຳມາໄກ່ເກ່ຍ ແລະ ບາງລະບຽບກ່ຽວກັບການໄກ່ເກ່ຍ ໝວດທີ 2 ການດຳເນີນຄະດີມີ 4 ມາດຕາ ທີ່ກຳນົດກ່ຽວກັບການຮ້ອງຟ້ອງ ຫຼື ແຈ້ງຄວາມ ການພິຈາລະນາ ການຮ້ອງຟ້ອງ ຫຼື ແຈ້ງຄວາມ ແລະ ຫຼັກການໃນການດຳເນີນຄະດີ.
ພາກທີ VII ການຄຸ້ມຄອງ ແລະ ການກວດກາປະກອບມີ 2 ໝວດຄື: ໝວດທີ 1 ການຄຸ້ມຄອງວຽກງານຕ້ານ ແລະ ສະກັດກັ້ນການໃຊ້ຄວາມຮຸນແຮງ ເຊິ່ງໄດ້ກຳນົດໃຫ້ສູນກາງສະຫະພັນແມ່ຍິງລາວ ເປັນອົງການຮັບຜິດຊອບ ແລະ ເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງໃນການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ຈາກນັ້ນ ກໍ່ໄດ້ກຳນົດສິດ ແລະ ໜ້າທີ່ຂອງແຕ່ລະພາກສ່ວນ ເຊັ່ນ: ສູນກາງສະຫະພັນແມ່ຍິງລາວ ຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ ຄະນະກຳມາທິການເພື່ອແມ່ ແລະ ເດັກແຫ່ງຊາດ ກະຊວງແຮງງານ ແລະ ສະຫວັດດີການ-ສັງຄົມ ກະຊວງສາທາລະນະສຸກ ກະຊວງສຶກສາທິການ ແລະ ກີລາ ກະຊວງຍຸຕິທຳ ໝວດທີ 2 ການກວດກາວຽກງານການຕ້ານ ແລະ ສະກັດກັ້ນການໃຊ້ຄວາມຮຸນແຮງ ເຊິ່ງໄດ້ກຳນົດອົງການກວດກາ ເນື້ອໃນກວດກາ ແລະ ຮູບການກວດກາ ພາກທີ VIII ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ ແລະ ພາກທີ IX ບົດບັນຍັດສຸດທ້າຍ.
ຂອບໃຈບົດຄວາມຈາກ : vientianemai.net