ໃນລະຫວ່າງວັນທີ 10 ຫາ 11 ຕຸລາ 2023 ທີ່ຫ້ອງປະຊຸມຂອງ ໂຮງແຮມແລນມາກແມ່ຂອງລີເວີໄຊ, ນະຄອນຫຼວງວຽງຈັນ, ສປປ ລາວ ໄດ້ຈັດກອງປະຊຸມຝຶກອົບຮົມ ພາຍໃຕ້ຫົວຂໍ້ “ການສ້າງຄວາມເຂັ້ມແຂງໃນການຈັດຕັ້ງປະຕິບັດລະບຽບແຫຼ່ງກໍາເນີດສິນຄ້າຂອງຂອບສັນຍາເຂດການຄ້າເສລີອາຊຽນ – ສ.ເກົາຫຼີ” ໃຫ້ພະນັກງານທັງພາກລັດ ແລະ ຜູ້ປະກອບການ SME ຂອງ 03 ປະເທດຄື: ກຳປູເຈຍ, ສປປ ລາວ ແລະ ມຽນມາ. ກອງປະຊຸມຝຶກອົບຮົມຄັ້ງນີ້ໄດ້ດຳເນີນພາຍໃຕ້ການເປັນປະທານຂອງ ທ່ານ ນາງ ມະນີວອນ ວົງໄຊ ຫົວໜ້າກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ, ມີຜູ້ເຂົ້າຮ່ວມທັງໝົດຈຳນວນ 51 ທ່ານ, ໄດ້ຮັບການສະໜັບສະໜູນດ້ານງົບປະມານຈາກ ໂຄງການອາຊຽນ – ສ.ເກົາຫຼີ (Capacity building in implementing AKROO for the frontline officers and SMEs of Cambodia, Lao PDR, and Myanmar).
ຈຸດປະສົງຂອງການຝຶກອົບຮົມ ແມ່ນເພື່ອສ້າງຄວາມຮັບຮູ້ ແລະ ເຂົ້າໃຈ ໃຫ້ແກ່ເຈົ້າໜ້າທີ່ອອກໃບຢັ້ງຢືນແຫຼ່ງກຳເນີດສິນຄ້າ ແລະ ຜູ້ປະກອບການຂອງ ກຳປູເຈຍ, ສປປ ລາວ ແລະ ມຽນມາ, ໃຫ້ມີຄວາມເຂົ້າໃຈ ກ່ຽວກັບ ລະບຽບແຫຼ່ງກຳເນີດສິນຄ້າ ແລະ ຂັ້ນຕອນການອອກໃບຢັ້ງຢືນແຫຼ່ງກຳເນີດສິນຄ້າໃນການສົ່ງອອກໄປຍັງ ປະເທດສະມາຊິກອາຊຽນດ້ວຍກັນ ແລະ ສ.ເກົາຫຼີ ພາຍໃຕ້ສັນຍາເຂດການຄ້າເສລີອາຊຽນ – ສ.ເກົາຫຼີ (ASEAN Korea Free Trade Area: AKFTA) ທີ່ໄດ້ມີການເຈລະຈາຫຼຸດອັດຕາພາສີຂາເຂົ້າ 0% ຂອງລາຍການສິນຄ້າທັງໝົດ.
ເນື້ອໃນການຝຶກອົບຮົມຄັ້ງນີ້ປະກອບມີ: ຄວາມເປັນມາ, ເນື້ອໃນ, ລະບຽບການຂອງສັນຍາ ແລະ ຜົນປະໂຫຍດຂອງຜູ້ປະກອບການທີ່ໄດ້ຮັບ ຈາກສັນຍາ AKFTA ເຊັ່ນ: 1) ລະບຽບແຫຼ່ງກຳເນີດສິນຄ້າ ເຊິ່ງແມ່ນສິນຄ້າທີ່ໄດ້ມາ ຫຼື ຜະລິດຂຶ້ນໂດຍນຳໃຊ້ວັດຖຸດິບພາຍໃນປະເທດທັງໝົດ ຫຼື ສິນຄ້າທີ່ໄດ້ມາ ຫຼື ຜະລິດຂຶ້ນໂດຍບໍ່ໄດ້ນຳໃຊ້ວັດຖຸດິບພາຍໃນປະເທດທັງໝົດ, ການປ່ຽນລະຫັດພາສີ (Change in Tariff Classification: CTC), ການສ້າງມູນຄ່າເພີ່ມພາຍໃນພາກພື້ນບໍ່ຫຼຸດ 40% (Regional Value content 40%: RVC 40%) ແລະ ລະບຽບແຫຼ່ງກຳເນີດສິນຄ້າສະເພາະຜະລິດຕະພັນ (Products Specific Rule: PSR), 2) ການກຳນົດເງື່ອນໄຂແຫຼ່ງກຳເນີດສິນຄ້າ ແລະ 3) ແລກປ່ຽນການຈັດຕັ້ງປະຕິບັດການອອກ ແລະ ຮັບໃບຢັ້ງຢືນແຫຼ່ງກຳເນີດສິນຄ້າ (Form AK) ກັບເຈົ້າໜ້າທີ່ພາສີ, ເຈົ້າໜ້າທີ່ອອກ Form AK ທີ່ມາຈາກ ກະຊວງອຸດສາຫະກໍາ ແລະ ການຄ້າ ຂອງປະເທດກໍາປູເຈຍ, ມຽນມາ, ສ.ເກົາຫຼີ ແລະ ຊ່ຽວຊານຈາກກອງເລຂາອາຊຽນ.
ນອກຈາກນັ້ນ, ເພື່ອໃຫ້ມີຄວາມເຂົ້າໃຈລະອຽດຕື່ມໃນການນຳໃຊ້ໃບຢັ້ງຢືນແຫຼ່ງກໍາເນີດສິນຄ້າໃນຂອບສັນຍານີ້, ກອງປະຊຸມສໍາມະນາໄດ້ມີການແລກປ່ຽນບົດຮຽນຂອງເຈົ້າໜ້າທີ່ອອກໃບຢັ້ງຢືນແຫຼ່ງກຳເນີດສິນຄ້າ ຊຶ່ງກັນ ແລະ ກັນ ເຊັ່ນ: ການກຳນົດເງື່ອນໄຂແຫຼ່ງກຳເນີດສິນຄ້າ, ການກວດກາຄືນແຫຼ່ງກຳເນີດສິນຄ້າ, ການປະຕິເສດ Form AK ຂອງເຈົ້າໜ້າທີ່ພາສີປະເທດຜູ້ນຳເຂົ້າ ແລະ ອື່ນໆ.