ໂຄງການຜະລິດເຂົ້າ ແລະ ຜະລິດສັດແມ່ນຫນຶ່ງໃນຄຳຕອບທີ່ຈະຊ່ວຍຍູ້ໜູນວຽກງານການແກ້ໄຂ ຄວາມທຸກຍາກ
ແລະຄວາມອຶດຫິວຂອງປະຊາຊົນເປັນເຄື່ອງມືຂອງລັດໃນການບັນລຸເປົ້າໝາຍ ຄ້ຳປະກັນຄວາມໝັ້ນຄົງດ້ານສະບຽງ
ອາຫານແຫ່ງຊາດໃນໄລຍະຍາວ ທັງເປັນເງື່ອນໄຂໃນການສ້າງແຫຼ່ງລາຍໄດ້ເພີ່ມໃຫ້ແກ່ປະຊາຊົນຜູ້ ທຸກຍາກນຳອີກ.
ວັນທີ 10 ທັນວາ 2014 ມື້ທີສອງການດຳເນີນກອງປະຊຸມສະພາ ທ່ານ ສົມສະຫວາດ ເລັ່ງສະຫວັດ ຮອງນາຍົກ ລັດຖະ
ມົນຕີຜູ້ຊີ້ນຳວຽກງານເສດຖະກິດການຜະລິດ ແລະ ການຈໍລະຈອນທັງເປັນຫົວໜ້າຄະນະປະສານງານຂັ້ນສູນກາງ
ເພື່ອປະຕິບັດ ໂຄງການສົ່ງເສີມການຜະລິດເປັນສິນຄ້າ ແລະ ໂຄງການຄ້ຳປະກັນດ້ານສະບຽງອາຫານໄດ້ເປັນກຽດ
ລາຍງານ ແລະ ໃຫ້ຂໍ້ມູນເພີ່ມເຕີມເຖິງຈຸດປະສົງ, ເນື້ອໃນ ແລະ ມາດຕະການກໍຄືນະໂຍບາຍຂອງໂຄງການຜະລິດເຂົ້າ
ແລະ ຜະລິດສັດທີ່ທ່ານລັດຖະມົນຕີວ່າການກະຊວງກະສິກຳ ແລະ ປ່າໄມ້ໄດ້ສະເໜີລາຍງານຕໍ່ທີ່ປະຊຸມໃນມື້ກ່ອນ.
ທັງນີ້ ທ່ານຮອງນາຍົກກ່າວວ່າ: ໂຄງການຜະລິດເຂົ້າ ແລະ ຜະລິດສັດທີ່ກຳລັງດຳເນີນຂະນະນີ້ແມ່ນໄດ້ສ້າງຂຶ້ນ ເພື່ອ
ເປົ້າໝາຍຄ້ຳປະກັນຄວາມໝັ້ນຄົງດ້ານສະບຽງອາຫານແຫ່ງຊາດໃນໄລຍະຍາວ ແລະ ທັງເປັນການສ້າງເງື່ອນໄຂ ເພື່ອ
ສ້າງແຫຼ່ງລາຍໄດ້ເພີ່ມໃຫ້ກັບປະຊາຊົນຜູ້ທຸກຍາກ ສຳລັບໂຄງການຜະລິດເຂົ້າໄດ້ວາງຄາດໝາຍສູ້ຊົນຍອດການຜະລິດ
ຮອດປີ 2025 ສຳລັບການຄ້ຳປະກັນສະບຽງອາຫານໃຫ້ໄດ້ບໍ່ຫຼຸດ 2,5 ລ້ານໂຕນຕໍ່ປີ ໃນນັ້ນ ເຂົ້າບໍລິໂພກ 2,1 ລ້ານໂຕນ
ແລະ ເຂົ້າແຮໄວ້ປະມານ 4 ແສນໂຕນ.
ແນວໃດກໍດີ ເພື່ອບັນລຸເປົ້າໝາຍ ດັ່ງກ່າວ ທ່ານ ສົມສະຫວາດ ເລັ່ງສະຫວັດ ລະບຸວ່າ: ອັນທຳອິດຕ້ອງກຳນົດ ແບ່ງເຂດ
ການຜະລິດສະເພາະ ໂດຍມີການຄຸ້ມຄອງ ແລະ ປົກປ້ອງບໍ່ໃຫ້ຫັນໄປໃຊ້ໃນເປົ້າໝາຍອື່ນ ໂດຍສະເພາະແມ່ນດິນປູກເຂົ້າ
ໃນເຂດຊົນລະປະທານ ໂດຍໄດ້ເລືອກເອົາຈຸດສຸມປູກເຂົ້າໃນ 10 ແຂວງມີເນື້ອທີ່ນາ 6 ແສນເຮັກຕາ ນອນຢູ່ໃນບັນດາ
ແຂວງທົ່ງພຽງໃຫຍ່, ທົ່ງພຽງປານກາງ ແລະ ທົ່ງພຽງນ້ອຍໃນທົ່ວປະເທດ.
ໄປຄຽງຄູ່ກັນນັ້ນ ກໍຕ້ອງກຳນົດແຜນສະໜອງນ້ຳຊົນລະປະທານເປັນອັນສະເພາະສຳລັບໂຄງການຜະລິດເຂົ້າ; ເອົາໃຈໃສ່
ການຜະລິດ ແລະ ສະໜອງດ້ານແນວພັນເຂົ້າທີ່ມີຄວາມຕ້ອງການປະມານ 17 ພັນໂຕນ ຮອດປີ 2020 ແລະ 30 ພັນໂຕນ
ຮອດປີ 2025.
ສ່ວນໂຄງການລ້ຽງສັດ ທ່ານຮອງນາຍົກກ່າວວ່າ: ພວກເຮົາຈະຕ້ອງໄດ້ດຳເນີນໂຄງການພັດທະນາດ້ານການລ້ຽງສັດ ເພື່ອ
ຍົກລະດັບການຜະລິດສັດລ້ຽງເປັນຟາມ ຈາກປະຈຸບັນປະມານ 90 ພັນໂຕນຕໍ່ປີ ໃຫ້ເພີ່ມຂຶ້ນເທົ່າຕົວ ໃນນີ້ຊີ້ນສັດໃຫຍ່ໃຫ້
ບັນລຸ 5,4 ພັນໂຕນ, ຊີ້ນໝູ 50,3 ພັນໂຕນ, ປາ 56 ພັນໂຕນ ແລະ ສັດປີກ 68,3 ພັນໂຕນ ຫຼື ໃຫ້ກວມເອົາ 30% ຂອງບໍລິ
ມາດການຜະລິດສັດ ແລະ ສັດນ້ຳໃນທົ່ວປະເທດ.
ຂະນະທີ່ ທ່ານ ສົມສະຫວາດ ເລັ່ງສະຫວັດ ເຊື່ອວ່າ: ຖ້າໂຄງການຫາກໄດ້ດຳເນີນໄປຕາມເນື້ອໃນມາດຕະການ ແລະ ນະໂຍ
ບາຍສະເໜີ ແມ່ນຈະສາມາດເຮັດໃຫ້ລາວບັນລຸເປົ້າໝາຍສະຫັດສະວັດທີ 1 ທັງຈະສ້າງປະຖົມປັດໄຈ ແລະ ພື້ນຖານອັນ
ໜັກແໜ້ນໃຫ້ແກ່ການແຂ່ງຂັນຜະລິດສິນຄ້າສະບຽງອາຫານ ແລະ ກະສິກຳທີ່ມີຄຸນນະພາບໄດ້ມາດຕະຖານສາກົນໃນເວ
ລາກ້າວເຂົ້າສູ່ປະຊາຄົມເສດຖະກິດອາຊຽນ ແລະ ຈະເປັນຂໍ້ສະດວກໃຫ້ສາມາດເຄື່ອນໄຫວໄດ້ຢ່າງມີປະສິດທິຜົນໃນຂອບ
ການຄ້າເສລີຕາມກົດລະບຽບຂອງອົງການການຄ້າໂລກ.
ແຫລ່ງຂ່າວ: ເສດຖະກິດ – ສັງຄົມ