ນັກວິທະຍາສາດຄົ້ນພົບການກ່ຽວພັນລະຫວ່າງຄວັນລົດ ແລະ ມະເຮັງປອດ ທີ່ຊ່ວຍອະທິບາຍວ່າເປັນຫຍັງຄົນບໍ່ສູບຢາຈຶ່ງເກີດເປັນມະເຮັງ.
ນັກວິທະຍາສາດໄດ້ເປີດເຜີຍວ່າ ມົນລະພິດທາງອາກາດເຮັດໃຫ້ຄົນເຮົາເກີດເປັນມະເຮັງປອດ ໂດຍຜົນການຄົ້ນພົບວ່າ ອະນຸພາກທີ່ນ້ອຍຢູ່ໃນຄວັນລົດ ມັນກາຍພັນຢູ່ໃນປອດ ແລະ ເຮັດໃຫ້ພວກມັນກາຍເປັນມະເຮັງ ເຊິ່ງມັນອະທິບາຍໄດ້ວ່າ ເປັນຫຍັງຜູ້ບໍ່ສູບຢາຈໍານວນຫຼາຍ ຈຶ່ງເກີດເປັນມະເຮັງປອດ ແລະ ເປັນການກະຕຸ້ນໃຫ້ເຫັນເຖິງຜົນກະທົບຂອງມົນລະພິດຕໍ່ສຸຂະພາບຂອງມະນຸດ.
ສາດສະດາຈານ ຊາວສ໌ ສະວໍຕັນ ຈາກສະຖາບັນ Francis Crick ແລະ ມະຫາວິທະຍາໄລ College London ກ່າວວ່າ ການເປັນມະເຮັງປອດ ຈາກມົນລະພິດທາງອາກາດ ແມ່ນມີຄວາມສ່ຽງຕໍ່າກວ່າການສູບຢາ, ແຕ່ພວກເຮົາບໍ່ສາມາດຄວບຄຸມສິ່ງທີ່ພວກເຮົາຫາຍໃຈເຂົ້າໄດ້.
ໃນທົ່ວໂລກ ຄົນຈຳນວນຫຼາຍຕ້ອງປະເຊີນກັບມົນລະພິດທາງອາກາດທີ່ບໍ່ປອດໄພ ຫຼາຍກວ່າປະເຊີນກັບສານເຄມີທີ່ເປັນພິດໃນຄວັນຢາສູບ ແຕ່ການສູບຢາກໍຍັງເປັນສາເຫດຫຼັກທີ່ພາໃຫ້ເປັນມະເຮັງປອດ ແຕ່ມົນລະພິດທາງອາກາດພາຍນອກ ເຮັດໃຫ້ເກີດ 1 ໃນ 10 ຂອງການເປັນມະເຮັງປອດໃນອັງກິດ, ແລະ ມີປະມານ 6.000 ຄົນ ທີ່ບໍ່ເຄີຍສູບຢາ ໄດ້ເສຍຊີວິດດ້ວຍມາເຮັງປອດທຸກໆປີ.
ໃນປີ 2019 ທົ່ວໂລກ ມີຜູ້ເສຍຊີວິດຈາກມະເຮັງປອດ ປະມານ 300.000 ຄົນ ເກີດຈາກການໄດ້ສູດດົມເອົາຝຸ່ນລະອອງຂະໜາດນ້ອຍ PM2.5 ທີ່ມີຢູ່ໃນມົນລະພິດທາງອາກາດ.
ເຖິງຢ່າງໃດກໍຕາມ ສາເຫດຂອງການເປັນມະເຮັງຍ້ອນມົນລະພິດທາງອາກາດ ກໍ່ຍັງບໍ່ທັນໄດ້ຢືນຢັນຊັດເຈນເທື່ອ ເຊິ່ງຕ່າງກັບການສູບຢາ ຫຼື ການຖືກແສງແດດຫຼາຍເກີນໄປ ທີ່ເຮັດໃຫ້ເປັນມະເຮັງປອດ ແລະ ມະເຮັງຜິວໜັງໂດຍກົງ.
ຜົນການວິໄຈຫຼ້າສຸດ ສະແດງໃຫ້ເຫັນວ່າ ເຊວທີ່ມີການກາຍພັນທີ່ຢູ່ໃນປອດເຮົາ ສາມາດກາຍເປັນມະເຮັງໄດ້ເມື່ອມັນສຳຜັດກັບຂີ້ຝຸ່ນທີ່ມີອະນຸພາກນ້ອຍ PM2.5 ໂດຍອະນຸພາກຂະໜາດນ້ອຍເຫຼົ່ານີ້ສ່ວນໃຫຍ່ເກີດຈາກການເຜົາໄໝ້ຂອງນ້ຳມັນເຊື້ອໄຟ ເຊິ່ງເຮົາຕ້ອງແກ້ໄຂບັນຫາຢ່າງຮີບດ່ວນ ແລະ ຈິງຈັງຂຶ້ນຕື່ມ.
” ຄົນເຮົາສາມາດເລືອກໄດ້ວ່າ ເຮົາຈະສູບຢາ ຫຼື ບໍ່ສູບໄດ້ ແຕ່ເຮົາບໍ່ສາມາດເລືອກອາກາດທີ່ຈະຫາຍໃຈໄດ້”
ຂໍ້ມູນຈາກ the guardian