ທ່ານ ໂດນັລ ທຣຳມ ປະທານາທິບໍດີ ສະຫະລັດອາເມລິກາ ປະກາດຈະເກັບພາສີນຳເຂົ້າ 10% ສຳລັບສິນຄ້ານຳເຂົ້າທັງໝົດທີ່ເຂົ້າສູ່ສະຫະລັດ
ສຳນັກຂ່າວຕ່າງປະເທດລາຍງານ ໃນວັນທີ 2 ເມສາ 2025 ນີ້, ທ່ານ ໂດນັລ ທຣຳ, ປະທານາທິບໍດີ ສະຫະລັດອາເມຣິກາ ປະກາດຈະເກັບພາສີນຳເຂົ້າພຶ້ນຖານ 10% ສຳລັບສິນຄ້ານຳເຂົ້າທັງໝົດທີ່ເຂົ້າສູ່ສະຫະລັດ ແລະ ຈະເກັບພາສີໃນອັດຕາທີ່ສູງຂຶ້ນຈາກປະເທດອື່ນໆອີກຫຼາຍປະເທດ ລວມເຖິງຄູ່ຄ້າທີ່ສຳຄັນທີ່ສຸດຂອງສະຫະລັດ ເຊິ່ງເປັນການຂະຫຍາຍສົງຄາມການຄ້າທີ່ສ້າງຄວາມປັ່ນປ່ວນໃຫ້ຕະຫຼາດໂລກ.
ທ່ານ ໂດນັລ ທຣຳ ໄດ້ກ່າວວ່າ: ລັດຖະບານກຳນົດອັດຕາພາສີສຳລັບແຕ່ລະປະເທດໂດຍພິຈະລະນາຈາກອັດຕາພາສີເງິນຕາທີ່ປະເທດເຫຼົ່ານັ້ນ ເກັບຈາກສິນຄ້າທີ່ນຳເຂົ້າຈາກສະຫະລັດ ລວມເຖິງອຸປະສັກທາງການຄ້າທີ່ບໍ່ແມ່ນເງິນຕາ ເຊັ່ນ: ກົດລະບຽບທີ່ເຮັດໃຫ້ສິນຄ້າຂອງສະຫະລັດ ເຂົ້າສູ່ຕະຫຼາດໄດ້ຍາກຂຶ້ນ.
ພ້ອມທ່ານຍັງກ່າວຕື່ມວ່າ: ອັດຕາພາສີທີ່ກຳນົດໃໝ່ຍັງເປັນພຽງເຄິ່ງໜຶ່ງຂອງອັດຕາທີ່ປະເທດເຫຼົ່ານັ້ນເກັບຄ່າສິນຄ້າຂອງສະຫະລັດ ໂດຍລະບຸວ່າອັດຕາພາສີທີ່ກຳນົດໃໝ່ຂອງສະຫະລັດ “ເປັນແບບໃຈດີ”
ການເກັບພາສີຄັ້ງນີ້ຖືວ່າ ສປປ ລາວ ເຮົາຈະໄດ້ຮັບຜົນກະທົບສູງສຸດ ເປັນອັນດັບ 2 ຂອງອາຊຽນ, ໂດຍ ສປປ ລາວ ມີອັດຕາການເກັບພາສີນຳເຂົ້າສະຫະລັດເພີ່ມຂຶ້ນຢູ່ທີ່ 48% ຮອງຈາກ ກຳປູເຈຍ ມີອັດຕາເພີ່ມຂຶ້ນຢູ່ 49% ແລະ ພາສີຂອງສະຫະລັດທີ່ນຳເຂົ້າ ສປປ ລາວ ຄິດໄລ່ລວມຈະຢູ່ທີ່ 95% (ລວມພາສີ-ອາກອນ ນະໂຍບາຍອື່ນ), ແຕ່ກໍມີສິນຄ້າບາງປະເພດແມ່ນໜ້ອຍກວ່າ 95%.
ຫຼາຍປີຜ່ານມາ, ລາວໄດ້ພະຍາຍາມຂະຫຍາຍຖານການສົ່ງອອກ ໂດຍສະຫະລັດ ກາຍມາເປັນພັນທະມິດທາງການຄ້າທີ່ສຳຄັນ ສິນຄ້າສົ່ງອອກຫຼັກຂອງປະເທດລາວ ສຳລັບສິນຄ້າສົ່ງອອກສູ່ສະຫະລັດ ໄດ້ແກ່: ເກີບ, ເຟີນິເຈີໄມ້, ຜ້າແພ ແລະ ສ່ວນປະກອບເອເລັກໂທຣນິກ ຢ່າງໃດກໍຕາມ ການເກັບພາສີນຳເຂົ້າ ທຸລະກິດຂອງ ສປປ ລາວ ອາດປະເຊີນກັບການສັ່ງຊື້ທີ່ຫຼຸດລົງ ຕົວຢ່າງກາເຟລາວ ເຊິ່ງເປັນສິນຄ້າສົ່ງອອກທີ່ສຳຄັນຂອງປະເທດ ອາດໄດ້ຮັບຜົນກະທົບຢ່າງຫຼວງຫຼາຍ ເນື່ອງຈາກສະຫະລັດເປັນຜູ້ບໍລິໂພກກາເຟລາວທີ່ມີຄຸນນະພາບສູງ ແຕ່ຕົ້ນທຶນເພີ່ມຂຶ້ນຈາກການເພີ່ມຂຶ້ນຂອງພາສີ ອາດຈະເຮັດໃຫ້ ຜູ້ຊື້ຫັນໄປຫາຜູ້ຂາຍລາຍອື່ນເຊັ່ນ: ປະເທດໂຄລອມເບຍ.
ສຳລັບການເກັບພາສີພຶ້ນຖານໃນບັນດາອາຊຽນມີດັ່ງນີ້: ກຳປູເຈຍ 49%, ລາວ 48%, ຫວຽດນາມ 46%, ມຽນມາ 44%, ໄທ 36%, ອິນໂດເນເຊຍ 32%, ບູໄນ 24%, ມາເລເຊຍ 24%, ຟິລິບປິນ 17% ແລະ ສິງກາໂປ 10%. ຄາດວ່າຈະເລີ່ມເກັບພາສີໃນວັນທີ 9 ເມສາ 2025 ເປັນຕົ້ນໄປ ແລະ ຈະບັງຄັບໃຊ້ກັບ 60 ປະເທດທັງໝົດ ສ່ວນພາສີພຶ້ນຖານ 10% ຈະມີຜົນບັງຄັບໃຊ້ໃນວັນທີ 5 ເມສາ 2025.
ຢ່າງໃດກໍຕາມ ການປະກາດເກັບພາສີຈຳນວນຫຼາຍ ຂອງ ທ່ານ ໂດນັລ ທຣຳ ໄດ້ສ້າງຄວາມພັນແປໃຫ້ກັບຕະຫຼາດການເງິນ ແລະ ທຸລະກິດທີ່ມີການເພິ່ງພາຂໍ້ຕົກລົງທາງການຄ້າທີ່ມີຢູ່ຕັ້ງແຕ່ 50 ປີທີ່ຜ່ານມາ.