ລຸງສົມຈິດ ສີທະວົງ ໄວ 50 ປີ ຢູ່ ບ້ານຫ້ວຍເປັດເມືອງແກ່ນທ້າວ ແຂວງໄຊຍະບູລີ ເປັນໜຶ່ງໃນຜູ້ຮັກຫອມອາຊີບກະສິກຳ
ໄດ້ເລີ່ມບຸກເບີກປູກຖົ່ວດາວ ອິນຄາ ເພື່ອຂາຍເປັນສິນຄ້າ ຕັ້ງຄວາມຫວັງຜົນເກັບກ່ຽວປີທຳອິດຈະສ້າງເງິນໄດ້ລະດັບ
100 ລ້ານກີບ.
ລຸງສົມຈິດ ໄດ້ມີແນວຄິດລິເລີ່ມປູກຖົ່ວດາວອິນຄາເປັນສິນຄ້າ ພ້ອມລົງມືປະຕິບັດຕົວຈິງໃນຕົ້ນເດືອນມິຖຸນາປີ 2014ນີ້,
ໃນເນື້ອທີ່ 1 ເຮັກຕາກວ່າ ລວມ 1.500 ຕົ້ນ ດ້ວຍງົບປະມານລົງທຶນທັງໝົດ 20 ລ້ານກີບ ເພື່ອສ້າງລາຍຮັບເສີມສູ່ຄອບ
ຄົວ ກັບລາຍຮັບພືດເສດຖະກິດອື່ນໆ ທີ່ຄອບຄົວຂອງລຸງໄດ້ແລ້ວກ່ອນໜ້ານີ້ ຂະນະນີ້ພາຍໃນຄອບຄົວຂອງລຸງມີທັງໝົດ
7 ຄົນ, ມີແຮງງານຕົ້ນຕໍ 5 ແຮງງານ, ສຳຮອງ 1 ແຮງງານ.
ລຸງສົມຈິດໄດ້ເວົ້າສູ່ຟັງວ່າ ເມື່ອກ່ອນ ນອກຈາກເຮັດນາປູກເຂົ້າໃນແຕ່ລະປີແລ້ວ, ລຸງຍັງໄດ້ເຮັດໄຮ່ງາ ແລະ ຝ້າຍ ເພື່ອ
ຂາຍເປັນສິນຄ້າ ແຕ່ລາຍຮັບກໍຍັງບໍ່ສູງເທື່ອ ມາຮອດປີ 2006 ລຸງໄດ້ຫັນມາປູກສາລີເປັນສິນຄ້າໃນເນື້ອທີ່ 18 ເຮັກຕາ
ຜົນຜະລິດປີໜຶ່ງໄດ້ 60 ກວ່າໂຕນ ຂາຍໄດ້ເງິນ 80 ລ້ານກີບຕໍ່ປີ.
ລຸງບອກວ່າ: ໃນການປູກສາລີນັ້ນ ແມ່່ນຕ້ອງໃຊ້ຕົ້ນທຶນສູງ ຖ້າຫັກຕົ້ນທຶນ ອອກແລ້ວຈະເຫຼືອຢູ່ປະມານ 20-30 ລ້ານກີບ
ຕໍ່ປີອີກຢ່າງໜຶ່ງຍັງໄດ້ໃຊ້ຢາຂ້າຫຍ້າ ເປັນການສ່ຽງຕໍ່ສຸຂະພາບອີກ ໂດຍໄດ້ຮັບຄຳແນະນຳຈາກໝູ່ຄູ່ບວກໃສ່ກັບຄວາມ
ມັກໃນການປູກຝັງຢູ່ແລ້ວ ລຸງຈິ່ງຕັດສິນໃຈມາປູກຖົ່ວດາວອິນຄາ ທີ່ມີຕະຫຼາດຮອງຮັບແລ້ວຢູ່ແຂວງໄຊຍະບູລີໃນປະຈຸ
ບັນ.
ຖົ່ວດາວອິນຄາ ມີຊື່ທາງວິທະຍາສາດວ່າ: ຊາຈາ ອິນຈິ(sacha inchi) ຫຼື ບ້ານເຮົາເອິ້ນກັນວ່າເຄືອນ້ຳມັນນັ້ນເອງ ພືດດັ່ງ
ກ່າວມີມາກ່ວາ 3.000 ປີ ຊຶ່ງມີຕົ້ນກຳເນີດຢູ່ປະເທດເປຣູ ໃນທະວີບອາເມລິກາໃຕ້ ຖົ່ວດາວອິນຄາເປັນພືດທີ່ໃຫ້ຄຸນປະ
ໂຫຍດຢ່າງມະຫາສານ, ສາມາດນຳໄປປະກອບອາຫານ, ຜະລິດເປັນຢາປົວພະຍາດ ແລະ ເຄື່ອງສຳອາງ. ໃນເມັດຖົ່ວມີປະ
ລິມານນ້ຳມັນສູງເຖິງ 50%, ອຸດົມສົມບູນໄປດ້ວຍໂອເມກາ 3, 6 ແລະໂອເມກາ 9; ມີສານຕ້ານອະນຸມູນອິດສະຫຼະ ແລະ
ວິຕາມິນຕ່າງໆທີ່ເປັນປະໂຫຍດຕໍ່ຮ່າງກາຍຂອງຄົນເຮົາ.
ຖົ່ວດາວອິນຄາເປັນພືດທີ່ປູກງ່າຍ ແລະ ມີອາຍຸຍືນຍາວແຕ່ 15 ຫາ 50 ປີ, ຫຼັງຈາກປູກໄດ້ 7 ຫາ 8 ເດືອນ ກໍ່ສາມາດເກັບ
ຜົນຜະລິດໄດ້ ເດືອນໜຶ່ງສອງຄັ້ງ ແລະ ຈະເພີ່ມຂຶ້ນເລື້ອຍໆ ສະເພາະຢູ່ເມືອງແກ່ນທ້າວ ແມ່ນມີຕະຫຼາດຮອງຮັບຜົນຜະ
ລິດຂອງຖົ່ວດາວອິນຄາແລ້ວ.
ລຸງສົມຈິດ ຍັງກ່າວດ້ວຍຄວາມໝັ້ນໃຈວ່າ: ການປູກຖົ່ວດາວອິນຄາໃນປີທຳອິດນີ້ຈະໃຫ້ໄດ້ 100 ລ້ານກີບ ແລະ ນີ້ເປັນ
ພຽງແຕ່ການເລີ່ມຕົ້ນເທົ່ານັ້ນ, ໃນຕໍ່ໜ້າ ລຸງຍັງຈະຂະຫຍາຍເນື້ອທີ່ປູກຖົ່ວຊະນິດດັ່ງກ່າວຕື່ມອີກ ແລະ ຈະຍຶດຖືອາຊີບ
ນີ້ເພື່ອສ້າງລາຍຮັບໃຫ້ກັບຄອບຄົວໄປຄຽງຄູ່ກັບການ ປູກພືດຊະນິດອື່ນໆ ແລະ ການຄ້າຂາຍຍ່ອຍໃນຄອບຄົວ.
ແຫລ່ງຂ່າວ: ເສດຖະກິດ – ສັງຄົມ