Homeຂ່າວພາຍ​ໃນສືບຕໍ່ການຮັກສາສະຖຽນລະພາບທາງດ້ານເງິນຕາ

ສືບຕໍ່ການຮັກສາສະຖຽນລະພາບທາງດ້ານເງິນຕາ

Published on

ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ລາຍງານຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ກ່ຽວກັບການຈັດຕັ້ງປະຕິບັດແຜນເງິນຕາ 6 ເດືອນ ຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2023.

ໃນ 6 ເດືອນທ້າຍປີ 2023 ຄາດວ່າ ສະພາບເສດຖະກິດ-ການເງິນໃນສາກົນ ຈະຍັງສືບຕໍ່ຜັນແປຢ່າງສັບສົນ, ອັດຕາເງິນເຟີ້ຍັງຈະຢູ່ໃນລະດັບສູງ ແລະ ຜົນກະທົບຈາກບັນຫາຄວາມຂັດແຍ່ງລະຫວ່າງ ຣັດເຊຍ ແລະ ອູເກຼອີນ ແລະ ການສືບຕໍ່ຟື້ນຕົວຈາກຜົນກະທົບຂອງການແຜ່ລະບາດພະຍາດໂຄວິດ-19 ເຮັດໃຫ້ການບັນລຸໄດ້ບາງຄາດໝາຍແຜນເງິນຕາ ທີ່ໄດ້ກຳນົດໄວ້ໃນມະຕິສະພາແຫ່ງຊາດນັ້ນ ມີຄວາມທ້າທາຍສູງ. ແຕ່ເຖິງຢ່າງໃດກໍ່ຕາມ, ເຫັນວ່າ ສະພາບການພາຍໃນ ຍັງມີປັດໄຈທີ່ເປັນທ່າແຮງທີ່ຊ່ວຍຍູ້ແຮງໃຫ້ເສດຖະກິດ ຄາດວ່າຈະເຕີບໂຕເກີນ 4,5% ເປັນຕົ້ນ ການເປີດປະເທດ ຈະຊ່ວຍດຶງດູດນັກທ່ອງທ່ຽວເຂົ້າມາເພີ່ມຂຶ້ນ, ການຜະລິດກະສິກຳສົ່ງອອກມີລັກສະນະຟົດຟື້ນ, ການສົ່ງອອກແຮ່ທາດບາງຊະນິດເພີ່ມຂຶ້ນ ເປັນຕົ້ນ ແຮ່ເກືອໂປຕັສ, ການປັບປຸງລະບົບຂົນສົ່ງຜ່ານທາງລົດໄຟ ລາວ-ຈີນ, ລະບົບຂົນສົ່ງຜ່ານແດນ ແລະ ລະບົບໂລຈິສຕິກ ຊຶ່ງປັດໄຈເຫຼົ່ານີ້ຈະຊ່ວຍດູດເງິນຕາໄຫຼເຂົ້າສູ່ລະບົບເສດຖະກິດ ໃຫ້ຫຼາຍຂຶ້ນກວ່າປີຜ່ານມາ.

ທະນາຄານແຫ່ງ ສປປ ລາວ ຈະສືບຕໍ່ການຮັກສາສະຖຽນລະພາບທາງດ້ານເງິນຕາ ດ້ວຍການດຳເນີນນະໂຍບາຍເງິນຕາໃນທິດທາງທີ່ຮັດກຸມຫຼາຍຂຶ້ນ ຄື:

  1. ສຸມໃສ່ປັບປຸງ ແລະ ຈັດຕັ້ງປະຕິບັດກົນໄກການຄຸ້ມຄອງເງິນຕາຕ່າງປະເທດ ຂອງ ສປປ ລາວ ໃຫ້ມີປະສິດທິຜົນ ດ້ວຍການສ້າງເງື່ອນໄຂ ແລະ ສະພາບແວດລ້ອມ ໃຫ້ມີການສະໜອງເງິນຕາຕ່າງປະເທດເຂົ້າມາໃນລະບົບເສດຖະກິດຫຼາຍຂື້ນ ແລະ ຈໍາກັດການແລກປ່ຽນເງິນຕາແບບຊະຊາຍ;
  2. ສືບຕໍ່ຄວບຄຸມປະລິມານ ເງິນໃຫ້ຂະຫຍາຍຕົວໃນຈັງຫວະທີ່ເໝາະສົມ ເພື່ອຄວບຄຸມເງິນເຟີ້;
  3. ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດໃຫ້ຮັດກຸມຍິ່ງຂຶ້ນ;
  4. ພັດທະນາເຄື່ອງມືຊຳລະພາຍໃນ ແລະ ລະຫວ່າງປະເທດໃຫ້ທັນສະໄໝ ແລະ ຮັບປະກັນຄວາມປອດໄພ;
  5. ເພີ່ມທະວີການສົມທົບກັບຂະແໜງການກ່ຽວຂ້ອງໃຫ້ຫຼາຍຂຶ້ນ ເປັນຕົ້ນ ພັດທະນາລະບົບແລກປ່ຽນຂໍ້ມູນຂ່າວສານກັບສື່ມວນຊົນ ແລະ ບູລະນະກົນໄກການປະສານງານ ກໍ່ຄື ການເຊື່ອມໂຍງຖານຂໍ້ມູນກັບຂະແໜງການທີ່ກ່ຽວຂ້ອງ ໃຫ້ເປັນລະບົບປົກກະຕິ, ສອດຄ່ອງ ແລະ ມີປະສິດທິຜົນຫຼາຍຂຶ້ນ.

ການຮັກສາສະຖຽນລະພາບທາງດ້ານເງິນຕາເປັນບັນຫາລວມ ແລະ ຕິດພັນກັບທຸກພາກສ່ວນ. ທະນາຄານແຫ່ງ ສປປ ລາວ ຂໍຮຽກຮ້ອງໃຫ້ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາແຂວງເປັນເຈົ້າການຊ່ວຍຊຸກຍູ້ພາກທຸລະກິດ, ສັງຄົມ ຕະຫຼອດຮອດປະຊາຊົນໃນການສຶກສາອົບຮົມ, ຕິດຕາມ, ກວດກາ ແລະ ສົ່ງເສີມການນຳໃຊ້ເງິນກີບ, ຖືຄອງຮັກສາເງິນຕາຕ່າງປະເທດດ້ວຍການຝາກກັບລະບົບທະນາຄານ ແລະ ຄຸ້ມຄອງເງິນຕາຕ່າງປະເທດ ເປັນຕົ້ນການຕິດປ້າຍລາຄາ ແລະ ການຊຳລະຄ່າສິນຄ້າ ແລະ ການບໍລິການ ເປັນເງິນກີບ ໂດຍສະເພາະບັນດາແຂວງ ແລະ ເມືອງທີ່ເລາະລຽບຕາມຊາຍແດນ ຊຶ່ງເຫັນວ່າຕ້ອງໄດ້ຈັດຕັ້ງປະຕິບັດການໂຄສະນາຂົນຂວາຍໃຫ້ປະຊາຊົນຮັບຮູ້ ແລະ ຮູ້ໃນຄຸນຄ່າຂອງເງິນກີບ, ພ້ອມທັງຊຸກຍູ້ສັງຄົມໃຫ້ແລກປ່ຽນເງິນຕາກັບທະນາຄານທຸລະກິດເທົ່ານັ້ນ ແລະ ສົ່ງເສີມການຊົມໃຊ້ສິນຄ້າຜະລິດພາຍໃນ ເພື່ອຫຼຸດຜ່ອນຄວາມຕ້ອງການເງິນຕາຕ່າງປະເທດ ໂດຍບໍ່ຈຳເປັນ.

ແຫຼ່ງຂ່າວ ທະນາຄານແຫ່ງ ສປປ ລາວ

ບົດຄວາມຫຼ້າສຸດ

ຟ້າຜ່າ ເລື່ອງໃກ້ຕົວທີ່ຫຼາຍຄົນເບິ່ງຂ້າມ

ໃນໄລຍະຊ່ວງຍາມຝົນແບບນີ້ ຫຼີກລ່ຽງບໍ່ໄດ້ທີ່ເຮົາຈະພົບກັບສະພາບຝົນຕົກ ຟ້າເຫຼື້ອມ ຟ້າຜ່າ, ໂດຍສະເພາະ ຟ້າຜ່າ ເປັນໜຶ່ງໃນເຫດການທຳມະຊາດທີ່ສ້າງຄວາມສູນເສຍແກ່ຊີວິດ ແລະ ຊັບສິນ, ບາງຄົນກໍອາດຈະບໍ່ຮູ້ ຫຼື ບາງຄົນກໍຮູ້ແລ້ວ ແຕ່ກໍອາດຈະປະໝາດ ແລະ...

ຄວາມຍາວ 376 ກິໂລແມັດ ແຂວງຊຽງຂວາງ ຜ່ານແບບ ແລະ ຮັບຮອງເອົາ ແລວທາງທີ 3 ໃນການກໍ່ສ້າງເສັ້ນທາງດ່ວນ ນະຄອນຫຼວງ-ໄຊສົມບູນ-ຊຽງຂວາງ-ຫົວພັນ.

ກອງປະຊຸມຜ່ານແບບ, ຮັບຮອງແບບການກໍ່ສ້າງເສັ້ນທາງດ່ວນນະຄອນຫຼວງວຽງຈັນ-ໄຊສົມບູນ-ຊຽງຂວາງ-ຫົວພັນ ຈັດຂຶ້ນເມື່ອບໍ່ດົນມານີ້ ທີ່ຫ້ອງວ່າການແຂວງຊຽງຂວາງ ໂດຍການເປັນປະທານຂອງທ່ານ ບົວເງິນ ຫຸມໄຊຍະພົມ ປະທານຄະນະກຳມະການປົກຄອງແຂວງຊຽງຂວາງ ພ້ອມດ້ວຍການນຳ, ພາກສ່ວນທີ່ກ່ຽວຂອງຂອງແຂວງ, ເມືອງ ແລະ ຄະນະຂອງບໍລິສັດທີ່ອອກແບບກໍ່ສ້າງເສັ້ນທາງດ່ວນ ເຂົ້າຮ່ວມ. ທ່ານ...

ແຈ້ງມອດໄຟ 15-17 ພຶດສະພາ 2026 ໄຟຟ້າ ນວ ແຈ້ງເຖິງບັນດາຜູ້ຊົມໃຊ້ໄຟຟ້າ ພາຍໃນນະຄອນຫຼວງວຽຈັນ ເລື່ອງການຂໍມອດໄຟຟ້າ ໃນລະຫວ່າງ ວັນທີ 15-17/05/2026

ອີງຕາມແຈ້ງການຂອງ ລັດວິສາຫະກິດໄຟຟ້າລາວ ຝ່າຍຄຸ້ມຄອງລະບົບໄຟຟ້າພາກກາງ ສາຂານະຄອນຫຼວງວຽງຈັນ 1 ໄດ້ແຈ້ງເຖິງບັນດາຜູ້ຊົມໃຊ້ໄຟຟ້າພາຍໃນນະຄອນຫຼວງວຽຈັນ ເລື່ອງການຂໍມອດໄຟຟ້າ ໃນລະຫວ່າງ ວັນທີ 15-17/05/2026 ເຊິ່ງມີລາຍລະອຍດດັ່ງນີ້: