ໂລກເຮົາກຳລັງຂາດແຄນນ້ຳດື່ມສະອາດ

0
584

ເນື່ອງຈາກວັນອະນຸລັກນ້ຳໂລກ (World Water Day) ເຊິ່ງກົງກັບວັນທີ 22 ມີນາ ຂອງທຸກໆປີ ອົງການສະຫະປະຊາຊາດ (UN) ໄດ້ກ່າວເຖິງການພັດທະນາແຫຼ່ງນ້ຳໂລກ ເຊິ່ງອອກມາເຕືອນວ່າ ໃນອະນາຄົດຕໍ່ໜ້ານີ້ ໂລກສ່ຽງທີ່ຈະເກີດວິກິດການຂາດແຄນນ້ຳ ໂດຍຈຳນວນຜູ້ທີ່ບໍ່ສາມາດເຂົ້າເຖິງນ້ຳດື່ມສະອາດໃນເມືອງຕ່າງທົ່ວໂລກ ຈະເພີ່ມຂຶ້ນ 2 ເທົ່າພາຍໃນປີ 2050.

ອົງການສະຫະປະຊາຊາດ ໄດ້ລາຍງານວ່າ: ປັດຈຸບັນ ມີປະຊາກອນໃນໂລກເກືອບ 1 ຕື້ຄົນ ທີ່ຕ້ອງປະເຊີນກັບບັນຫາຂາດແຄນນ້ຳ ແລະ ຈຳນວນດັ່ງກ່າວມີທ່າອ່ຽງເພີ່ມຂຶ້ນເປັນ 1,7-2,4 ພັນລ້ານຄົນ ພາຍໃນ 30 ປີຕໍ່ໜ້າ ແລະ ຄາດວ່າຄວາມຕ້ອງການນ້ຳໃນເມືອງຕ່າງໆຈະເພີ່ມຂຶ້ນອີກ 80%.

ບັນຫາການຂາດແຄນນ້ຳ ສ່ວນຫຼາຍເກີດຂຶ້ນຢູ່ເຂດຊົນນະບົດ ປັດຈຸບັນ ປະຊາກອນປະມານ 2-3 ຕື້ຄົນ ປະສົບກັບບັນຫາຂາດແຄນນ້ຳເປັນເວລາຢ່າງໜ້ອຍ 1 ເດືອນຕໍ່ປີ ນອກຈາກນີ້ຍັງມີ 2 ຕື້ຄົນທົ່ວໂລກ ທີ່ບໍ່ມີນ້ຳສະອາດດື່ມ ຂະນະທີ່ອີກ 3,6 ຕື້ຄົນບໍ່ສາມາດເຂົ້າເຖິງສຸຂະອະນະໄມທີ່ມີການຈັດການຢ່າງປອດໄພ.

ໃນຊ່ວງ 40 ປີທີ່ຜ່ານມາ ຄວາມຕ້ອງການໃຊ້ນ້ຳເພີ່ມຂຶ້ນທົ່ວໂລກປະມານ 1% ຕໍ່ປີ ແລະ ຈະເພີ່ມຂຶ້ນເລື່ອຍໆ ເພາະເກີດຈາກການຂະຫຍາຍໂຕຂອງປະຊາກອນໂລກ.

ໃນອາທິດນີ້ ສະຫະປະຊາຊາດຈະຈັດການປະຊຸມເລື່ອງວິກິດການນ້ຳທີ່ນິວຢອກ ສະຫະລັດອາເມຣິກາ ເປັນຄັ້ງທຳອິດໃນຮອບ 40 ປີ ນັບຕັ້ງແຕ່ປີ 1977 ໂດຍມີລັດຖະບານເນເທີແລນ ແລະ ທາຈິກິສຖານເປັນເຈົ້າພາບ ໃນກອງປະຊຸມຈະເວົ້າເຖິງບັນຫານ້ຳໃນທົ່ວໂລກ.

ທ່ານ ໂຢຮັນ ລັອກສະຕອມ ຜູ້ອຳນວຍການສະຖາບັນວິໄຈຜົນກະທົບສະພາບພູມອາກາດ ກ່າວວ່າ ມີຫຼັກຖານທາງວິທະຍາສາດວ່າ ເຮົາກຳລັງເກີດວິກິດການນ້ຳ ແລະ ປ່ຽນແປງວັດຕະຈັກທາງອຸທົກວິທະຍາທົ່ວໂລກຜ່ານສິ່ງທີ່ເຮົາກຳລັງເຮັດກັບສະພາບອາກາດ.

ຄະນະກຳມາທິການລະດັບໂລກດ້ານເສດຖະສາດນ້ຳ ພົບວ່າ ພາຍໃນປີ 2030 ຄວາມຕ້ອງການນ້ຳຈືດມີຫຼາຍກວ່າແຫຼ່ງນ້ຳເຖິງ 40% ເຊິ່ງຈະມີຜົນຕໍ່ເສດຖະກິດ ທຳມະຊາດ ຊີວິດໃນເມືອງ ແລະ ສະພາບອາກາດ ແຕ່ມີບໍ່ເທົ່າໃດປະເທດທີ່ດຳເນີນການເພື່ອຮັກສາແຫຼ່ງນ້ຳ ແລະ ຫຼຸດມົນລະພາວະ.

ທີ່ມາ theguardian