ເມື່ອບໍ່ດົນທີ່ຜ່ານມາ ໃນ TikTok ມີຄົນທີ່ເອົາຂ່າວຂອງນັກສຶກສາໜຸ່ມທີ່ເສຍຊີວິດໃນປີ 2019 ເນື່ອງຈາກກິນອາຫານປະເພດເສັ້ນສະປາເກັດຕີ້ ທີ່ປະໄວ້ດົນເຖິງ 5 ມື້ ຈຶ່ງສ້າງຄວາມຕົກໃຈແກ່ຜູ້ຊົມຈຳນວນຫຼາຍເມື່ອເຫັນຂ່າວດັ່ງກ່າວ.
ຕໍ່ມາ ທ່ານໝໍດັງໃນ TikTok ທີ່ມີຊື່ວ່າ drjoe_md ຫຼື ໝໍໂຈ ໄດ້ມາອະທິບາຍວ່າ: ອາການບໍ່ສະບາຍຈາກການກິນອາຫານທີ່ປະໄວ້ດົນໆນີ້ມີຊື່ເອີ້ນວ່າ “ໂຣກເຂົ້າຜັດ” (Fried Rice Syndrome) ເຊິ່ງກໍແມ່ນ ອາຫານເປັນພິດທີ່ເກີດຈາກແບັກທີເລຍ ທີ່ຊື່ວ່າ Bacillus Cereus.
Bacillus Cereus ເຊື້ອແບັກທີເລຍຊະນິດນີ້ ພົບໄດ້ໃນອາຫານທີ່ປະໄວ້ໃນອຸນຫະພູມຫ້ອງເປັນເວລາດົນໆ ເຊັ່ນ ເຂົ້າຜັດ ເມື່ອປະໄວ້ດົນເກີນໄປ ແບັກທີເລຍໃນອາຫານກໍຈະປ່ອຍສານຜິດອອກມາໃນຂະນະທີ່ອຸນຫະພູມຂອງອາຫານເລີ່ມເຢັນ ແລະ ເມື່ອກິນເຂົ້າໄປ ກໍຈະເຮັດໃຫ້ມີອາການປວດຮາກ ເຈັບທ້ອງ ແລະ ຖອກທ້ອງ.
ໂດຍອາການເຫຼົ່ານີ້ຈະເກີດຂຶ້ນເມື່ອກິນອາຫານທີ່ມີສານພິດຂອງແບັກທີເລຍຊະນິດນີ້ເຂົ້າໄປປະມານ 2-3 ຊົ່ວໂມງ ເຊິ່ງເປັນໄລຍະເວລາທີ່ຮ່າງກາຍຍ່ອຍອາຫານ ແລະ ອາການນີ້ຈະຢູ່ໄດ້ດົນເຖິງ 24 ຊົ່ວໂມງ.
ນອກນີ້ ໝໍໂຈ ຍັງກ່າວວ່າ ເມື່ອເລີ່ມມີອາການ ຄວນຮີບໄປຫາໝໍທັນທີ ຢ່າປ່ອຍໄວ້ເຖິງວ່າຜູ້ເສຍຊີວິດຈາກໂຣກນີ້ຈະມີໜ້ອຍກໍຕາມ.
ອາຫານທີ່ມີຄວາມສ່ຽງທີ່ຈະມີສານພິດເມື່ອປະໄວ້ດົນ ມີຄື ເຂົ້າ ເສັ້ນສະປາເກັດຕີ້ ເສັ້ນເຝີ ອາຫານທີ່ມີແປ້ງເປັນສ່ວນປະກອບ ເປັນຕົ້ນ.
ໝໍໂຈ ຍັງແນະນຳອີກວ່າ ອາຫານທີ່ປຸງອອກມາແລ້ວ ບໍ່ຄວນປະໄວ້ໃນອຸນຫະພູມຫ້ອງເປັນເວລາດົນເກີນ 2 ຊົ່ວໂມງ ຍິ່ງມີອາກາດຮ້ອນຫຼາຍປານໃດ ກໍຍິ່ງບໍ່ຄວນປະໄວ້ນອກຕູ້ເຢັນດົນໆ ແລະ ຄວນອຸ່ນອາຫານທຸກຄັ້ງກ່ອນກິນ.
ແຫຼ່ງງຂ່າວ BuzzFeed News