ໃນໂອກາດທີ່ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ ໄດ້ເຂົ້າຮ່ວມພິທີປິດກອງປະຊຸມສະຫຼຸບ ຜົນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃນໄລຍະ 3 ປີ (2021-2023) ແລະ ທິດທາງແຜນການຮອດປີ 2025 ຈັດຂຶ້ນໃນວັນທີ 13 ທັນວາ ນີ້ ທີ່ສະໂມສອນກະຊວງປ້ອງກັນຄວາມສະຫງົບ (ປກສ) ພາຍໃຕ້ການເປັນປະທານຂອງທ່ານ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ, ໂດຍມີເຈົ້າແຂວງ, ຮອງເຈົ້າແຂວງ, ບັນດາການນໍາຂັ້ນສູງຈາກກະຊວງຕ່າງໆທີ່ກ່ຽວຂ້ອງ, ການນຳຂັ້ນສູງກະ ຊວງ ປກສ, ຫົວໜ້າກົມ-ຮອງກົມ, ກອງບັນຊາການ ປກສ ແຂວງທົ່ວປະເທດເຂົ້າຮ່ວມ.

ທ່ານ ສອນໄຊ ສີພັນດອນ ໄດ້ເນັ້ນ 9 ບັນຫາ ເພື່ອສືບຕໍ່ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດແຕ່ນີ້ຮອດປີ 2025 ໃຫ້ປະສົບຜົນສໍາເລັດຕາມຄາດໝາຍທີ່ວາງໄວ້ນັ້ນ. ບັນດາສະ ຫາຍຈະຕ້ອງໄດ້ເອົາໃຈໃສ່ຫັນເອົາວາລະແຫ່ງຊາດດັ່ງກ່າວເຂົ້າເປັນທິດທາງແຜນການ, ແຜນງານ, ໂຄງການໃຫ້ເປັນອັນລະອຽດຂອງກະຊວງ, ຂອງແຂວງ, ຂອງຂະແໜງການທີ່ກ່ຽວຂ້ອງ ເພື່ອນໍາມາເປັນທິດທາງແຜນການໃນຊຸມປີຕໍ່ໜ້າຄື:

1) ໃຫ້ກວດກາຄືນຜົນການຈັດຕັ້ງປະຕິບັດວາລະແຫ່ງຊາດໃນໄລຍະຜ່ານມາ ເພື່ອຊອກໃຫ້ເຫັນດ້ານອ່ອນ-ຂໍ້ຄົງຄ້າງ, ສິ່ງທ້າທາຍ, ສາເຫດ, ບົດຮຽນທີ່ຖອດຖອນໄດ້ ເພື່ອເປັນບົດຮຽນໃຫ້ແກ່ການວາງທິດທາງ, ແຜນການ, ວິທີການ, ມາດຕະການແກ້ໄຂບັນຫາຢາເສບຕິດໃຫ້ມີປະສິດທິພາບ, ປະສິດທິຜົນຫຼາຍຂຶ້ນກວ່າເກົ່າ;

2) ໃຫ້ທົບທວນຄືນ 6 ແຜນວຽກຈຸດສຸມ ເພື່ອປັບປຸງໃຫ້ສອດຄ່ອງກັບສະພາບການຕົວຈິງໃນປັດຈຸ ບັນ ແລະ ຕໍ່ໜ້າ ໂດຍຫັນເປັນໂຄງການ, ແຕ່ລະໂຄງການຕ້ອງມີແຜນການ, ແຜນງົບປະມານ, ແຜນບຸກຄະລາກອນ ແລະ ມີຄາດໝາຍສູ້ຊົນຢ່າງລະອຽດ, ຈະແຈ້ງ ພ້ອມທັງມອບໝາຍໃຫ້ພາກສ່ວນຮັບຜິດຊອບນໍາໄປຈັດຕັ້ງປະຕິບັດແຕ່ຫົວທີ;

3) ໃຫ້ສືບຕໍ່ກໍານົດສິດ, ໜ້າທີ່ ແລະ ຄວາມຮັບຜິດຊອບຂອງຄະນະກໍາມະການແກ້ໄຂຢາເສບຕິດລະດັບຊາດໃຫ້ລະອຽດ, ຈະແຈ້ງ ແລະ ສືບຕໍ່ແຕ່ງຕັ້ງຄະນະກໍາມະການແກ້ໄຂຢາເສບຕິດລະດັບທ້ອງ ຖິ່ນໃຫ້ຄົບຊຸດ ໂດຍມີທຸກຂະແໜງການທີ່ກ່ຽວຂ້ອງຂອງທ້ອງຖິ່ນເຂົ້າຮ່ວມນໍາ ເພື່ອຮັບປະກັນການຈັດຕັ້ງປະຕິ ບັດວາລະແຫ່ງຊາດແຕ່ນີ້ຮອດປີ 2025 ໃຫ້ມີຄວາມເປັນເອກະພາບ, ຕໍ່ເນື່ອງ, ມີປະສິດທິພາບ, ປະສິດທິຜົນສູງ;

4) ເອົາໃຈໃສ່ເພີ່ມທະວີຄວາມຮັບຜິດຊອບ ແລະ ຄວາມສາມາດໃນການນໍາພາ-ຊີ້ນຳຂອງຄະນະພັກ-ຄະ ນະນໍາແຕ່ລະກະຊວງ, ອໍານາດການປົກຄອງທ້ອງຖິ່ນແຕ່ລະຂັ້ນໃຫ້ສູງຂຶ້ນກວ່າເກົ່າ, ຖືເອົາວາລະແຫ່ງຊາດ ເປັນມາດຕະຖານເງື່ອນໄຂໜຶ່ງເຂົ້າໃນການສ້າງຂະບວນການແຂ່ງຂັນຮັກຊາດ ແລະ ພັດທະນາ, ກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນຕິດພັນກັບການສ້າງບ້ານ, ສ້າງໂຮງຮຽນ ແລະ ສະຖານທີ່ປອດຢາເສບຕິດ ໂດຍສູ້ຊົນສ້າງບ້ານປອດຢາເສບຕິດໃຫ້ໄດ້ 80% ຂອງບ້ານທົ່ວປະເທດ; ສ້າງເປັນສໍານັກງານອົງການປອດຢາເສບຕິດໃຫ້ໄດ້ 100%; ສ້າງໂຮງຮຽນ, ສະຖາບັນການສຶກສາປອດຢາເສບຕິດໃຫ້ໄດ້ 95% ຂຶ້ນໄປ. ພ້ອມນີ້, ໃຫ້ເອົາໃຈໃສ່ສ້າງຂະບວນແຂ່ງຂັນໃຫ້ມີບັນຍາກາດຟົດຟື້ນຢ່າງຕໍ່ເນື່ອງ, ມີການເຂົ້າຮ່ວມຂອງທຸກອົງການຈັດຕັ້ງພັກ-ລັດ, ທຸກພາກສ່ວນໃນສັງຄົມຢ່າງກວ້າງຂວາງ, ມີນະໂຍບາຍທີ່ເໝາະສົມຕໍ່ຜູ້ເຮັດໄດ້ດີ ແລະ ປະຕິບັດວິໄນຕໍ່ຜູ້ລ່ວງລະເມີດ;

5) ເພີ່ມທະວີການໂຄສະນາ-ເຜີຍແຜ່ຜົນຮ້າຍຂອງຢາເສບຕິດ ແລະ ຈັດພິມສື່ໂຄສະນາຕ່າງໆ ທີ່ຕິດພັນກັບວາລະແຫ່ງຊາດໃຫ້ໄດ້ 80% ຂຶ້ນໄປຕາມແຜນການທີ່ວາງໄວ້;

6) ປະສານສົມທົບກັບທ້ອງຖິ່ນຢ່າງໃກ້ຊິດເພື່ອຕິດຕາມ, ເຝົ້າລະວັງ, ສະກັດກັ້ນ ແລະ ແກ້ໄຂການລັກລອບປູກພືດທີ່ມີສານເສບຕິດຢູ່ບັນດາແຂວງພາກເໜືອ, ພາກກາງໃຫ້ຫຼຸດລົງໃນແຕ່ລະປີ, ໃຫ້ກວດກາຄືນບັນດາໂຄງການພັດທະນາທາງເລືອກທົດແທນ ການປູກພືດທີ່ມີສານເສບຕິດເຊັ່ນ: ໂຄງການຮ່ວມມືລາວ-ຈີນ, ໂຄງການຮ່ວມມືລາວ-ສະຫະປະຊາຊາດ (ສປຊ) ແລະ ໂຄງການອື່ນໆໃຫ້ມີຜົນສໍາເລັດສູງ ປະຊາຊົນໄດ້ຮັບຜົນປະໂຫຍດ;

7) ຕິດຕາມ, ກວດກາ, ຄຸ້ມຄອງການບໍລິການຂອງສູນປິ່ນປົວ, ຝຶກວິຊາຊີບຜູ້ຕິດຢາເສບຕິດ ແລະ ການບໍາບັດຂັ້ນຊຸມຊົນຢູ່ໂຮງໝໍເມືອງໃຫ້ມີປະສິດ ທິພາບສູງຂຶ້ນກວ່າເກົ່າ;

8) ເອົາໃຈໃສ່ຕິດຕາມ, ກວດກາ, ຄຸ້ມຄອງການນໍາເຂົ້າ, ສົ່ງອອກ, ນໍາຜ່ານສານເຄມີຕົ້ນທີ່ເອົາເຂົ້າມາພັດທະນາດ້ານອຸດສາຫະກໍາ, ບໍ່ແຮ່, ການແພດ ແລະ ອື່ນໆ ຮ່ວມກັບພາກສ່ວນກ່ຽວຂ້ອງໃຫ້ຖືກຕ້ອງຕາມລະບຽບກົດໝາຍ;

9) ເອົາໃຈໃສ່ປະສານງານຮ່ວມມືກັບບັນດາປະເທດເພື່ອນມິດອ້ອມຂ້າງ ສປປ ລາວ ເພື່ອຮ່ວມກັນສະກັດກັ້ນ ແລະ ຕ້ານຢາເສບຕິດ ແລະ ສານເຄມີຕົ້ນຕາມບໍລິເວນຊາຍແດນລະຫວ່າງປະເທດ. ພ້ອມທັງສືບຕໍ່ຈັດຕັ້ງປະຕິບັດຕາມສັນຍາໂຄງການແມ່ນໍ້າຂອງ-ແມ່ນໍ້າລ້ານຊ້າງ, ໂຄງການແມ່ນໍ້າຂອງປອດໄພ, ຫ້ອງການປະສານງານຕາມຊາຍແດນ BLO ແລະ ໂຄງການອື່ນໆ ທີ່ ສປປ ລາວ ເຂົ້າຮ່ວມເປັນພາຄີ.