ຈາກກໍລະນີທີ່ ຫ້ອງການກະສິກໍາ ແລະ ປ່າໄມ້ເມືອງແອດ ແຂວງຫົວພັນ ໄດ້ອອກແຈ້ງການ, ສະບັບ ເລກທີ 663 ຫກປມ, ລົງວັນທີ 23 ສິງຫາ 2023 ກ່ຽວກັບການຫ້າມການຜະລິດແປຮູບໜໍ່ໄມ້, ການເກັບຊື້-ຂາຍໜໍ່ໄມ້ແຫ້ງຢູ່ພາຍໃນເມືອງແອດ ເຮັດໃຫ້ສັງຄົມມີຄວາມສົນໃຈ ແລະ ເກີດການວິພາກວິຈານຫຼາຍພໍສົມຄວນ.
ຕໍ່ບັນຫານີ້, ທ່ານ ທອງສຸກ ສົມພາວັນ, ເຈົ້າເມືອງ ເມືອງແອດ ໄດ້ຊີ້ແຈງຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 1 ກັນຍາ 2023 ນີ້ວ່າ: ເນື່ອງຈາກໜໍ່ໄມ້ຕາກແຫ້ງຢູ່ເມືອງແອດປີນີ້ ໄດ້ລາຄາດີ ສະເລ່ຍບໍ່ຫຼຸດ 60.000 ກີບຕໍ່ກິໂລ, ທຽບໃສ່ປີຜ່ານມາເພີ່ມຂຶ້ນທົບເຄິ່ງ. ຈາກສະພາບເສດຖະກິດປັດຈຸບັນ ພົບຄວາມຫຍຸ້ງຍາກຫຼາຍຢ່າງ ເຮັດໃຫ້ປະຊາຊົນພາກັນຫຼັ່ງໄຫຼໄປຫາໜໍ່ໄມ້ຫົກ, ໜໍ່ໄມ້ສາງ ແລະ ໜໍ່ໄມ້ປ່ອງຕາມທໍາມະຊາດຢູ່ເຂດລຽບນໍ້າມ້າ ແລະ ນໍ້າແອດຢ່າງເປັນຂະບວນຟົດຟື້ນກວ່າທຸກປີຜ່ານມາ, ທັງເອົາມາບໍລິໂພກໃນຄອບຄົວ, ເກັບໄວ້ກິນຍາວນານ ແລະ ຕາກແຫ້ງເປັນສິນຄ້າ ໂດຍມີພໍ່ຄ້າ-ແມ່ຄ້າຈາກຫວຽດນາມມາເກັບຊື້ເຖິງທີ່. ຍ້ອນເປັນແນວນັ້ນ ເຮັດໃຫ້ອົງການປົກຄອງເມືອງເປັນຫ່ວງວ່າຖ້າບໍ່ມີການຄຸ້ມຄອງ, ການແບ່ງເຂດ ແລະ ການກໍານົດເວລາໃນການຂຸດຄົ້ນໜໍ່ໄມ້ຢ່າງລະອຽດ ຈະເຮັດໃຫ້ໜໍ່ໄມ້ດັ່ງກ່າວນັບມື້ສູນພັນ ເພາະໜໍ່່ໄມ້ກໍບໍ່ຕ່າງຈາກເຄື່ອງປ່າຂອງດົງຊະນິດອື່ນໆ ຖ້າບໍ່ມີການຄຸ້ມຄອງການຂຸດຄົ້ນທີ່ດີຈະເຮັດໃຫ້ນັບມື້ສູນພັນໄປ.
ດັ່ງນັ້ນ, ອົງການປົກຄອງເມືອງ ໄດ້ແນະນໍາໃຫ້ຫ້ອງການກະສິກໍາ ແລະ ປ່າໄມ້ເມືອງ ອອກແຈ້ງການແນະນໍາລະອຽດ ເພື່ອໃຫ້ບັນດາບ້ານທີ່ມີການຂຸດຄົ້ນໜໍ່່ໄມ້ ແບ່ງເຂດ ແລະ ກໍານົດເວລາໃນການຂຸດຄົ້ນໜໍ່ໄມ້, ໄປພ້ອມໆ ກັບການຈັດສັນບຸກຄົນ, ນິຕິບຸກຄົນ, ນັກທຸລະກິດ, ທັງພາຍໃນ ແລະ ຕ່າງປະເທດ ທີ່ໄປເກັບຊື້ໄມ້ແຫ້ງພາຍໃນເມືອງໃຫ້ມີການລົງທະບຽນຢ່າງລະອຽດ ເພື່ອຄວາມສະດວກໃນການຄຸ້ມຄອງ ເພາະການເກັບຊື້ໃນໄລຍະຜ່ານມາມີການເອົາປຽບກັນດ້ານລາຄາ ເຮັດໃຫ້ບໍ່ມີຄວາມເປັນລະບຽບຮຽບຮ້ອຍ ແລະ ອື່ນໆ. ຢ່າງໃດກໍຕາມ, ແຕ່ໃນເວລາອອກແຈ້ງການຕົວຈິງ ເຈົ້າໜ້າທີ່ຫ້ອງການກະສິກໍາ ແລະ ປ່າໄມ້ເມືອງ ອາດເຂົ້າໃຈຜິດຫຼາຍຢ່າງ ຈຶ່ງເຮັດໃຫ້ການອອກແຈ້ງການມີຄວາມຜິດພາດ ແລະ ເກີດມີຫາງສຽງໃນທາງທີ່ບໍ່ສ້າງສັນໃນສັງຄົມ.
ທ່ານ ທອງສຸກ ສົມພາວັນ ກ່າວຕື່ມວ່າ: ເພື່ອແກ້ໄຂບັນຫາທີ່ເກີດຂຶ້ນ, ອົງການປົກຄອງເມືອງ ໄດ້ອອກຂໍ້ຕົກລົງລົບລ້າງແຈ້ງການຂອງຫ້ອງການກະສິກໍາ ແລະ ປ່າໄມ້ເມືອງແອດ, ສະບັບເລກທີ 663 ຫກປມ ລົງວັນທີ 23 ສິງຫາ 2023 ຮຽບຮ້ອຍແລ້ວ ແລະ ໄດ້ມອບໃຫ້ອົງການປົກຄອງບ້ານທີ່ກ່ຽວຂ້ອງພາຍໃນເມືອງກໍານົດຂອບເຂດ ແລະ ເວລາໃນການຂຸດຄົ້ນໜໍ່ໄມ້ຢູ່ບ້ານຂອງຕົນໃຫ້ລະອຽດ ເນື່ອງຈາກທາງເມືອງໄດ້ມອບດິນ-ມອບປ່າໃຫ້ບ້ານເປັນຜູ້ຄຸ້ມຄອງນໍາໃຊ້ໂດຍກົງ, ທັ້ງນີ້ເພື່ອແນໃສ່ເຮັດໃຫ້ໜໍ່ໄມ້ຕາມທໍາມະຊາດມີໂອກາດໄດ້ກາຍເປັນລໍາທົດແທນຕົ້ນເກົ່າໃນຕໍ່ໜ້າ. ພ້ອມນີ້, ໃນການເກັບຊື້ຂອງບຸກຄົນ, ນິຕິບຸກຄົນ, ນັກທຸລະກິດ, ທັງພາຍໃນ ແລະ ຕ່າງປະເທດ ຕ້ອງຫັນເຂົ້າສູ່ລະບຽບການ ແລະ ມີພັນທະຕໍ່ການຄຸ້ມຄອງປ່າໄມ້ ດ້ວຍການຕັ້ງເປັນກຸ່ມເກັບຊື້ໃນແຕ່ລະບ້ານຄ້າຍຄືກັບກຸ່ມເກັບຊື້ເຄື່ອງປ່າຂອງດົງຊະນິດອື່ນໆ ເຊິ່ງຜູ້ເກັບຊື້ຕ້ອງປະກອບເອກະສານຕາມທີ່ຫ້ອງການທີ່ກ່ຽວຂ້ອງຂອງເມືອງກໍານົດຢ່າງລະອຽດ ເພື່ອຮັບປະກັນເຮັດໃຫ້ການເກັບຊື້ໜໍ່ໄມ້ຢູ່ພາຍໃນເມືອງແອດມີຄວາມເປັນລະບຽບຮຽບຮ້ອຍກວ່າເກົ່າ ແລະ ຮັບປະກັນບໍ່ໃຫ້ເກີດການເອົາປຽບດ້ານລາຄາໃນການເກັບຊື້ເກີດຂຶ້ນອີກ.