ໃນຕອນບ່າຍຂອງການດຳເນີນ ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 16 ພະຈິກ 2023, ພາຍຫຼັງ ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ໄດ້ສະເໜີຮ່າງກົດໝາຍ ວ່າເຂດເສດຖະກິດພິເສດສະບັບສ້າງໃໝ່, ບັນດາສະມາຊິກສະພາແຫ່ງຊາດ ໄດ້ສຸມໃສ່ປະກອບຄຳເຫັນໃສ່ຮ່າງກົດໝາຍດັ່ງກ່າວຢ່າງກົງໄປກົງມາ ໂດຍສະເພາະ ທ່ານ ຄຳແສນ ສີສະວົງ ສສຊ ປະຈຳເຂດເລືອກຕັ້ງທີ 9 ແຂວງຊຽງຂວາງ ໄດ້ສະເໜີໃຫ້ ມີນະໂຍບາຍ, ກົນໄກຄຸ້ມຄອງບໍລິຫານສະເພາະ ເພື່ອສ້າງເງື່ອນໄຂ ໃຫ້ແກ່ການດຶງດູດນັກລົງທຶນ ຈາກ ທັງພາຍໃນ ແລະ ຕ່າງປະເທດ ທີ່ນຳໃຊ້ເຕັກໂນໂລຊີລະດັບສູງ, ນະວັດຕະກຳ, ຜະລິດເປັນສິນຄ້າ ແລະ ອື່ນໆ. ຫາກລັດຖະບານ ມີນະໂຍບາຍທີ່ຖືກຕ້ອງ, ມີກົດໝາຍທີ່ຮັດກຸມ ຄາດວ່າຈະສາມາດສ້າງຄວາມເຊື້ອໝັ້ນ ໃຫ້ກັບນັກລົງທຶນ ເຂົ້າມາລົງທຶນ ຢູ່ ສປປ ລາວ ກໍຄື ຢູ່ເຂດເສດຖະກິດພິເສດຫຼາຍຂຶ້ນ.
ທ່ານ ຄຳແສນ ສີສະວົງ ຍັງໄດ້ສະແດງຄວາມຊົມເຊີຍ ຕໍ່ກະຊວງແຜນການ ແລະ ການລົງທຶນກໍຄື ຄະນະຮັບຜິດຊອບ ສ້າງຮ່າງກົດໝາຍ ວ່າດ້ວຍເຂດເສດຖະກິດພິເສດ ທີ່ໄດ້ສ້າງກົດໝາຍນີ້ຂຶ້ນມາ ເຊິ່ງເປັນກົດໝາຍທີ່ດີທີ່ສຸດ ແລະ ເໝາະສົມທີ່ສຸດຢູ່ໃນໄລຍະທີ່ເສດຖະກິດ ມີຄວາມຝຶດເຄື່ອງໃນປັດຈຸບັນ ພ້ອມທັງສະເໜີໃຫ້ພິຈາລະນາບາງບັນຫາ ເປັນຕົ້ນຈຸດປະສົງຂອງກົດໝາຍຄວນກຳນົດໃຫ້ມີການຄຸ້ມຄອງ ຫລື ສົ່ງເສີມການລົງທຶນ ໃຫ້ລະບຸຢ່າງຈະແຈ້ງ ເຊິ່ງໃນລັກສະນະຂອງກົດໝາຍ ຕ້ອງໄດ້ຕີລາຄາຢ່າງລະອຽດ ບັນຫາໃດທີ່ພົ້ນເດັ່ນຄວນຄຸ້ມຄອງໃຫ້ຖືກຕ້ອງ, ຊັດເຈນ, ໃຫ້ຢູ່ໃນກອບຂອງກົດໝາຍ, ອັນໃດທີ່ຍັງບໍ່ພົ້ນເດັ່ນເທົ່າທີ່ຄວນ ເຮົາຕ້ອງມີນະໂຍບາຍຊຸກຍູ້ສົ່ງເສີມ ໃຫ້ຫຼາຍຂຶ້ນເພື່ອເຮັດແນໃສ່ດຶງດູດເອົາການລົງທຶນຈາກນັກລົງທຶນໃຫ້ຫຼາຍຂຶ້ນ. ພ້ອມນັ້ນ, ຍັງໄດ້ສະເໜີໃຫ້ປັບປຸງບາງມາດຕາເປັນຕົ້ນ, ການກຳນົດເນື້ອທີ່ ເຂດເສດຖະກິດພິເສດໃຫ້ກຳນົດໄລຍະເວລາການສຳປະທານເນື້ອທີ່ສຳປະທານໃຫ້ລະອຽດ, ຍຸຕິທຳ ແລະ ອື່ນໆ. ພ້ອມນີ້, ຍັງໄດ້ມີຄຳເຫັນໃສ່ມາດຕາທີ 22 ເລື່ອງເອກະສານປະກອບການ ເຊັນສັນຍາພັດທະນາເຂດເສດຖະກິດພິເສດ ຕໍ່ກັບບັນຫານີ້, ສະເໜີໃຫ້ມີບົດວິເຄາະສິ່ງແວດລ້ອມທີ່ບົ່ງບອກເຖິງດ້ານດີ ແລະ ດ້ານລົບ, ຜົນເສຍຫາຍ ແລະ ຜົນທີ່ຈະໄດ້ຮັບ ເຊິ່ງຫຼາຍໂຄງການທີ່ເກີດຂຶ້ນຢູ່ ສປປ ລາວ ຍັງເຫັນວ່າ ຍັງບໍ່ຖືເອົາບັນຫານີ້ເປັນສຳຄັນເທົ່າທີ່ຄວນ ທັງນີ້, ແນໃສ່ໃຫ້ຮູ້ເຖິງຜົນທີ່ຈະໄດ້ຮັບ ແລະ ຜົນເສຍຫາຍທີ່ຈະຕາມມາ ຢ່າງລະອຽດ.
ສສຊ ເຂດ 9 ກ່າວຕື່ມວ່າ: ສຳລັບ ອາຍຸການພັດທະນາ ເຂດເສດຖະກິດພິເສດ ສະເໜີໃຫ້ເພີ່ມອາຍຸການພັດທະນາເຂດເສດຖະກິໃຫ້ຫຼາຍກວ່າເກົ່າ ຈາກ 50 ປີ, ຂຶ້ນເປັນ 70-80 ປີ ຕາມຄວາມເໜາະສົມ ເພື່ອດຶງດູດເອົານັກລົງທຶນ ໃຫ້ໄດ້ຫຼາຍທີ່ສຸດ ເນື່ອງຈາກວ່າຖ້າອາຍຸສຳປະທານໜ້ອຍ ນັກລົງທຶນກໍບໍ່ຢາກເຂົ້າມາລົງທຶນ; ສະເໜີໃຫ້ເພີ່ມສິດນຳໃຊ້ ຫຼື ຜົນໄດ້ຮັບໃຫ້ຜູ້ພັດທະນາໃຫ້ຫຼາຍຂຶ້ນກວ່າເກົ່າ ເພື່ອໃຫ້ສົມດູນກັບພັນທະໃນການພັດທະນາເຂດເສດຖະກິດພິເສດ ທັງແນໃສ່ດຶງດູດເອົາການລົງທຶນຈາກພາຍໃນປະເທດ ແລະ ຕ່າງປະເທດ ເຂົ້າມາລົງທຶນ ຢູ່ ສປປ ລາວ ໃຫ້ຫຼາຍຂຶ້ນເພື່ອປະກອບເຮັດໃຫ້ເສດຖະກິດ ຂອງ ສປປ ລາວ ຂະຫຍາຍຕົວຂຶ້ນຢ່າງຕໍ່ເນື່ອງ.
ແຫຼ່ງຂ່າວ ປະເທດລາວ