ສປປ ລາວ ເປັນເຈົ້າພາບ ຈັດກອງປະຊຸມສະພາປະຊາຄົມ ວັດທະນະທຳ-ສັງຄົມອາຊຽນ ຮ່ວມກັບ ລັດຖະມົນຕີ ປະທານຂະແໜງການຂອງເສົາຄໍ້າ ວັດທະນະທຳ-ສັງຄົມອາຊຽນ, ຜູ້ຊົງຄຸນວຸທິ ແລະ ສະມາຊິກລັດຖະສະພາອາຊຽນ ເພື່ອປຶກສາຫາລື ພັດທະນາແຜນຍຸດທະສາດປະຊາຄົມວັດທະນະທຳ-ສັງຄົມອາຊຽນ ຫລັງປີ 2025 ໃນວັນທີ 13 ສິງຫາ 2024 ຢູ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໂດຍມີ ບັນດາລັດຖະມົນຕີສະພາປະຊາຄົມວັດທະນະທຳ-ສັງຄົມອາ ຊຽນ, ລັດຖະມົນຕີປະທານຂະແໜງການຂອງ ເສົາຄ້ຳວັດທະນະທຳ-ສັງຄົມອາຊຽນ, ລັດຖະມົນຕີກະ ຊວງ ກະຊວງສາມັກຄີ ແລະ ການມີສ່ວນຮ່ວມທາງສັງຄົມ ແຫ່ງ ຕີມໍ ເເລັດສະເຕ, ພ້ອມດ້ວຍຫົວໜ້າຄະນະຜູ້ແທນອາຊຽນ ແລະ ຜູ້ຕາງໜ້າຈາກກອງເລຂາອາຊຽນ ເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ ໄດ້ມີຄຳເຫັນວ່າ: ກອງປະຊຸມ ໃນຄັ້ງນີ້, ເປັນວາລະພິເສດ ແລະ ເປັນຄັ້ງທຳອິດ ທີ່ໄດ້ຈັດຮ່ວມກັບບັນດາ ປະທານຂະແໜງການຂອງເສົາຄ້ຳວັດທະນະທຳ-ສັງຄົມອາຊຽນ ເພື່ອພ້ອມກັນ ປຶກສາຫາລື, ແລກປ່ຽນທັດສະນະ ແລະ ຂໍ້ສະເໜີ ທີ່ເປັນທິດທາງຍຸດທະສາດ ຂອງປະຊາຄົມວັດທະນະທຳ-ສັງຄົມອາຊຽນ ຫລັງປີ 2025 ເຊິ່ງເປັນປັດໄຈສຳຄັນທີ່ສຸດ ເຊິ່ງບັນດາທິດທາງຍຸດທະສາດເຫລົ່ານັ້ນ, ຈະຖືກຄັດຈ້ອນເປັນຍຸດທະສາດຂອງຂະແໜງການ ເພື່ອຮັບປະກັນ ແລະ ຮັກສາໄດ້ ປະຊາຄົມວັດທະນະທຳ-ສັງຄົມອາຊຽນ ໃຫ້ມີຄວາມເຂັ້ມແຂງ, ແຂງແກ່ນ, ຍືນຍົງ, ກວມລວມ ແລະ ປັບຕົວໄດ້ທຸກສະພາບການ, ທັງເພີ່ມທະວີ ການຄາດຄະເນລ່ວງໜ້າຂອງຍຸດທະສາດ ທີ່ເປັນສິ່ງທ້າທາຍ ແລະ ທ່າແຮງບົ່ມຊ້ອນ ໃນພາກພື້ນ ແລະ ທົ່ວໂລກ, ທັງເປັນການ ຊອກຫາວິທີທາງໃນອະນາຄົດ ທີ່ຈະເປັນໄປໄດ້ ເພື່ອສະໜັບສະໜູນ ໃຫ້ແກ່ການພັດທະນາຍຸດທະສາດ, ນະໂຍບາຍ ແລະ ການແກ້ໄຂບັນຫາ.
ທ່ານ ນາງ ສວນສະຫວັນ ວິຍະເກດ ຍັງໃຫ້ຮູ້ອີກວ່າ: ກອງປະຊຸມ ໃນຄັ້ງນີ້, ໄດ້ຍົກໃຫ້ເຫັນ ຄວາມສຳຄັນຂອງການຄາດການລ່ວງໜ້າ ຂອງຍຸດທະສາດ ທີ່ຈະສ່ອງແສງເຖິງການປ່ຽນແປງຂອງປະຊາຄົມອາຊຽນ ຫລັງປີ 2025 ແລະ ການຈັດຕັ້ງປະຕິບັດແຜນຍຸດທະສາດດັ່ງກ່າວ ເຊິ່ງໂດຍລວມແລ້ວໄດ້ສະແດງໃຫ້ເຫັນເຖິງການຮັບປະກັນ ໃນການດຳເນີນງານຢ່າງແຂງແຮງ ຂອງບັນດາແຜນຍຸດທະສາດ ຂອງຂະແໜງການຂອງຕົນ, ບັນຫາຊໍ້າຊ້ອນເສົາຄ້ຳ ແລະ ການເຊື່ອມຈອດອາຊຽນ. ພ້ອມນິີ້, ຍັງໄດ້ຍົກໃຫ້ເຫັນບັນດາບາດກ້າວສຳຄັນ ແລະ ຂໍ້ສະເໜີ ໂດຍສະເພາະ ການແກ້ໄຂທ່າອ່ຽງ ແລະ ສິ່ງທ້າທາຍຕ່າງໆ ເພື່ອຮັບປະກັນໃຫ້ມີການພັດທະນາຊັບພະຍາກອນມະນຸດ ແລະ ການພັດທະນາແບບຍືນຍົງ ລວມທັງ ການຜັນຂະຫຍາຍ ວຽກງານຂອງເສົາຄໍ້າວັດທະນະທຳ-ສັງຄົມອາຊຽນ ໃຫ້ດີຂຶ້ນເປັນກ້າວໆ.
ການປຶກສາຫາລືໃນຄັ້ງນີ້, ເປັນຂີດໝາຍສຳຄັນ ຂອງເສົາຄ້ຳປະຊາຄົມວັດທະນະທຳ-ສັງຄົມ ອາຊຽນ ເພື່ອແລກປ່ຽນ ແລະ ຍົກສູງຄຸນນະພາບຊີວິດການເປັນຢູ່ຂອງປະຊາຊົນອາຊຽນ ລວມເຖິງ ການເຊື່ອມໂຍງໃນພາກພື້ນ ແລະ ຄວາມເປັນແກນກາງຂອງອາຊຽນ.
ແຫຼ່ງຂ່າວ: MediaLAOS