ອີງຕາມຂໍ້ມູນຈາກຄະນະກຳມະການ ຄຸ້ມຄອງໄພພິບັດຂັ້ນສູນກາງ ລາຍງານໃນວັນທີ 30 ສິງຫາ 2024 ໃຫ້ຮູ້ວ່າ: ຜົນເສຍຫາຍຈາກໄພພິບັດທີ່ເກີດຈາກພະຍຸດີເປຣຊັນ (Depression), ພະຍຸໝູນເຂດຮ້ອນພຣະພິຣຸນ (Prapiroon) ແລະ ຝົນຕົກໜັກ ໃນຄັ້ງວັນທີ 18 ກໍລະກົດ ຫາ 21 ສິງຫາ 2024 ມີທັງໝົດ 13 ແຂວງ ທີ່ໄດ້ຮັບຜົນກະທົບ ຄື: ນະຄອນຫຼວງວຽງຈັນ, ສາລະວັນ, ຄໍາມ່ວນ, ຫຼວງພະບາງ, ຊຽງຂວາງ, ຫົວພັນ, ເຊກອງ, ວຽງຈັນ, ບໍ່ແກ້ວ, ໄຊຍະບູລີ, ບໍລິຄຳໄຊ, ໄຊສົມບູນ ແລະ ແຂວງ ອຸດົມໄຊ.

ໃນຈໍານວນທັງໝົດ 60 ເມືອງ, 541 ບ້ານ, 17,548 ຄອບຄົວ, ພົນລະ ເຮືອນ 36,208 ຄົນ, ຍິງ 15,384 ຄົນ, ເສຍຊີວິດ 03 ຄົນ ແລະ ສູນຫາຍ 01 ຄົນ, ຄອບຄົວຖືກຍົກຍ້າຍຊົ່ວຄາວ 72 ຄອບຄົວ, ເຮືອນ 125 ຫຼັງ, ເນື້ອທີ່ທຳການຜະລິດ 9,763,28 ເຮັກຕາ, ເສັ້ນທາງ 177 ເສັ້ນ, ຂົວ 12 ແຫ່ງ, ຊົນລະປະທານ 79 ແຫ່ງ, ສຸກສາລາ 02 ແຫ່ງ, ນໍ້າລິນ 30 ແຫ່ງ, ໜອງປາ 334 ໜອງ, ສັດລ້ຽງ (ງົວ, ຄວາຍ, ແບ້, ໝູ ແລະ ສັດປີກ ) ລວມຈໍານວນ 13.478 ໂຕ ທີ່ໄດ້ຮັບຜົນກະທົບ ແລະ ຜົນເສຍຫາຍ; ຄາດຄະເນມູນຄ່າຜົນກະທົບ, ຜົນເສຍຫາຍເບື້ອງຕົ້ນແມ່ນ 318,615,427,690 ກີບ.