spot_img
Homeວັນນະກຳເລື່ອງ ທ້າວ ຈັນທະພານິດ (ຕຳນານເຈັດຊຽງ)

ເລື່ອງ ທ້າວ ຈັນທະພານິດ (ຕຳນານເຈັດຊຽງ)

Published on

8282393_orig

 

ດິນ​ແດນ​ລ້ານ​ຊ້າງ​ເປັນດິນ​ແດນ​ທີ່​ຮັ່ງມີ ​ແລະ​ ສວຍ​ງາມ ​ເຄີຍ​ມີ​ຊື່​ລືຊາ​ປາກົດ​ໃນ​ປະຫວັດສາດ​ແຫ່ງ​ຊາດ​ລາວ​ ເປັນ​ເວລາ​ຊ້າ​ນານ. ນະຄອນຫລວງ​ຂ​ອງດິນ​ແດນ​ລ້ານ​ຊ້າງ​ໃນ​ສະ​ໄໝ​ໜຶ່ງ​ເຄີຍ​ມີ​ຊື່ວ່າ ຊຽງ​ດົງ ຊຽງ​ທອງ​ອັນ​ເປັນ​ນະຄອນ​ທີ່​ອຸດົມສົມບູນ​ດ້ວຍ​ຄຳ ຄົນ​ລາວ​ຜູ້​ເປັນ​ເຈົ້າຂອງ​ກໍ​ເປັນ​ຊາດ​ພິລະ​ອາດ​ຫານ, ​ເຄີຍ​ມີ​ການ​ຕໍ່ສູ້​ປົກ​ປັກ​ຮັກສາ​ ແລະ​ ສ້າງ​ບ້ານ​ແປງ​ເມືອງ​ສືບ​ມາ​ຫລາຍ​ເຊັ່ນ​ຄົນ. ​ເຄີຍ​ມີ​ເຈົ້າກະສັດ​ສືບ​ລາດ​ຊະ​ວົງ​ຕໍ່​ກັນ​ມາ​ຮອດ​ສະ​ໄໝ​ຂຸນ​ຊວາ, ຂຸນ​ຍີ​ປາ, ຂຸນ​ວິລິ​ບາ, ຂຸນ​ກັນ​ຮາງ​ ແລະ ​ຂຸນ​ລໍ​ເປັນ​ລຳດັບ. ນະຄອນຫລວງ​ແຫ່ງ​ນີ້​ຈິ່ງ​ປາກົດ​ມີ​ຊື່ວ່າ​ເມືອງ​ຊວາ​ລ້ານ​ຊ້າງ. ກ່ອນ​ສະ​ໄໝ​ຂຸນ​ຊວາ​ພຸ້ນ​ບໍ່​ຮູ້​ວ່າ​ເຫິງ​ນານ​ປານ​ໃດ​ຍັງ​ມີ​ກະສັດ​ອົງ​ໜຶ່ງ​ຊື່ວ່າ​ ພະຍາ ຈັນທະ​ພານິດ ​ເປັນ​ຜູ້​ມີ​ຊື່​ລືຊາ​ເປັນ​ເຈົ້າ​ແຫ່ງ​ຄຳ, ປົກຄອງ​ບ້ານ​ເມືອງ​ໂດຍ​ສິນ​ທຳ, ນຳ​ເອົາ​ຄວາມ​ຢູ່​ເຢັນ​ເປັນ​ສຸກ​ມາສູ່​ໄພ່ຟ້າ​ລາຊະ​ດອນ​ເປັນ​ເວລາ​ອັນ​ຍາວ​ນານ ​ໂດຍ​ມີ​ນິທານ​ເລົ່າ​ສືບ​ກັນ​ມາ​ວ່າ:

ປາງ​ກ່ອນ​ຍັງ​ມີ​ກະ​ໄທ​ຊາຍ​ຄົນ​ໜຶ່ງ​ຊື່ວ່າ ຈັນທາ ຢູ່​ເມືອງ​ວຽງ​ຈັນ​ເປັນ​ຄົນ​ທຳມະ​ດາສາມັນ, ທຳ​ມາ​ຫາ​ກິນ​ດ້ວຍ​ການ​ຂາຍ​ພູ. ​ໃນ​​ແຕ່​ລະ​ມື້​ທ້າວ​ເຄີຍ​ຫາບ​ກະຕ່າ​ພູ​ທຽວ​ໄປ​ຂາຍ​ໃນ​ທີ່​ຕ່າງໆນອກຈາກ​ຂາຍ​ໃນ​ບໍລິ​ເວນ​ບ້ານ​ແລ້ວ, ຍັງ​ຫາບ​ໄປ​ຂາຍ​ໃນ​ໝູ່​ບ້ານ​ຕ່າງໆ ທີ່ຢູ່​ຫ່າງ​ໄກ​ໂດຍ​ອາ​ໄສ​ວັດ​ ແລະ ​ສາລາ​ວັດ ​ເປັນ​ບ່ອນ​ພັກ​ເຊົາ.​ ໃນ​ວັນ​ໜຶ່ງ​ເມື່ອ​ຕາ​ເວັນ​ຄໍ່າ​ແລ້ວ, ທ້າວ​ໄດ້​ຫາບ​ກະຕ່າ​ພູ​ເຂົ້າ​ໄປ​ໃນ​ວັດ ​ແລະ​ ອາ​ໄສ​ພັກ​ນອນ​ຢູ່​ກຸດຕິ​ຫລັງ​ໜຶ່ງ​ ໂດຍ​ຄວາມ​ເອື້ອ​ເຟື້ອຂອງ​ມະຫາ​ເຖນ​ຕົນ​ໜຶ່ງ​ ​ໃນ​ຄືນ​ນັ້ນ​ເວລາ​ທີ່​ຈັນທານ​ອນຫຼັບ, ມະຫາ​ເຖນ​ຊ້ຳ​ໄດ້​ຍິນ​ສຽງ​ດົນຕີ​ເສບ​ເພງ​ໄຊ​ດັງ​ສະ​ນັ່ນນັນ​ເນືອງ​ຂຶ້ນ​ໃນ​ທີ​ນັ້ນ. ມະຫາ​ເຖນ​ຮູ້ສຶກ​ແປກ​ປະຫຼາດ​ໃຈ​ເປັນອັນມາກ​ ຈິ່ງ​ເອົາ​ມື​ຊຸກ​ກະຊ້າ​ພູ​ທີ່​ຕັ້ງຢູ່​ຂອກ​ຂ້າງ​ຈັນທາ​ ຫວັງ​ວ່າ​ຈະ​ປຸກ​ໃຫ້​ຈັນທາ​ຕື່ນ​ຂຶ້ນ​ ເພື່ອ​ພ້ອມ​ກັນ​ຟັງສຽງ​ດົນຕີ​ອັນ​ມະຫັດສະ​ຈັນ​ນັ້ນ. ​ເມື່ອ​ທ້າວ​ຈັນທາ​ຖືກ​ປຸກ​ຈັ່ງ​ຊັ້ນກໍ​ສະດຸ້ງ​ຕື່ນ​ດ້ວຍ​ຄວາມ​ຝັນ​ອັນ​ແປກ​ປະຫຼາດ ​ແຕ່​ພ້ອມ​ກັນນັ້ນສຽງ​ດົນຕີ​ທີ່​ດັງ​ກ້ອງ​ ກັງວານ​ຢູ່​ວ່າງ​ຢ່າ​ນີ້ຊ້ຳພັດ​ຫາຍ​ໄປ,ມະຫາ​ເຖນ​ເຫັນ​ດັ່ງນັ້ນຈິ່ງ​ລົ້ມຫົວນອນ​ລົງ​ອີກ​ ໂດຍ​ບໍ່​ປາກ​ເວົ້າປະການ​ໃດ. ສ່ວນ​ຈັນນທາ​ເມື່ອ​ຕື່ນ​ຂຶ້ນ​ແລ້ວ​ກໍ​ຮູ້ສຶກ​ສົນ​ໃຈ​ໃນ​ຄວາມ​ຝັນ​ຂອງ​ຕົນ​ເອງ​ເປັນ​ທີ່​ສຸດ ​ແຕ່​ກໍ​ບໍ່​ກ້າ​ແກ້ຄວາມ​ຝັນ​ນຳ​ມະຫາ​ເຖນ ​ເນື່ອງ​ຈາກ​ວ່າ​ຄິດ​ຈົ່ງ​ຈຽມ​ມະ ຫາ​ເຖນ. ​ເມື່ອ​ຮຸ່ງ​ເຊົ້າມາ​ຫຼັງ​ຈາກ​ສ່ວຍໜ້າ​ແລ້ວ​ ທ້າວ​ກໍ​ຫາບ​ຊ້າ​ພູ​ໄປ​ທ່ຽວຂາຍ​ຕາມ​ເຄີຍ.​ ເມື່ອ​ພົບ​ຊາວບ້ານ​ທີ່​ຄຸ້ນ​ແກວ່ນ​ກັບ​ທ້າວ​ຈຶ່ງ​ໄດ້​​ ແກ້ຄວາມ​ຝັນ​ຂອງ​ຕົນ​ນຳ​ຊາວ​ບ້າ​ນ ​ແຕ່​ຊາວ​ບ້ານຊ້ຳພັດ​ເວົ້າ​ແຕກ​ຕ່າງ​ກັນ​ໄປຕ່າງໆນາໆ ຍິ່ງ​ເຮັດ​ໃຫ້​ທ້າວ​ເກີດ​ຄວາມ​ກັງວົນສົນ​ໃຈ​ໃນ​ຄວາມ​ຝັນ​ຂອງ​ຕົນ​ເອງ ບາງ​ຄົນ​ກໍ​ເວົ້າວ່າ ຄົນ​ຜູ້​ນ້ອຍ​ຝັນ​ໃຫຍ່​ຈະ​ເປັນ​ຄວາມ​ອັບ​ປີ​ຈັງ​ໄຮ ບາງ​ຄົນ​ກໍ​ວ່າ​ຝັນ​ດີ​ຈັກ​ເກີດ​ເປັນ​ຮ້າຍ. ບາງ​ຄົນ​ກໍ​ເວົ້າວ່າ​ຄຳ​ຝັນ​ນີ້ບໍ່​ເປັນຕາ​ເພິ່ງ​ເຊື່ອ ​ລາງ​ຝັນ​ໄດ້​ກອດ​ຊູ້​ມືນ​ຕາຂຶ້ນຊ້ຳ​ແມ່ນ​ໝອນ. ​ເມື່ອ​ເປັນ​ແນວ​ນັ້ນທ້າວ​ຈິ່ງ​ກັບ​ໄປ​ຫາ​ມະຫາ​ເຖນ​ ແລະ​ໄຫວ້​ມະຫາ​ເຖນ​ວ່າ: ຂ້າ​ແຕ່​ທ່ານ​ອາຈານ​ເອີ​ຍ! ຂ້ານ້ອຍ​ນອນ​ຫຼັບ​ໄປ​ໃນ​ຄືນ​ນັ້ນລວດ​ຝັນ​ວ່າ​ຕົນ​ເປັນ ​ຜູ້​ມີ​ລິດ​ທາ​ນຸພາບ​ປາກ​ຄາບ​ດວງ​ຈັນ​ ສອງ​ຕີນ​ຢັນ​ພະ​ອາທິດ​ ບໍ່​ຮູ້​ວ່າ​ຈະ​ເປັນ​ນິມິດ​ຮ້າຍ​ດີ​ປະກາ​ນ​ໃດ​ທ່າ​ນ​ເອີຍ.​ ເມື່ອ​ໄດ້​ຟັງ​ຈັນທາ​ແກ້ຄວາມ​ຝັນ​ແປກ​ປະຫຼາດ ​ປະກອບ​ດ້ວຍ​ຕົນ​ເອງ​ໄດ້​ຍິນ​ສຽງ​ດົນຕີ​ເສບ​ງັນ ​ໃນ​ຄືນ​ດຽວ​ກັນນັ້ນມະຫາ​ເຖນ​ຈິ່ງ​ຄິດ​ຄະນິງ​ໃນ​ໃຈ​ວ່າ ກະ​ໄທ​ຊາຍ​ຜູ້ນີ້ອາດ​ຈະ​ເກີດ​ເປັນ​ຜູ້​ມີ​ບຸນ​ໜັກ​ສັກ​ໃຫຍ່​ແທ້​ ຄິດ​ແລ້ວ​ມະຫາ​ເຖນ​ຈິ່ງ​ກ່າວ​ວ່າ: ດູລາ​ທ່ານ​ເອີຍ! ຄຳ​ຝັນ​ເຫຼົ່າ​ນີ້​ເປັນນິຣະມິດ​ດີ ຝັນ​ປະ​ເສີດ​ຫາກ​ຈະ​ເກີດ​ໂຊກ​ໄຊ​ໃນ​ພາຍ​ໜ້າ​ບໍ່​ຢ່າ​ຊະ​ແລ. ​ເມື່ອ​ທຳນາຍ​ຄວາມ​ຝັນ​ນັ້ນມະຫາ​ເຖນ​ກໍ​ໄດ້​ແນະນຳ​ ຄຳ​ສັ່ງສອນ​ແກ່​ທ້າວ​ດ້ວຍ​ຄວາມ​ຮັກ​ແພງ ​ແລະ ​ເຊື່ອຖື​ຫຼາຍ​ປະການ, ນັບ​ແຕ່​ນັ້ນມາ​ທ້າວ​ກໍ​ໄດ້​ປະຕິບັດ​ຕາມ​ຄຳ​ສັ່ງສອນ​ຂອງ​ມະຫາ​ເຖນ​ທຳ​ມາ​ຫາ​ກິນ​ດ້ວຍ​ຄວາມ​ດຸໝັ່ນພາກ​ພຽນ​ ແລະ​ ຊື່ສັດ​ສຸ​ຈະລິດ​ຈົນ​ກາຍ​ເປັນ​ພໍ່ຄ້າ​ຜູ້​ໜຶ່ງ​ທີ່​ມີ​ຄົນ​ທັງ ຫຼາຍ​ເອີ້ນ​ວ່າ: ພໍ່ຄ້າ​ຂາຍ​ພູ ​ເຫດ​ວ່າ​ໄດ້​ເລີ່​ມຕົ້ນຂາຍ​ພູ​ເປັນຕົ້ນທຶນ.

ຢູ່​ຕໍ່​ມາ​ທ້າວ​ຈັນທາ​ໄດ້​ຈັດ​ຫາ​ເຮືອ​ຄ້າ​ໄດ້​ລຳ​ໜຶ່ງ ​ແລ້ວ​ກໍ​ຊັກ​ຊວນ​ເອົາ​ຍາດ​ພີ່ນ້ອງ ​ແລະ​ ມິດ​ສະຫາຍ​ໄດ້​ຈຳນວນ​ໜຶ່ງ​ ພາກັນ​ຖໍ່​ເຮືອ​ຄ້າ​ຈາກ​ວຽງ​ຈັນ​ຂຶ້ນ​ເມືອ​ທາງ​ເໜືອ​ ຕາມ​ການ​ແນະນຳ​ຂອງ​ມະຫາ​ເຖນ. ເວລາ​ທີ່​ຖໍ່​ເຮືອຕາມ​ລຳ​ນ້ຳຂອງຂຶ້ນ​ໄປ​ຮອດ​ຜາ​ຕັດ​ແກ້​ ແລະ ​ຜາຕັ້ງ ​ໄດ້​ປະກົດ​ເຫັນ​ຄຳ​ຕິດ​ປາຍ​ໄມ້​ປົ່ງ​ຂຶ້ນມາ​ເປັນ​ກ້ອນ​ໃຫຍ່​ແຕ່​ວ່າ ຍ້ອນ​ປະຕິບັດ​ຕາມ​ຄຳ​ສັ່ງ​ຂ​ອງມະຫາ​ເຖນ ຢ່າງ​ເຄັ່ງ​ຄັດ​ເຫັນ​ຄຳ​ຕິດ​ປາຍ​ໄມ້​ປົ່ງຂຶ້ນມາ 2-3 ​ເທື່ອ ​ທ້າວ​ຈັນທາ​ກໍ​ບໍ່​ເອົາ, ຈົນ​ວ່າ​ພວກ​ບ່າວ​ເຮືອ​ພາກັນ​ໂອຍ​ຄາງ​ ແລະ​ ຕົບ​ເອິກ​ຕີ​ອາງ​ຈົ່ມ​ວ່າ​ເສຍດາຍ​ເດ!​ ເສຍດາຍ​ເດ!​ ໃນ​ຂະນະ​ທີ່​​ທ້າວ​ຈັນທາ​ປ່ອນ​ຄຳ​ລົງ​ໃນ​ນ້ຳ, ​ເມື່ອ​ໄດ້​ຍິນ​ທຸກ​ຄົນ​ຈົ່ມ​ເສຍດາຍ​ທ້າວ​ຈິ່ງ​ກ່າວ​ວ່າ: ພວກ​ເຈົ້າທັງຫຼາຍ​ເອີຍ! ຢ່າ​ຈົ່ມ​ເສຍດາຍ​ເລີຍ​ເຮົາ​ຈັກ​ໄດ້​ພາຍ​ໜ້າ​ພຸ້ນ​ ຫຼາຍ​ກວ່າ​ນີ້ໝື່ນທໍ່ແສນ​ທໍ່​ແທ້​ດາຍ. ວ່າ​ແລ້ວ​ກໍ​ພາ ກັນ​ສືບ​ຕໍ່​ຖໍ່​ເຮືອ​ຂຶ້ນ​ເມືອ​ເໜືອ​ຊັກ​ໄຊ້ຈົນ​ຮອດ​ດອນ​ຊາຍ​ແຫ່ງ​ໜຶ່ງ​ຊື່ວ່າ: ດອນ​ຊາຍ​ຄວາຍ​ຮ້າ (ດອນ​ຊາຍ​ມຸງຄຸນ ຝັ່ງ​ເມືອງ​ຈອມ​ເພັດ​ປັ​ດຈຸ​ບັນ). ​ໄປ​ຮອດ​ຫັ້ນກໍ​ເປັນ​ເວລາ​ຄໍ່າ​ພໍດີ​ຈຶ້ງພາກັນ​ຈອດ​ເຮືອ​ໄວ້​ທ່າ​ແລ້ວ​ ຂຶ້ນປຸກ​ຕູບ​​ແປງ​ຜາມ​ພັກ​ເຊົາ​ຢູ່​ທີ່​ດອນ​ນັ້ນ ຕື່ນ​ເຊົ້າມາ​ໄດ້​ເຫັນ​ຊາຍ​ຄົນ​ໜຶ່ງ​ແບກ​ກ້ອນ​ຫີນ​ລົງ​ມາ​ຫາ. ທ້າວ​ຈັນທາ​ໄດ້​ຖາ​ມວ່າ: ດູລາ​ທ່ານ, ທ່ານ​ແບກ​ວັດຖຸ​ສິ່ງ​ນັ້ນມາ​ເຮັດ​ຫຍັງ​ນີ້​ນ່າ? ຊາຍ​ຄົນ​ນັ້ນຕອບ​ວ່າ: ຂ້ອຍ​ແບກ​ກ້ອນ​ຫີນ​ອັນ​ນີ້ມາ​ກໍ​ເພື່ອ​ແລກປ່ຽນ ​ເຄື່ອງ​ຄ້າ​ບາງ​ອັນ​ຂອງ​ທ່ານ​ທັງຫຼາຍ​ດາຍ. ​ເມື່ອ​ນັ້ນທ້າວ​ຈັນທາ​ຈຶ່ງ​ກ່າວ​ວ່າ: ອັນ​ທ່ານ​ແບ​ກມານັ້ນຕັ້ງ​ແມ່ນ​ກ້ອນ ​ຄຳ​ແດງ​ແພງ​ຄ່າ​ມາກ​ແທ້​ດາຍ. ​ເມື່ອ​ໄດ້​ຍິນ​ດັ່ງນັ້ນຊາຍ​ຄົນ​ນັ້ນກໍ​ປົ່ງ​ລົງ​ຈາກ​ບ່າ, ກ້ອນ​ຫີນ​ລັບ​ພ້າ​ຝົນ​ມີ​ດກໍ​ກາຍ ​ເປັນ​ກ້ອນ​ຄຳ​ແດງ​ຄ່າ​ແພງ​ມາກ​ມາຍ​ແທ້​ດາຍ. ທີ່​ໄດ້​ພົບ​ເຫັນ​ຕ່າງ​ກໍ​ງຶດ​ງໍ້​ອັດສະ​ຈັນ ຈຶ່ງ​ພ້ອມ​ກັນ​ຈັດຕັ້ງພິທີ​ມະ​ໂຫ​ລານ​ພາກັນ ​ສະຫຼອງ​ເຈັດ​ວັນ​ເຈັດ​ຄືນ​ຢ່າງ​ຄຶກຄື້ນ. ​ໃນ​ມື້ວັນ​ຖ້ວນ​ເຈັດ​ ທ້າວຈັນທາ​ ຈຶ່ງ​ໃຫ້​ຄົນ​ທັງຫຼາຍ​ໄປ​ເກັບ​ເອົາ​ກ້ອນ​ຄຳ ​ມາກ​ອງ​ໄວ້​ເປັນ​ຊັບ​ສົມບັດ​ຂອງ​ບ້ານ​ເມືອງ. ນອກຈາກ​ນັ້ນກໍ​ແຈກ​ຢາຍ​ໃຫ້​ຄົນ​ທັງຫລາຍ​ຈົນ​ທຸກ​ທົ່ວ​ໜ້າ, ​ເຫດການ​ອັນ​ໜ້າ​ອັດສະຈັນ​ນັ້ນ​ໄດ້​ກາຍ​ເປັນ​ຂ່າວ​ລື​ພື​ແພ່​ໄປ​ທົ່ວ​ທຸກ​ແຫ່ງ​ຫົນ, ຝູງ​ຄົນ​ທີ່​ຢູ່​ແດນ​ໄກ​ໄດ້​ພາກັນ​ມາ​ເຕົ້າ​ໂຮມ​ເປັນອັນມາກ​ ແລະ ​ພ້ອມ​ກັນ​ຍ້ອງຍໍ​ສັນລະ​ເສີນ​ບຸນ​ຄຸນ ​ຂອງ​ທ້າວ​ຈັນທາ​ພໍ່ຄ້າ​ພູ​ເປັນ​ທີ່​ຍິ່ງ.​ ເນື່ອງ​ຈາກ​ວ່າ​ຝຸງ​ຄົນ​ມາ​ເຕົ້າ​ໂຮມ​ກັນ​ຢູ່​ໜາ    ​ແໜ້ນ​ອັ່ງ​ອໍ ​ດັ່ງນັ້ນປ່າດົງ​ພົງ​ໄພ​ແຖວ​ນັ້ນຈຶ່ງ​ຖືກ​ຖາງ​ອອກ​ ເພື່ອ​ສ້າງ​ຫໍຜາສາ​ດລາຊະ​ວັງ​ ແລະ ​ເວລາ​ຂຸດ​ດິນ​ລົງ​ເພື່ອ​ເອົາ​ເສົາ​ຝັງຊໍ້າພັດ​ໄດ້​ພົບ ​ແຜ່ນທອງ​ໃນ​ພື້ນ​ແຜ່ນດິນ​ເປັນອັນມາກ​ ດັ່ງນັ້ນຫໍຜາສາດ​ຫຼັງ​ນັ້ນຈຶ່ງ​ໄດ້​ຖືກ​ໃສ່​ຊື່ວ່າ​ໂລຫະ​ຜາສາດ ຫລື​ໂຮງ​ຊຽງ​ດົງ​ຊຽງ​ທອງ​ຕາມ​ນິມິດ​ສອງ​ປະການ​ດັ່ງກ່າວ.​ ເມື່ອ​ສ້າງ​ສຳເລັດ​ແລ້ວ ຈຶ່ງ​ພ້ອມ​ກັນ​ເອົາ​ກ້ອນ​ຄຳ​ມາ​ກໍ່​ກອງ​ຢອງ​ກັນຂຶ້ນ​ເປັນ​ ລາດ​ຊະ​ບັນລັງ​ແລ້ວ​ເຊີນ​ຈັນທາ​ ພໍ່ຄ້າ​ຂາຍ​ພູ​ຂຶ້ນນັ່ງ​ເທິງ​ກອງ​ຄຳ ​ແລະ​ ທຳ​ລາຊາພິ​ເສກ​ໃຫ້​ເປັນ​ລາຊາ​ປົກຄອງ​ເມືອງ. ຂະ​ໜານ​ນາມ​ວ່າ: ພະຍາ​ຈັນທະ​ພາ​ນິດ​ ສະຖິດ​ສຸວັນນະ​ພູມ​ ທີ່​ລື​ຊື່ ​ໂດຍ​ກາຍ​ເປັນ​ນະຄອນຫຼວງ   ​ກ້ວາງ​ໃຫຍ່​ ແລະ​ ສວຍ​ງາມ​ ອັນ​ມີນາ​ມວ່າ​ຊຽງ​ດົງ​ ຊຽງ​ທອງ​ ຕັ້ງ​ແຕ່​ນັ້ນມາ. ​ເມື່ອ​ໄດ້​ຂຶ້ນສະ​ເຫວີຍ​ລາດ​ບ້ານ​ເມືອງ​ແລ້ວ ພະຍາ​ຈັນທະ​ພານິດ ກໍ​ບໍ່​ໄດ້​ປະໝາດ​ມົວ​ເມົາ​ໃນ​ຄວາມສຸກ​ສ່ວນ​ຕົວ​ຂອງ​ພະ​ອົງ, ພະ​ອົງ​ໄດ້​ຊົງ​ນຳ​ໄພ່ຟ້າ​ປະຊາ ກອນ​ສ້າງສາ​ບ້ານ​ເມືອງ​ໃຫ້​ຮຸ່ງ​ເຮືອງ​ຍິ່ງໆ​ຂຶ້ນ,ນອກຈາກທີ່​ໄດ້​ສ້າງ​ບ້ານ​ແປງ​ເມືອງ​ ​ເມືອງ​ທີ່​ເພິ່ນ​ໄດ້​ສ້າງ​ປະກ​ອບມີ 7​ ຊຽງ​ ຂຶ້ນຄື: ຊຽງ​ດົງ, ຊຽງ​ທອງ, ຊຽງ​ມວກ, ຊຽງ​ແມນ, ຊຽງ​ມ່ວນ, ຊຽງ​ເຫຼັກ ​ແລະ ​ຊຽງ​ເງິນ.ຈົນ​ດິນ​ແດນ​ຊຽງ​ທອງ​ໄດ້​ກາຍ​ເປັນ ​ບ້າ​ນຮັ່ງ​ເມືອງ​ມີ​ທີ່​ອຸດົມສົມບູນ​ໄປ​ດ້ວຍ​ຊັບ​ສິນ​ເງິນ​ຄຳ ​ເຂົ້ານ້ຳຊ້ຳປາ​ ໄພ່​ຟ້າ​ປະຊາກອນ​ກໍ​ໄດ້​ແຕ່​ຄວາມ​ຍົກຍ້ອງ. ພະຍາ​ຈັນ​ທະ​ພານິດ​ ຈິ່ງ​ເຫັນ​ວ່າ​ຕົນ​ເອງ​ຈະ​ບໍ່​ຕັ້ງທ່ຽງ​ຖາ​ວອນ​ຕໍ່​ໄປ​ພາຍ​ໜ້າ​ ບ້ານ​ເມືອງ​ກໍ​ຈັກ​ມີ​ການ​ຜັນ​ແປ​ໄປ​ຕາມ​ຍຸກ​ສະ​ໄໝ​ ອາດ​ຈະ​ເກີດ​ໂພຍ​ໄພ​ດ້ວຍ​ທຳ​ມະ​ຊາດ​ ແລະ ​ສົງຄາມ. ຖ້າ​ຫາກ​ບໍ່​ມີ​ວິທີ​ປົກ​ປັກ​ຮັກສາ​ໄວ້​ດີ​ ຊັບ​ສົມບັດ​ເຂົ້າຂອງ​ທີ່​ສະ​ສົມ​ໄວ້​ເປັນອັນມາກ ​ກໍ​ຈັກ​ຖືກ​ຈິບຫາຍ​ສາບສູນ​ໄປ​ ແລະ​ ລູກ​ຫຼານ​ຜູ້​ສືບ​ເຊື້ອສະກຸນ​ກໍ​ຈະ​ໄດ້​ຮັບ​ຄວາມທຸກ​ຍາກ​ອຶດ​ຢາກ ຈຶ່ງໄດ້ເອົາຊັບສົມບັດເງິນຄຳໄປຊຸກເຊື່ອງໄວ້ ໃນທີ່ແຈບເປັນຢ່າງດີ.

ຫຼັງ​ຈາກ​ພະຍາ​ຈັນທະ​ພານິດ​ໄດ້​ຊ້ອນ​ເຊື່ອງ ຊັບ​ສົມບັດ​ໄວ້​ດີ​ແລ້ວ​ຢູ່​ຕໍ່​ມາ​ພະຍາ​ກໍໝົດອາຍຸ​ສັງຂາ​ນຂອງ​ຕົນ. ​ເຖົ້າ​ແກ່​ບູຮານ​ເຄີຍ​ເວົ້າ​ໄວ້​ວ່າການ​ທີ່​ພະຍາ​ຈັນທະ​ພາ​ນິດ ​ໄດ້​ປະດິດ​ປັ້ນຮູບ​ນົກຍາງ​ຊົບ​ເຊົາ ​ຫງ່ວມ​ເຫງົາ​ໝາ​ຍ​ໄວ້​ປາກ​ຖ້ຳນັ້ນ ​ເພື່ອວ່າ​ຈະ​ໃຫ້​ຄົນ​ມີ​ປັນຍາ​ສິນ​ທຳ​ສືບ​ຮູ້​ຫາ​ເຫັນ​ບ່ອນ​ຊັບ​ສົມບັດ​ ໃນ​ເມື່ອ​ເວລາ​ຜ່ານ​ພົ້ນ​ໄປ​ແລ້ວ. ອີກ​ປະການ​ໜຶ່ງ​ເພື່ອ​ຈະ​ໃຫ້​ຜູ້​ມີ​ປັນຍາ​ແກ້​ໄຂ​ບັນຫາ ​ສິບ​ສອງ​ຂໍ້​ອັນ​ມີ​ໃນນິທານ​ນົກຍາງ​ຊື່ວ່າ: ກິ​ຍຸ​ໂຊກ​ໃນ​ປາງ​ກ່ອນ​ໃຫ້​ສຸ​ລຸ​ລ່ວງ​ໄປ​ເພື່ອ​ໃຫ້​ ເປັນ​ປະ​​ໂຫຍ​ດ​ໃນ​ການ​ຕົກ​ແຕ່ງ​ວຽກບ້ານ​ການ​ເມືອງ. ​ແຕ່​ວ່າ​ເມື່ອ​ໃດ​ຫາກ​ຍັງ​ບໍ່​ທັນ​ເຖິງ​ຍຸກ​ສະ​ໄໝ​ ແລະ ​ແກ້​ໄຂ​ບັນຫາ​ນົກຍາງ​ບໍ່​ທັນ​ຕົກ​ແຕກ,  ຄົນ​ເຮົາ​ກໍ​ບໍ່​ສາມາດ​ເຫັນ​ນົກຍາງ ​ແລະ​ ຄົ້ນພົບ​ຂຸມ​ທີ່​ພະຍາ​ຈັນທະ​ພານິດ​ຝັງ​ໄວ້​ນັ້ນ​ໄດ້, ບັນຫາ​ນົກຍາງ 12 ຂໍ້​ມີ​ດັ່ງ​ນີ້:

1. ນົກຍາງ​ເອີຍ! ​ເປັນ​ສັງ​ເຈົ້າບໍ່​ກອກ ?            ຂ້ອຍ​ບໍ່​ກອກ​ຍ້ອນ​ປາ​ບໍ່​ບ້ອນ

2. ປາ​ເອີຍ!​ເປັນ​ສັງ​ເຈົ້າບໍ່​ບ້ອນ ?                  ຂ້ອຍ​ບໍ່​ບ້ອນ​ຍ້ອນຫຍ້າ​ໄຊ​ຮົກ

3. ຫຍ້າ​ໄຊ​ເອີຍ! ​ເປັນ​ສັງ​ຈຶ່ງ​ຮົກ ?                ຂ້ອຍ​ຮົກ​ຍ້ອນ​ງົວ​ບໍ່​ກັດ

4. ງົວ​ເອີຍ​ເປັນ​ຫຍັງ​ບໍ່​ກັດ ?                      ຂ້ອຍ​ບໍ່​ກັດ​ຍ້ອນ​ເຈົ້າຂອງ​ບໍ່​ປ່ອຍ

5. ​ເຈົ້າຂອງ​ເອີຍ​ເປັນ​ຫຍັງ​ບໍ່​ປ່ອຍ​ງົວ ?            ຂ້ອຍ​ບໍ່​ປ່ອຍ​ຍ້ອນ​ວ່າ​ຂ້ອຍ​ແສບ​ທ້ອງ​ຫິວ​ເຂົ້າ

6. ທ້ອງ​ເອີຍ​ເປັນ​ຫຍັງ​ຈິ່ງ​ແສບ ?                 ຂ້ອຍ​ແສບ​ທ້ອງ​ຍ້ອນ​ເຂົ້າບໍ່​ສຸກ

7. ​ເຂົ້າ​ເອີຍ​ເປັນ​ຫຍັງ​ຈຶ່ງ​ບໍ່​ສຸກ ?                 ບໍ່​ສຸກ​ແລ້ວ​ຍ້ອນ​ໄຟ​ບໍ່​ລຸກ

8. ​ໄຟ​ເອີຍ​ເປັນ​ຫຍັງ​ບໍ່​ລຸກ ?                      ຂ້ອຍ​ບໍ່​ລຸກ​ຍ້ອນ​ຟືນ​ຊຸ່ມ

9. ຟືນ​ເອີຍ​ເປັນ​ຫຍັງ​ຈຶ່ງ​ຊຸ່ມ ?                    ຊຸ່ມ​ແທ້​ຍ້ອນ​ຝົນຕົກ​ຮຳ

10. ຝົນ​ເອີຍ​ເປັນ​ຫຍັງ​ຈຶ່ງ​ຕົກ​ຮຳ ?                 ຍ້ອນ​ກົບ​ຂຽດ​ຮ້ອງ​ຫຼາຍ

11. ກົບ​ຂຽດ​ເອີຍ​ເປັນ​ຫຍັງ​ຈຶ່ງ​ຮ້ອງ ?              ຮ້ອງ​ແທ້​ຍ້ອນ​ງູ​ໄລ່​ກັດ

12. ງູ​ເອີຍ​ເປັນ​ຫຍັງ​ຈຶ່ງ​ໄລ່​ກັດ​ກົບ​ຂຽດ ?

ບັນຫາ​ນົກຍາງ​ທັງ 12 ​ຂໍ້​ ດັ່ງ​ກ່າວ​ນັ້ນ​ເປັນ​ບັນຫາ​ພົວພັນ​ເຊິ່ງກັນ ​ແລະ ​ກັນ​ຢ່າງ​ແໜ້ນ​ແຟ້ນ ​ແລະ​ ບັນຫາ​ສຸດ​ທ້າຍ​ໄດ້​​ແກ່ງູບັນດາ​ນັກປາດ ​ອາຈານ​ແຕ່​ເກົ່າ​ກ່ອນ​ເຄີຍ​ມີ​ການ​ຄົ້ນຄວ້າ ​ແລະ​ ອະທິບາຍ​ກັນ​ມາ​ແລ້ວ​ເປັນອັນມາກ ​ແຕ່​ບໍ່​ທັນ​ສາມາດ​ຈັດການ​ແກ້​ບັນຫານັ້ນ​ ໃຫ້​ຕົກ​ແຕກ​ໄປ​ຢ່າງ​ເປັນ​ຕົວ​ຈິງ​ໄດ້. ດັ່ງນັ້ນ, ພະຍາ​ຈັນທະ​ພານິດ​ຜູ້​ຄິດ​ກ້ວາງ​ມອງ​ໄກ​ຈຶ່ງ​ໄດ້​ປັ້ນ​ແຕ່ງ ​ຮູບ​ນົກ​ຍາງ​ໄວ້​ເປັນ​ສັນຍາ​ລັກ​ໝາຍ​ໄວ້​ ເມື່ອ​ໃດ​ຫາກ​ເຖິງ​ຍຸກ​ສະ​ໄໝ ​ແລະ​ ຄົນ​ເຮົາ​ກໍ​ແກ້​ໄຂ​ບັນຫາ​ນົກຍາງ​ຕົກ​ແຕກ​ໄປ​ແລ້ວ,​ ເມື່ອນັ້ນຮູບ​ນົກຍາງ​ກໍ​ຈະ​ປາກົດ​ແກ່​ສາຍຕາ​ຄົນ​ທັງຫຼາຍ ​ແລ້ວ​ຄົນ​ຜູ້​ມີ​ສິນ​ທຳ​ ແລະ​ມີ​ສະຕິ​ປັນ​ຍາ​ທັງຫຼາຍ​ກໍ​ຈະ​ສາມາດ​ຄົ້ນພົບ ​ແລະ ​ນຳ​ເອົາ​ຊັບ​ສົ​ມບັດ​ເຂົ້າຂອງ​ເງິນ​ຄຳ​ທີ່​ພະຍາ​ ຈັນທະ​ພານິດຝັງ​ໄວ້​ໃນພື້ນດິນ​ນັ້ນ ອອກ​ມາ​ໃຊ້​ໃຫ້​ເປັນ​ປະ​ໂຫຍ​ດ​ໃນ​ການ ປັບປຸງ​ຊາດ​ໃຫ້​ເຂັ້ມ​ແຂງ ສ້າງ​ແປງ​ບ້ານ​ເມືອງ​ໃຫ້​ຮຸ່ງ​ເຮືອງ​ເຫລືອງ​ງາມ​ສົມ​ຕາມ​ຈິດ​ໃຈ​ຂອງ​ປະຊາຊົນ ຊົງ​ເປັນ​ຫ່ວງ​ໃຍ​ນຳ​ລູກ​ຫຼາຍ​ເຫຼັນຫຼ້ອນ​ຜູ້​ສືບ​ເຊື້ອສະກຸນ​ລາວ.

ຂອບໃຈວັນນະກໍາຈາກ: http://lanxanglpb.weebly.com

ບົດຄວາມຫຼ້າສຸດ

ວັນທີ 1 ເດືອນພຶດສະພາ ຂອງທຸກໆປີ ເປັນວັນບຸນໃຫຍ່ຂອງຊົນຊັ້ນກຳມະກອນໃນທົ່ວໂລກ

ປະຫວັດຄວາມເປັນມາຂອງວັນກຳມະກອນສາກົນ 1 ພຶດສະພາ 1886 ມູນເຊື້ອ, ປະຫວັດຄວາມເປັນມາຂອງວັນກໍາມະກອນສາກົນ ຂອງຊົນຊັ້ນກຳມະກອນສາກົນ ແມ່ນໄດ້ກໍາເນີດເກີດຂຶ້ນໃນທ້າຍສະຕະວັດທີ XVIII ຫາຕົ້ນສະຕະວັດທີ XIX ຫຼາຍປະເທດໃນທະວີບເອີຣົບ ແລະ ອາເມລິກາ ໄດ້ສຳເລັດການໂຄ່ນລົ້ມລະບອບສັກດີນາ...

ສສ ຫວຽດນາມ ຕັ້ງເປົ້າໃຫ້ພາສາອັງກິດ ເປັນພາສາທີສອງ ໃນປີ 2035

ຫວຽດນາມປັບແຜນການຮຽນຄັ້ງສຳຄັນໃນປະເທດ ໂດຍຕັ້ງເປົ້າໃຫ້ພາສາອັງກິດເປັນພາສາທີສອງ ພາຍໃນປີ 2035 ເຊິ່ງຈະຄ່ອຍໆເລີ່ມໃນແຕ່ລະໂຮງຮຽນທົ່ວປະເທດ. ສຳລັບໂຄງການນີ້ ແມ່ນເລີ່ມແຕ່ປີ 2025 ໄປຈົນເຖິງປີ 2035 ແລະ ມີແຜນຈະຂະຫຍາຍໄປຕື່ມຈົນຮອດປີ 2045 ໂດຍກຳລັງຄັດເລືອກວິທະຍາໄລ ແລະ...

ເປີດການນໍາໃຊ້ຢ່າງເປັນທາງການ ທ່າທຽບເຮືອເລກ 3 ທ່າເຮືອສາກົນ ລາວ-ຫວຽດ

ຄະນະຜູ້ແທນຂັ້ນສູງ ພັກ, ລັດ ແຫ່ງ ສປປ ລາວ ນໍາໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ...

ຫຼາຍເພຈໃນລາວຖືກແອບອ້າງ!

ເຕືອນໄພ! ທາງສື່ສັງຄົມອອນລາຍ ປັດຈຸບັນໄດ້ມີກຸ່ມຄົນບໍ່ດີ ຫຼື ມິດສາຊີບ ພະຍາຍາມສ້າງເພຈປອມຂອງສຳນັກຂ່າວຕ່າງໆຂຶ້ນຫຼາຍ. ເມື່ອ 2 ອາທິດທີ່ຜ່ານມານີ້, ຜູ້ນຳໃຊ້ສື່ສັງຄົມອອນລາຍພົບເຫັນເພຈປອມທີ່ແອບອ້າງເປັນເພຈຂອງສຳນັກຂ່າວເພື່ອຍິງໂຄສະນາຂາຍສິນຄ້າຕ່າງໆ ໂດຍໄດ້ນຳໃຊ້ໂລໂກ້, ພາບໜ້າປົກ, ຂໍ້ມູນຂ່າວລົງໃນເພຈປອມເພື່ອໃຫ້ຜູ້ອ່ານເຊື່ອຖື ຫຼັງຈາກນັ້ນແມ່ນຍິງໂຄສະນາ ແລະ...