ອົງການແມ່ນໍ້າຂອງ (MRC) ກ່າວວ່າລະດັບນໍ້າໃນແມ່ນໍ້າຂອງຕອນລຸ່ມ (LMB) ໄດ້ເພີ່ມຂຶ້ນຢ່າງໄວວາ ແລະ ຄາດວ່າຈະເພີ່ມຂຶ້ນ ໃນອີກ 5 ມື້ຕໍ່ໜ້າ ໂດຍສະເພາະນ້ຳຂອງຈາກ ຊຽງຄານ ຫາ ໂຂງຈຽມ ຂອງໄທ ແລະ ວຽງຈັນ ຫາ ສະຫວັນນະເຂດ ໃນ ສປປ ລາວ.
ໃນວັນທີ 9 ສິງຫາ 2023 ອົງການແມ່ນໍ້າຂອງ ໄດ້ລາຍງານວ່າ: ຈາກຂໍ້ມູນລະດັບນ້ຳ ຂອງອົງການແມ່ນໍ້າຂອງ ແລະ ຂໍ້ມູນປະລິມານນ້ຳຝົນ, ເນື່ອງຈາກຝົນຕົກໜັກໃນທົ່ວພາກພື້ນແມ່ນ້ຳຂອງ ເຊິ່ງເລີ່ມແຕ່ວັນທີ 5 ສິງຫາ ເປັນຕົ້ນມາ ເຮັດໃຫ້ປະລິມານນ້ຳທີີ່ວັດແທກໄດ້ສູງກວ່າປົກກະຕິ.
ທ່ານ ດຣ Sothea Khem ຜູ້ຊ່ຽວຊານດ້ານການພະຍາກອນນໍ້າຖ້ວມ ຂອງກອງເລຂາ MRC ກ່າວວ່າ “ໃນເດືອນສິງຫາພຽງເດືອນດຽວ ຈະມີປະລິມານນ້ຳຝົນສູງຂຶ້ນເຖິງ 40% ສູງກວ່າປີ 2021 ແລະ 2022.”
ບາງສ່ວນຂອງ ສປປ ລາວ ແລະ ໄທ ໄດ້ຮັບຜົນກະທົບຢ່າງໜັກໜ່ວງຈາກໄພນ້ຳຖ້ວມ ໃນທ້າຍອາທິດຜ່ານມາ, ສະພາບການດັ່ງກ່າວໄດ້ເຮັດໃຫ້ລະດັບນ້ຳເພີ່ມຂຶ້ນ ແລະ ສົ່ງຜົນກະທົບຕໍ່ຊັບສິນ ແລະ ການດຳລົງຊີວິດຂອງປະຊາຊົນ.
ຢູ່ແຂວງຊຽງຄານຂອງໄທ, ລະດັບນໍ້າໄດ້ເພີ່ມຂຶ້ນຈາກລະດັບ 7,70 ແມັດ ເປັນ 12,26 ແມັດ ໃນລະຫວ່າງວັນທີ 1-8 ສິງຫາ. ໃນໄລຍະ 5 ວັນຕໍ່ໜ້ານີ້ ຄາດວ່າຈະມີລະດັບຄວາມສູງຕື່ມອີກ 0,50 ແມັດ ໂດຍມີລະດັບເຕືອນໄພແມ່ນ 14,5 ແມັດ.
ທີ່ນະຄອນຫຼວງວຽງຈັນ ເຫັນວ່າລະດັບນໍ້າຂອງເພີ່ມຂຶ້ນ 4,30 ແມັດ ເມື່ອທຽບໃສ່ໄລຍະດຽວກັນຂອງປີກາຍນີ້, ເພີ່ມຂຶ້ນປະມານ 40%. ໃນໄລຍະ 5 ວັນຕໍ່ໜ້ານີ້, ຄາດຄະເນລະວ່າ ດັບນໍ້າຂອງຈະສູງຂຶ້ນລະຫວ່າງ 2,34-3,32 ແມັດ. ການເພີ່ມຂຶ້ນຂອງນ້ຳຢູ່ທີ່ 11,5 ແມັດ ຈະມີການແຈ້ງເຕືອນໄພ, ໂດຍທີ່ການເຕືອນໄພນໍ້າຖ້ວມແມ່ນ 12,5 ແມັດ.
ຈາກນະຄອນພະນົມຂອງໄທ ຫາ ນະຄອນປາກເຊ ໃນ ສປປ ລາວ, ລະດັບນໍ້າຂອງໄດ້ເພີ່ມຂຶ້ນຫຼາຍກວ່າ 2,50 ແມັດ ແລະ ອາດຈະເພີ່ມຂຶ້ນອີກ ປະມານ 2 ແມັດ ໃນ 5 ມື້ຕໍ່ໜ້າ. ດັ່ງນັ້ນ, ລະດັບນໍ້າຂອງນະຄອນພະນົມ ຈະຂຶ້ນສູ່ລະດັບເຕືອນໄພ 11,5 ແມັດ ໃນວັນທີ 10 ສິງຫາ ແລະ ລະດັບນໍ້າຖ້ວມ 12 ແມັດ ໃນວັນທີ 11 ສິງຫາ.
ຢ່າງໃດກໍຕາມ ເຂື່ອນໃນ ສປປ ລາວ ກໍໄດ້ມີການປ່ອຍນ້ຳອອກເຂື່ອນເພື່ອຄວບຄຸມລະດັບນ້ຳໄວ້ ໂດຍຈະມີການແຈ້ງແບບສຸກເສີນ ຫຼື ແຈ້ງໃນໄລຍະສັ້ນ ພ້ອມກຽມຮັບມືກັບການປ່ຽນແປງຂອງລະດັບນ້ຳ.
ແຫຼ່ງຂ່າວ ອົງການແມ່ນໍ້າຂອງ (MRC)