ທ່ານ ນາງ ວາລີ ເວດສະພົງ, ສະມາຊິກສະພາແຫ່ງຊາດ ໄດ້ປະກອບຄໍາເຫັນຕໍ່ກອງປະຊຸມກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ລະຫວ່າງວັນທີ 16-24 ທັນວາ 2024 ໂດຍສະເໜີໃຫ້ພາກສ່ວນກ່ຽວຂ້ອງກວດກາຄືນລາຄາສິນຄ້າຕາມທ້ອງຕະຫຼາດໃນນະຄອນຫຼວງວຽງຈັນ ຍັງມີທ່າອ່ຽງເພີ່ມຂຶ້ນ, ເຖີງວ່າອັດຕາແລກປ່ຽນໄດ້ຮັບການແກ້ໄຂດີຂຶ້ນກວ່າເກົ່າແລ້ວກໍຕາມ.
ປັດຈຸບັນນີ້, ອັດຕາແລກປ່ຽນດີຂຶ້ນ ຫຼື ສະຫງົບແລ້ວ, ຜ່ານມາຊາວຄ້າຂາຍອ້າງວ່າ: ລາຄາສິນຄ້າເພີ່ມຂຶ້ນຍ້ອນອັດຕາແລກປ່ຽນເພີ່ມຂຶ້ນ. ກົງກັນຂ້າມເມື່ອອັດຕາແລກປ່ຽນຫຼຸດລົງ ແຕ່ລາຄາສິນຄ້າຍັງບໍ່ຍອມຫຼຸດລົງເທື່ອ.ສະນັ້ນ, ພາກສ່ວນທີ່ກ່ຽວຂ້ອງຂອງລັດຄວນໄປກວດກາຄືນວ່າຕົ້ນທຶນຂອງເຂົາເຈົ້າເທົ່າໃດແທ້. ເຖີງວ່າພວກເຮົາເພີ່ມເງິນອຸດໜູນຫຼາຍເທົ່າໃດກໍບໍ່ສາມາດແກ້ໄຂຊີວິດການເປັນຢູ່ຂອງພະນັກງານລັດ-ລັດຖະກອນ ແລະ ທະຫານ, ຕໍາຫຼວດໄດ້.
ສະນັ້ນ ວິທີການແກ້ໄຂຕ້ອງໄດ້ເຮັດໂຄງສ້າງລາຄາສິນຄ້າ ເຊິ່ງອາດເລີ່ມຈາກສິນຄ້າຈໍາເປັນທີ່ກະທົບຊີວິດການເປັນຢູ່ປະຈໍາວັນກ່ອນ ເຊັ່ນ: ເຂົ້າ, ຊີ້ນ, ພືດຜັກ ແລະ ອື່ນໆ, ເພາະມັນກະທົບຫຼາຍຕໍ່ພະນັກງານ-ລັດຖະກອນ ໂດຍສະເພາະຜູ້ທີ່ອາໃສໃນຕົວເມືອງທີ່ອາໄສເງິນເດືອນເປັນຕົ້ນຕໍ, ສ່ວນຜູ້ທີ່ອາໃສຢູ່ເຂດນອກອາດຈະກະທົບໜ້ອຍກວ່າເພາະສາມາດຊອກຫາອາຫານຕາມທໍາມະຊາດໄດ້. ພວກເຮົາມີຄວາມຈໍາເປັນຕ້ອງຈັດສັນຕະຫຼາດ ເປັນຕະຫຼາດຂາຍຍົກ ແລະ ຂາຍຍ່ອຍ, ເພາະຫຼາຍປະເທດໄດ້ເຮັດແບບນີ້.ເນື່ອງຈາກການຜະລິດສາມາດເຂົ້າມາຫາຕະຫຼາດຂາຍຍົກໂດຍກົງ, ຈາກນັ້ນຕະຫຼາດຂາຍຍົກສາມາດຈັດສັນລາຄາຕາມສິນຄ້າປະເພດຕ່າງໆໄດ້ ແລະ ເຮັດໃຫ້ກໍານົດລາຄາສິນຄ້າໄດ້ງ່າຍ, ເຊັ່ນດຽວກັບການຂໍທະບຽນວິສາຫະກິດ, ຖ້າຂໍທະບຽນວິສາຫະກິດຂາຍຍົກຕ້ອງໃຫ້ມີແຕ່ຂາຍຍົກ, ຖ້າຈະຂາຍຍ່ອຍຕ້ອງຂໍອີກທະບຽນໜຶ່ງ. ທັງໝົດນີ້ຈະເຮັດໃຫ້ສະດວກໃນການກໍານົດໂຄງສ້າງລາຄາສິນຄ້າໄດ້ງ່າຍ.
ຕໍ່ການສະເໜີດັ່ງກ່າວ, ທ່ານ ນາງ ວັນມະນີ ພິມມະສານ, ຫົວໜ້າພະແນກອຸດສາຫະກໍາ ແລະ ການຄ້າ ນະ ຄອນຫລວງວຽງຈັນ ຊີ້ແຈງວ່າ: ໃນໄລຍະຜ່ານມາບັນຊີສິນຄ້າທີ່ມີການຕິດຕາມແມ່ນຍັງບໍ່ສາມາດກໍານົດລາຄາຂາຍໃຫ້ເຂົາເຈົ້າ, ແຕ່ພະແນກອຸດສາຫະກໍາ ແລະ ການຄ້າ, ໃນນາມເປັນກອງເລຂາຄະນະຄຸ້ມຄອງລາຄາສິນຄ້າ ໄດ້ປະສານງານກັບເຈົ້າໜ້າທີ່ພາສີເພື່ອກວດກາການນໍາເຂົ້າສິນຄ້າຂອງບັນດາບໍລິສັດ. ເຊິ່ງມີພຽງ 6 ລາຍການທີ່ຕິດພັນກັບການກິນຢູ່ປະຈໍາວັນ ເຊັ່ນ: ນໍ້າປາ, ແປ້ງນົວ, ນໍ້າມັນພືດ ແລະ ອື່ນໆ, ເພື່ອກວດກາເບິ່ງໂຄງປະກອບລາຄາຕາມນັ້ນ ແລະ ເບິ່ງລາຄາຕົວຈິງຕາມທ້ອງຕະຫຼາດ, ຖ້າລາຄາຢູ່ໃນລະດັບຕາມທີ່ບໍລິສັດແຈ້ງມາໃຫ້ພະແນກທີ່ກ່ຽວຂ້ອງແມ່ນສາມາດຈໍາໜ່າຍໄດ້ ແລະ ບໍ່ສາມາດປະຕິບັດລະບຽບຕໍ່ບໍລິສັດນໍາເຂົ້າໄດ້, ນອກເໜືອຈາກບໍລິສັດມີເຈດຕະນາເຮັດໃຫ້ສິນຄ້າຂາດຕະຫຼາດ ເພື່ອໃຫ້ລາຄາສິນຄ້າເພີ່ມຂຶ້ນ ຫຼື ເຂົ້າໃນຮູບແບບກັກຕຸນສິນຄ້າ, ເຊິ່ງກໍລະນີແບບນີ້ແມ່ນສາມາດດໍາເນີນການຕາມລະບຽບກົດໝາຍໄດ້.
ສ່ວນເລື່ອງນິຕິກໍາກ່ຽວກັບການຂາຍຍົກ-ຂາຍຍົກ, ປັດຈຸບັນກະຊວງທີ່ກ່ຽວຂ້ອງພວມປັບປຸງນິຕິກໍາດັ່ງກ່າວຢູ່ ເພາະປັດຈຸບັນຢູ່ນະຄອນຫຼວງວຽງຈັນ ມີຕະຫຼາດຂາຍຍົກພຽງ 3 ແຫ່ງ ຄື: ຕະຫຼາດອົດຊີ, ຕະຫຼາດໄຮຄໍາ ແລະ ຕະຫຼາດລາວ, ເຊິ່ງສາມຕະຫຼາດດັ່ງກ່າວສາມາດເປີດບໍລິການ 24 ຊົ່ວໂມງ ແລະ ສາມາດຂາຍຍົກ ແລະ ຂາຍຍ່ອຍຄວບຄູ່ກັນ. ຢ່າງໃດກໍຕາມ, ຖ້າກະຊວງກ່ຽວຂ້ອງປັບປຸງນິຕິກໍາກ່ຽວກັບການຂາຍຍົກ-ຂາຍຍ່ອຍສໍາເລັດ ຈະໄດ້ປະຕິບັດຕາມທີ່ນິຕິກໍາວາງອອກ.
ຂ່າວ: @FM90