ປະເທດລາວເປັນປະເທດປິດ ທີ່ມີການນຳເຂົ້າຫຼາຍກວ່າສົ່ງອອກ ຍ້ອນຫຼາຍໆປັດໄຈຄື ປະຊາກອນໃນປະເທດລາວມີໜ້ອຍ ເຮັດໃຫ້ມີຄວາມຫຍຸ້ງຍາກໃນການຜະລິດສິນຄ້າ ສະນັ້ນຈຶ່ງມີການນຳເຂົ້າສິນຄ້າຫຼາຍກວ່າ, ໃນການນຳເຂົ້າສິນຄ້າຫຼາຍສົ່ງຜົນໃຫ້ປະເທດຂາດດຸນການຄ້າ ເຊິ່ງນຳໄປສູ່ໄພເງິນເຟີ້ ແລະ ສ້າງວິກິດໃນເສດຖະກິດຂອງປະເທດ.
ໄພເງິນເຟີ້ໄດ້ສົ່ງຜົນກະທົບທາງອ້ອມ ແລະ ທາງກົງຕໍ່ປະຊາຊົນ ພໍ່ຄ້າຊາວຂາຍພາຍໃນປະເທດ ບໍ່ວ່າຈະແມ່ນສິນຄ້າມີລາຄາສູງຂຶ້ນ ເຮັດໃຫ້ປະຊາຊົນທີ່ມີລາຍໄດ້ເທົ່າເດີມ ແຕ່ມີຄວາມສາມາດໃນການຊື້ສິນຄ້າໄດ້ໜ້ອຍລົງ ແລະ ອັດຕາແລກປ່ຽນທີ່ນັບມື້ນັບເພີ່ມຂຶ້ນ ເຖິງວ່າລັດຖະບານຈະມີມາດຕະການຄວບຄຸມກໍຕາມ ແຕ່ກໍຍັງເພີ່ມຂຶ້ນຢູ່ເລື່ອຍໆ ກົງກັນຂ້າມກັບອັດຕາເງິນເຟີ້ທີ່ທາງລັດຖະບານໄດ້ລາຍງານ ນັບຕັ້ງແຕ່ເດືອນກຸມພາ 2023 ເປັນຕົ້ນມາ ອັດຕາເງິນເຟີ້ໄດ້ມີການຫຼຸດລົງໃນແຕ່ລະເດືອນ.
ອີງຕາມສູນສະຖິຕິແຫ່ງຊາດໃຫ້ຮູ້ວ່າ: ອັດຕາເງິນເຟີ້ປະຈຳເດືອນພຶດສະພາ ຢູ່ທີ່ 38,86% ມາໃນເດືອນມິຖຸນາແມ່ນ 28,64% ຫຼຸດລົງຫຼາຍເຖິງ 10,22% ເມື່ອທຽບໃສ່ເດືອນພຶດສະພາ 2023. ຈາກພໍ່ແມ່ປະຊາຊົນໃນສື່ສັງຄົມອອນລາຍ ກໍໄດ້ໃຫ້ຄວາມຄິດເຫັນກ່ຽວກັບກໍລະນີດັ່ງກ່າວຄື ສ່ວນໃຫຍ່ກໍກ່າວວ່າສິນຄ້າຍັງແພງຢູ່ ບໍ່ວ່າຈະເປັນເຄື່ອງອຸປະໂພກ-ບໍລິໂພກ ເມື່ອທຽບກັບລາຍຮັບຂອງພວກເຂົາ ເຊິ່ງກະທົບຊີວິດການເປັນຢູ່ໃນແຕ່ລະມື້, ຕົວຢ່າງ ເດືອນເມສາເຝີຖ້ວຍລະ 20.000 ກີບ ຕົກມາໃນເດືອນມິຖຸນາ 2023 ເຝີກ້ວຍລະ 30.000 ກີບ, ພຽງເວລາ 2 ເດືອນ ເຫັນວ່າລາຄາລື່ນກັນ 10.000 ກີບ. ດັ່ງນັ້ນ, ຈຶ່ງເຫັນໄດ້ວ່າເງິນເຟີ້ແມ່ນ ສະພາບທີ່ລາຄາສິນຄ້າເພີ່ມສູງຂຶ້ນຕໍ່ເນື່ອງ.
