ໃນຕອນເຊົ້າ ຂອງວັນທີ 27 ມີນາ 2023 ທີ່ຜ່ານມາ, ທີ່ຫ້ອງປະຊຸມຂອງໂຮງແຮມ ຄລາວພລາຊາ, ນະຄອນຫຼວງວຽງຈັນ, ກະຊວງ ພະລັງງານ ແລະ ບໍ່ແຮ່ ໄດ້ຈັດກອງປະຊຸມຂື້ນ ໃນຫົວຂໍ້ “ການຫັນປ່ຽນພະລັງງານໃນ ສປປ ລາວ ແລະ ໂອກາດຄວາມເປັນໄປໄດ້ການນໍາໃຊ້ພະລັງງານໄຮໂດຣເຈນ-ເອມໂມເນຍ ສີຂຽວ ໃນ ສປປ ລາວ” ຂື້ນ, ກອງປະຊຸມດັ່ງກ່າວ ໄດ້ຮັບກຽດເຂົ້າຮ່ວມເປັນປະທານຂອງທ່ານ ນາງ ຈັນສະຫວາດ ບຸບຜາ, ຮອງລັດຖະມົນຕີກະຊວງ ພະລັງງານ ແລະ ບໍ່ແຮ່, ໃນນັ້ນ ມີຜູ້ເຂົ້າຮ່ວມຈາກຫົວໜ້າກົມ, ສະຖາບັນອ້ອມຂ້າງກະຊວງ ແລະ ບັນດາກົມທີ່ກ່ຽວຂ້ອງ ຈາກກະຊວງອ້ອມຂ້າງສູນກາງ ເຂົ້າຮ່ວມ, ກວ່າ 50 ທ່ານ.
ທ່ານ ປະທານຍັງໃຫ້ຮູ້ຕື່ມວ່າ: ກອງປະຊຸມສຳມະນາກ່ຽວກັບການສືກສາຄວາມເປັນໄປໄດ້ ໃນການຫັນປ່ຽນພະລັງງານໃນ ສປປ ລາວ-ໂອກາດຄວາມເປັນໄປໄດ້ການນໍາໃຊ້ພະລັງງານໄຮໂດຣເຈນ-ເອມໂມເນຍ ສີຂຽວ ໃນ ສປປ ລາວ, ເຊິ່ງເປັນພະລັງງານທາງເລືອກໃນອານາຄົດ, ເນື່ອງຈາກສະພາບການປ່ຽນແປງດີນຟ້າອາກາດ, ສະພາບການຂອງໂລກມີການປ່ຽນແປງ ໂດຍສະເພາະດ້ານພະລັງງານທີ່ມີເໜັງຕີງຢ່າງຕໍ່ເນື່ອງ, ບັນດາປະເທດໃນໂລກໄດ້ມີນະໂຍບາຍ ແລະ ທິດທາງການນໍາໃຊ້ພະລັງງານສະອາດເປັນມິດກັບສີ່ງແວດລ້ອມ ໂດຍສະເພາະພະລັງງານໄຮໂດຣເຈນ, ເຊິ່ງໃນດ້ານເຕັກໂນໂລຊີແລ້ວ ໄດ້ມີການພັດທະນາຢ່າງຕໍ່ເນື່ອງ ມີແນວໂນມເປັນທີ່ຍອມຮັບຂອງຕະຫລາດ ແລະ ລາຄາສາມາດແຂ່ງຂັນໄດ້, ຄວາມຕ້ອງການພະລັງງານດັ່ງກ່າວໄດ້ມີທ່າອຽງຫລາຍຂື້ນໂດຍສະເພາະ ຢູ່ບັນດາປະເທດເກົາຫລີໃຕ້, ຍີ່ປຸ່ນ ແລະ ສປ ຈີນ, ສໍາລັບ ສປປ ລາວ ພວກເຮົາລັດຖະບານໄດ້ມີຍຸດທະສາດ ກ່ຽວກັບການສະໜອງພະລັງງານສະອາດໃຫ້ແກ່ຂະແໜງຄົມມະນາຄົມຂົນສົ່ງ ໂດຍສະເພາະພະລັງງານໄຣໂດຣເຈນ ພ້ອມດຽວກັນນັ້ນ, ລັດຖະບານກຳລັງຮ່າງຍຸດທະສາດ ກ່ຽວກັບ ພະລັງງານໄຮໂດຣເຈນ ແລະ ເອກະສານດ້ານນິຕິກຳທີ່ກ່ຽວຂ້ອງ ເພື່ອສົ່ງເສີມວຽກງານດັ່ງກ່າວໃຫ້ໄດ້ຮັບການປະຕິບັດຜົນເປັນຈິງເທື່ອລະກ້າວ.
ສປປ ລາວ ເປັນປະເທດທີ່ນໍາເຂົ້ານ້ຳມັນເຊື້ອໄຟ 100%, ໃນປີ 2021 ນໍາເຂົ້ານໍ້າມັນເຊື້ອໄຟປະມານ 1,4 ລ້ານລິດ ຊື່ງລວມເປັນມູນຄ່າປະມານ 803 ລ້ານໂດລາສະຫະລັດ ແລະ ນໍາເຂົ້າປຸຍເຄມີ ຈາກຕ່າງປະເທດ ໃນປີ 2022 ປະມານ 450 ລ້ານໂດລາສະຫະລັດ ເພີ່ມຂື້ນປະມານ 4 ເທື່ອທຽບໃສ່ປີ 2020 ເນື່ອງຈາກວ່າລາຄາຕົ້ນທຶນປຸຍເຄມີໄດ້ເພີ່ມຂື້ນ ຖ້າທຽບໃສ່ປີດຽວກັນ ພ້ອມດຽວກັນນັ້ນ, ພວກເຮົາກໍມີທ່າແຮງດ້ານພະລັງງານຫຼາຍດ້ານເປັນຕົ້ນ: ໄຟຟ້ານໍ້າຕົກ, ພະລັງງານແສງຕາເວັນ, ພະລັງງານລົມ, ທີ່ສາມາດຫັນປ່ຽນມາເປັນພະລັງງານທາງເລືອກໃໝ່ ເພື່ອທົດແທນການນໍາໃຊ້ພະລັງ ງານຈາກຟໍຊີວ.
ໂຄງການສືກສານີ້ ເຫັນວ່າມີຄວາມໝາຍຄວາມສຳຄັນ ແລະ ຄວາມຈຳເປັນ ສຳລັບພວກເຮົາໃນການກຳນົດຍຸດທະສາດກ່ຽວກັບພະລັງງານດັ່ງກ່າວໃນອານາຄົດ ທັງໄລຍະສັ້ນ ແລະ ໄລຍະຍາວ ເປັນຕົ້ນແມ່ນລະບົບການເກັບຮັກສາ, ຄວາມປອດໄພ, ການຜະລິດໄຟຟ້າ, ຂະແໜງຄົມມະນາຄົມຂົນສົ່ງທີ່ມີຕົ້ນທືນຕໍ່າ, ຂະແໜງອຸດສາຫະກຳບໍ່ແຮ່-ອຸດສາຫະກຳໜັກ ແລະ ຂະແໜງກະສິກຳ ແລະ ຂະແໜງອື່ນໆ ເພື່ອປະກອບສ່ວນການໃນຫລຸດຜ່ອນມົນລະພາວະຕາມນະໂຍບາຍການປ່ຽນແປງດີນຟ້າອາກາດ ແລະ ການພັດທະນາສີຂຽວຕາມທິດຍືນຍົງ.
ກອງປະຊຸມສຳມະນາໃນຄັ້ງນີ້, ເຫັນວ່າມີຄວາມໝາຍຄວາມສຳຕໍຄັນ ທີ່ພວກເຮົາຈະຕ້ອງໄດ້ມີການປືກສາຫາລືກັນ, ຄົ້ນຄວ້ານໍາກັນຢ່າງເລີກເຊີງ ກັບບັນດາຊ່ຽວຊານ ເພື່ອຖອດຖອນບົດຮຽນຈາກຕ່າງປະເທດ ແລະ ການສຶກສາຄວາມເປັນໄປໄດ້ໃນການພັດທະນາພະລັງງານດັ່ງກ່າວ ແລະ ບົນພື້ນຖານການສຶກສານີ້ ຈະເປັນຂໍ້ມູນອັນສຳຄັນໃຫ້ແກ່ກະຊວງພວກເຮົາ ກໍຄືລັດຖະບານ ເພື່ອກຳນົດທິດທາງ ແລະ ນະໂຍບາຍ ການຫັນໄປສູ່ການຈັດຕັ້ງປະຕິບັດໃຫ້ປະກົດຜົນເປັນຈີງໃນອານາຄົດ.
ແຫຼ່ງຂ່າວ ກົມສົ່ງເສີມ ແລະ ປະຢັດພະລັງງານ