ໃນວັນທີ 5 ຕຸລາຜ່ານມາ ເຈົ້າໜ້າທີ່ ປກສ ເມືອງ ອຸທຸມພອນ (ເຊໂນ) ແຂວງສະຫວັນນະເຂດ ໄດ້ສຶກສາອົບຮົມກຸ່ມມົ້ວສຸມສິ່ງເສບຕິດຫຼາຍປະພດເຊັ່ນ: ໃບກະທ້ອມ, ນໍ້າກະທ້ອມ ຫຼື ສານລະເຫີຍທີ່ມີສານເສບຕິດອື່ນໆ ເປັນຕົ້ນ: ປຸ່ມເປົ້າອັດແກັສສານໄນຕຼັດອອກໄຊ, ຢາສູບໄຟຟ້າ-ຊີຊ່າ (ບາລາກູ).
ທ່ານ ພັນໂທ ສົມສັກ ຈັນທະລາສອນ ຫົວໜ້າກອງບັນຊາການ ປກສ ເມືອງ ໄດ້ລາຍງານໃຫ້ຮູ້ວ່າ: ກຸ່ມທີ່ມົ້ວສຸມສິ່ງເສບຕິດຖືກເຈົ້າໜ້າທີ່ກັກໂຕນໍາມາສຶກສາອົບຮົມຄັ້ງນີ້, ມີທັງໝົດ 70 ຄົນ, ຍິງ 28 ຄົນ, ພ້ອມດ້ວຍຍານພາຫະນະລົດຈັກ 33 ຄັນ, ລົດໃຫຍ່ 7 ຄັນ. ໃນນີ້ ຜູ້ມາໃຊ້ບໍລິການທີ່ມີອາຍຸຕໍ່າກວ່າ 18 ປີ ມີ 5 ຄົນ, ຍິງ 3 ຄົນ, ນອກນີ້ ທາງເຈົ້າໜ້າທີ່ ຍັງໄດ້ກວດສານເສບຕິດ 1 ຂີດ, ມີ 39 ຄົນ ຍິງ 8 ຄົນ,ກວດສານເສບຕິດ 2 ຂີດ,ມີ 31 ຄົນ ຍິງ 20 ຄົນ.
ສຳລັບການຄຸ້ມຄອງການບໍລິການ ຮ້ານເທັກ-ບາຣ, ຮ້ານຄາຣາໂອເກະ, ຮ້ານກິນດື່ມ ແລະ ຮ້ານບັນເທີງພາຍໃນແຂວງ, ໃຫ້ປິດບໍລິການແສງ, ສີ, ສຽງໃນເວລາ 23:30 ໂມງ ຮອດ 24:00 ໂມງ ຕ້ອງປິດສະຖານທີ່ບໍລິການ, ຮ້ານກິນດື່ມ ແມ່ນປິດບໍລິການດ້ານສຽງໃນເວລາ 22:00 ໂມງ, ຫ້າມຜູ້ມາໃຊ້ບໍລິການທີ່ມີອາຍຸຕໍ່າກວ່າ 18 ປີ ເຂົ້າໃຊ້ບໍລິການໃນຮ້ານບັນເທີງ, ຫ້າມນໍາໃຊ້ສະຖານທີ່ເປັນບ່ອນມົ້ວສຸມ ແລະ ສິ່ງທີ່ຜິດກົດໝາຍ, ຖ້າຫາກໃນກໍລະນີຝ່າຝືນຈົນຮອດສາມຄັ້ງ ຈະຖືກຍຸບເລິກການບໍລິການດໍາເນີນທຸລະກິດ ພ້ອມທັງຖອນໃບອະນຸຍາດດໍາເນີນທຸລະກິດຖາວອນ ແລະ ປັບໃໝເປັນເງິນ 10 ລ້ານກີບ.
ແຫຼ່ງຂ່າວ: LNR