ໃນບັນດາຜູ້ທີ່ມີບັນຫາຜົມຫລົ່ນ ຜົມບາງ ແລະ ຫົວລ້ານ ໂດຍສ່ວນຫລາຍແລ້ວຈະມີບັນຫາ ໜັງຫົວ ມັນຮ່ວມນໍາ ເຊິ່ງສາເຫດຂອງຜູ້ທີ່ຜົມຫລົ່ນ ພ້ອມໆ ກັບ ໜັງຫົວມັນນັ້ນ ມີບາງສາເຫດທີ່ເຮັດໃຫ້ເກີດພາວະຜົມຫລົ່ນ ແລະ ໜັງຫົວມັນ ທັງສອງຢ່າງພ້ອມກັນ ການຈະປ້ອງກັນປິ່ນປົວໃຫ້ໄດ້ຜົນດີີ ກໍຈຳເປັນຈະຕ້ອງເຮັດຄວາມເຂົ້າໃຈກ່ອນປິ່ນປົວ
ໂດຍທົ່ວໄປຜົມທີ່ມັນດ້ວຍໂຕຂອງມັນເອງຕາມທຳມະຊາດ ບໍ່ເຮັດໃຫ້ເກີດຜົມຫລົ່ນຫລາຍຂຶ້ນ ແຕ່ການມີໄຂມັນບໍລິເວນ ໜັງຫົວຫລາຍຂຶ້ນ ອາດຈະເກີດການສະສົມ ແລະໄປອຸດຕັນບໍລິເວນອ້ອມຮອບຮາກຜົມ ເຮັດໃຫ້ການໄຫລວຽນຂອງເລືອດ ການນຳພາສານອາຫານ ແລະ ອອກຊິເຈນໄປລ້ຽງຮາກຜົມໄດ້ບໍ່ດີ ນອກຈາກນີ້ການມີໄຂມັນບໍລິເວນ ໜັງຫົວ ຫລາຍເຮັດໃຫ້ເຊື້ອພະຍາດປະຈຳຖິ່ນບໍລິເວນ ໜັງຫົວ ມີຫລາຍຂຶ້ນ ເຮັດໃຫ້ການເຮັດວຽກງານຂອງຮາກຜົມຜິດປົກກະຕິໄປ ເກີດອາການຜົມຫລົ່ນ ແລະ ຜົມຂຶ້ນໃໝ່ໄດ້ໜ້ອຍລົງ ເຮັດໃຫ້ຜົມບາງລົງເລື່ອຍໆ ເກີດຫົວລ້ານນໍາມາໄດ້ໃນທີ່ສຸດ
ແຕ່ໃນບາງຄົົນທີ່ຜົມຫລົ່ນຈາກກຳມະພັນ ມັກຈະມີອາການ ໜັງຫົວມັນເປັນຂອງຄູ່ກັນ ເພາະມີສາເຫດທີ່ມາແບບດຽວກັນ ຄື ຈາກຄວາມຜິດປົກກະຕິຂອງຮໍໂມນ ແລະ ຈາກການທີ່ຕ່ອມໄຂມັນເທິງ ໜັງຫົວ ຜະລິດໄຂມັນອອກມາຫລາຍກວ່າປົກກະຕິ ໄຂມັນທີ່ວ່ານີ້ ມີຄວາມຈຳເປັນຕໍ່ການຄົງຄວາມແຂງແຮງຂອງເສັ້ນຜົມ ປ້ອງກັນບໍ່ໃຫ້ຜົມແຫ້ງ ແຕກ ແຕ່ມີປັດໄຈບາງຢ່າງ ເຊັ່ນ ກໍາມະພັນ ການປ່ຽນແປງຮໍໂມນ ການກິນອາຫານບໍ່ຖືກສ່ວນ ແລະ ສິ່ງແວດລ້ອມທີ່ຖືກກະຕຸ້ນໂດຍຄວາມຮ້ອນ ແລະ ຄວາມຊຸ່ມ ທີ່ເຮັດໃຫ້ການຜະລິດໄຂມັນບໍລິເວນ ໜັງຫົວ ຫລາຍຂຶ້ນ ເມື່ອຫລາຍເກີນໄປໄຂມັນກໍໄປຕັນທີ່ຮູຂຸມຂົນ ເລືອດຈຶ່ງໄປລ້ຽງບໍລິເວນຮາກຜົມໄດ້ໜ້ອຍລົງ
ເຊິ່ງການຈະແກ້ໄຂບັນຫາຜົມຫລົ່ນໃຫ້ໄດ້ຜົນດີີຕ້ອງກຳຈັດ ຫລື ຄວບຄຸມພາວະ ໜັງຫົວມັນໃຫ້ໄດ້ກ່ອນ ດ້ວຍເພາະຕາບໃດຖ້າຄາບໄຂມັນທີ່ອຸດຕັນໃນຮູຂຸມຂົນຍັງແຂງເປັນກ້ອນໄຂມັນ ຈະລ້າງອອກຍາກ ກ້ອນໄຂມັນທີ່ວ່າ ຈະໄປກົດເອົາຮາກຜົມເຮັດໃຫ້ເລືອດໄປລ້ຽງຮາກຜົມໄດ້ໜ້ອຍ ຜົມຈຶ່ງຫລຸດຫລົ່ນງ່າຍກວ່າປົກຕິ
9 ວິທີແກ້ບັນຫາ ໜັງຫົວ ມັນແບບງ່າຍໆ
ຫລັກການງ່າຍໆໃນການແກ້ບັນຫາປ້ອງກັນ ໜັງຫົວມັນ ຫລື ຜົມມັນໃຫ້ປະຕິບັດດັ່ງນີ້
- ເລືອກໃຊ້ຢາສະຜົມສຳຫລັບຜົມມັນ ຫລີກລ້ຽງຢາສະຜົມທີ່ຂຽນສັບພະຄຸນວ່າ 2 in 1 ແລະ ຄວນສະຜົມທຸກມື້ຢ່າງນ້ອຍມື້ລະ 1 ເທື່ອ ຄຳແນະນຳໃນການສະຜົມນັ້ນ ເວລາສະຜົມຄວນຖິ້ມຢາສະຜົມໄວ້ 5 ນາທີກ່ອນລ້າງອອກ
- ບໍ່ຄວນໃຊ້ນ້ຳຮ້ອນສະຜົມ ຄວນສະຜົມດ້ວຍນ້ຳອຸນຫະພູມປົກກະຕິ
- ບໍ່ຄວນໃສ່ຄີມນວດຜົມ ຫລື ຖ້າຫາກມີຜົມແຫ້ງທີ່ປາຍຜົມ ຄວນໃຊ້ຄີມນວດຜົມທີ່ປາຍຜົມເທົ່ານັ້ນ
- ຫລີກລ້ຽງການຫວີຜົມ ຫລື ແປງຜົມເລື້ອຍໆ ເພາະການຫວີຜົມ ຫລື ແປງຜົມຈະກະຕຸ້ນ ໜັງຫົວ ໃຫ້ຜະລິດນ້ຳມັນອອກມາຫລາຍຂຶ້ນ
- ຫລີກລ້ຽງຜະລິດຕະພັນທີ່ເຮັດໃຫ້ຜົມເບິ່ງມັນຫລາຍຂຶ້ນ ເຊັ່ນ ເຈວແຕ່ງຜົມ ຫລືຜະລິດຕະພັນທີ່ເພີ່ມຄວາມເປັນປະກາຍໃຫ້ກັບເສັ້ນຜົມ
- ຫລີກລ້ຽງການເຂົ້າໄປຢູ່ໃນສິ່ງແວດລ້ອມທີ່ພູມອາກາດປ່ຽນແປງເລື້ອຍໆ ໂດຍສະເພາະອາກາດຮ້ອນຊຸ່ມ ເພາະຈະເຮັດໃຫ້ຜົມມັນຫລາຍຂຶ້ນ
- ຫລຸດຄວາມຄຽດ ຫາເວລາພັກຜ່ອນ ແລະ ຜ່ອນຄາຍ ເນື່ອງຈາກຄວາມຄຽດຈະສົ່ງຜົນໂດຍລວມຕໍ່ສຸຂະພາບ ແລະ ຫລຸດປະລິມານເລືອດໄປລ້ຽງໜັງຫົວ
- ກິນອາຫານໃຫ້ຖືກສ່ວນ ຫລຸດການກິນອາຫານທີ່ມັນຫລາຍໆ ເພີ່ມການກິນອາຫານພວກວິຕາມິນບີ ເກືອແຮ່ ເຊັ່ນ ຜັກໃບຂຽວ ຫມາກໄມ້ ນົມຖົ່ວເຫລືອງ ພືດຕະກູນຖົ່ວ
- ຫາຕົວຊ່ວຍໃນການໝັກຜົມ ຖ້າຜົມມັນຫລາຍໆ ອາດຈະໃຊ້ໝາກນາວ 1 ໜ່ວຍ ບີບ ແລະ ປະສົມກັບໄຂ່ຂາວ 2 ໜ່ວຍ ແລ້ວທາລົງເສັ້ນຜົມ ຕັ້ງແຕ່ກົກຜົມຈົນເຖິງປາຍຜົມ