ສະມາຊິກສະພາແຫ່ງຊາດເຂດເລືອກຕັ້ງທີ 18 ແຂວງໄຊສົມບູນ ສະເໜີໃຫ້ລັດຖະບານ ເຮັດແທ້ທຳຈິງ ຕາມລະບຽບກົດໝາຍ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ໃນ 6 ເດືອນທ້າຍປີ 2023.
ທ່ານ ແດງ ປະທຸມທອງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ແຂວງໄຊສົມບູນ ໄດ້ມີຄຳເຫັນວ່າ: ໃນໄລຍະ 6 ເດືອນຕົ້ນປີ 2023 ເຫັນວ່າຍັງມີຂໍ້ຄົງຄ້າງ ແລະ ສິ່ງຫຍໍ້ທໍ້ຈຳນວນໜຶ່ງ ສະນັ້ນຈຶ່ງຢາກໃຫ້ລັດຖະບານສືບຕໍ່ແກ້ໄຂ ແລະ ຈັດຕັ້ງປະຕິບັດເປັນຕົ້ນ ໃນຂົງເຂດຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍສະເພາະຢູ່ແຂວງໄຊສົມບູນຍັງເຫັນມີສະພາບການບຸກລຸກປ່າ, ຈູດປ່າຫຼາຍກວ່າທຸກປີທີ່ຜ່ານມາ ໂດຍສະເພາະ 3 ປະເພດປ່າ ຊຶ່ງແຂວງໄຊສົມບູນມີ 98 ບ້ານ, ໃນນັ້ນມີ 56 ບ້ານໄປບຸກລຸກປ່າ (1.202 ຄອບຄົວ), ປ່າຖືກທຳລາຍ 3.600 ກວ່າເຮັກຕາ ອັນໄດ້ສົ່ງຜົນກະທົບຕໍ່ເຂື່ອນໄຟຟ້າທີ່ກຳລັງກໍ່ສ້າງ ແລະ ອື່ນໆ ສາເຫດທີ່ເຮັດໃຫ້ປະຊາຊົນເຂົ້າໄປບຸກລຸກປ່ານັ້ນ ເນື່ອງມາຈາກຫຼາຍສາເຫດ ເປັນຕົ້ນບັນຫາເງິນກີບອ່ອນຄ່າ, ລາຄາສິນຄ້າເຄື່ອງອຸປະໂພກບໍລິໂພກແພງຂຶ້ນ ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນ, ຕໍ່ສະພາບການດັ່ງກ່າວຈຶ່ງເຮັດໃຫ້ປະຊາຊົນໄປຊອກຫາແຫຼ່ງລາຍຮັບເພື່ອປັບປຸງຊີວິດການເປັນຢູ່ຂອງເຂົາເຈົ້າ ຈຶ່ງໄດ້ເຂົ້າໄປບຸກລຸກປ່າເພື່ອປູກມັນຕົ້ນຂາຍເພື່ອສ້າງລາຍຮັບໃຫ້ແກ່ກັບຄອບຄົວ.
ສຳລັບການຄຸ້ມຄອງຂຸດຄົ້ນແຮ່ທາດຍັງມີການຂຸດຄົ້ນ ແລະ ສຳຫຼວດໄປພ້ອມກັນ, ຫຼາຍບໍລິສັດຍັງບໍ່ທັນມີບົດສຶກສາຄວາມເປັນໄປໄດ້ທາງເສດຖະກິດ, ເຕັກນິກ ແລະ ບົດປະເມີນຜົນຕໍ່ສິ່ງແວດລ້ອມ, ສັງຄົມ ແລະ ທຳມະຊາດ, ບັນຫາການກວດກາຄຸນນະພາບ, ຄວາມເຂັ້ມຂຸ້ນຂອງແຮ່ແມ່ນຍັງບໍ່ທັນມີພະນັກງານລັດເຂົ້າຮ່ວມ, ມີແຕ່ຝ່າຍບໍລິສັດ ໃນນັ້ນຊິງຊັ່ງນໍ້າໜັກ ແລະ ການຄວບຄຸມຊິງຊັ່ງນໍ້າໜັກແຮ່ແມ່ນບໍ່ທັນເປັນຂອງລັດ, ຈຶ່ງເກີດບັນຫາຕາມມາ, ສ່ວນລົດບັນທຸກແຮ່ຍັງມີການບັນທຸກເກີນກຳນົດ ຊຶ່ງໄດ້ສ້າງຄວາມເສຍຫາຍໃຫ້ແກ່ເສັ້ນທາງມີຄວາມເປ່ເພ ໃນນັ້ນປະລິມານການສົ່ງອອກແຮ່ກໍຍັງບໍ່ທັນຈະແຈ້ງເທື່ອ.
ຕໍ່ກໍລະນີທີ່ບໍລິສັດສຳປະທານຂຸດຄົ້ນແຮ່ທາດ, ມີບາງບໍລິສັດຂຸດຄົ້ນອອກຊື່ຄົນລາວ ແຕ່ຜູ້ເຮັດຕົວຈິງຊ້ຳພັດບໍ່ແມ່ນຄົນລາວ ອາດຈະແມ່ນຫຸ້ນສ່ວນ ຫຼື ວ່າຈ້າງຜູ້ອື່ນມາຂຸດຄົ້ນຕໍ່ບັນຫາດັ່ງກ່າວເຮັດໃຫ້ພວກເຮົາສູນເສຍລາຍຮັບ ແລະ ການສ້າງແລວທາງໄປຫາເຂດຂຸດຄົ້ນ ແລະ ບໍລິເວນຂຸດຄົ້ນຍັງພາໃຫ້ເກີດມີຜົນເສຍຫາຍຕໍ່ປ່າໄມ້ ແລະ ມີຜົນກະທົບຕໍ່ດິນນາ, ດິນສວນຕໍ່ສາຍນໍ້າ ແລະ ອື່ນໆ.
ແຫຼ່ງຂ່າວ ປະຊາຊົນ