ເມື່ອບໍ່ດົນມານີ້ ຜູ້ຂຽນໄດ້ສໍາພາດຜູ້ສະໝັກຄົນໜຶ່ງ (ເປັນຄົນຟີລິບປີນ) ທີ່ມາຍື່ນສະໝັກເຮັດວຽກຢູ່ໃນບໍລິສັດ. ຈາກການສໍາພາດເປັນເວລາປະມານບໍ່ຮອດ 1 ຊົ່ວໂມງ ເຮັດໃຫ້ຂ້າພະເຈົ້າຮູ້ສຶກປະທັບໃຈ ແລະ ຕັດສິນໃຈຮັບເອົາລາວເຂົ້າເຮັດວຽກທັນທີ ແລະ ຍິນດີຮັບຂໍ້ສະເໜີເລື່ອງເງິນເດືອນຕາມທີ່ລາວສະເໜີມາ ໂດຍບໍ່ຕໍ່ຈັກກີບ. ຈາກປະສົບການນີ້ຢາກແຊຣ໌ຂໍ້ຄິດໃຫ້ນ້ອງໆທີ່ກໍາລັງຊອກວຽກເຮັດງານທໍາຢູ່ວ່າ:

1.) ຄົນຊາດອື່ນເຂົາມີຄວາມຮັບຮູ້ວິທີເຂົ້າຫາວຽກ:
ບໍ່ວ່າການຂຽນຈົດໝາຍສະໝັກງານ(Covering Letter), Curriculum Vitae (CV) ໄດ້ຢ່າງໜ້າສົນໃຈ. ແລະ ເວລາການຕອບສໍາພາດຂອງເຂົາ ເຂົາກໍ່ເຮັດໄດ້ດີຄືກັນກັບວ່າເຂົາໄດ້ຮຽນມານີ້ແຫຼະ ເຂົາມີຄວາມໝັ້ນໃຈ ກ້າເວົ້າກ້າວ່າ, ຈຶ່ງເຮັດໃຫ້ນາຍຈ້າງສົນໃຈທີ່ຈະຈ້າງລາວ.

2.) ຄວາມຄິດ, ຄຸນສົມບັດ ແລະ ທັດສະນະຄະຕິ:
ເຂົາເຈົ້າຮູ້ຄິດ ມີຄວາມອົດທົນ ມີຄວາມຮັບຜິດຊອບ (ບາງຄົນອາດຈະຖາມວ່າຮູ້ໄດ້ຈັງໃດລົມກັນດ້າມຊົ່ວໂມງ? ຖ້າຈະຖາມແບບນັ້ນກໍ່ຈະຕອບວ່າ HR ຫຼື Human Resource ແມ່ນວິຊາກ່ຽວກັບມະນຸດສາດ/ຈິດຕະສາດ… ເຂົາມີເຄື່ອງມື ແລະ ວິທີຮູ້ໄດ້.

3.) ພາສາອັງກິດ:
ເຫັນວ່າພາສາອັງກິດຂອງເຂົາເກັ່ງ (ຍ້ອນວ່າສັງຄົມຟີລິປປີນເຂົາໃຊ້ພາສາອັງກິດມາແຕ່ນ້ອຍ) ອັນນີ້ເປັນຫ່ວງຄົນລາວເຮົາເລີຍວ່າ ຫຼັງຈາກເປີດ AEC ນີ້ຈະແຂ່ງເຂົາຍາກ, ຄືຄວາມຈິງໃນປັດຈຸບັນ ການຈ້າງຄູສອນພາສາອັງກິດໃນໂຮງຮຽນເອກະຊົນຕ່າງໆ ລ້ວນແຕ່ແມ່ນຄົນຕ່າງປະເທດ ເພາະຄຸນນະພາບເຂົາດີກວ່າ.

4.) ຄ່າຈ້າງ (ເງິນເດືອນ):
ເມື່ອທຽບແຕ່ລະດ້ານແລ້ວຄົນເຂົາມີຄວາມຮູ້ສູງ, ຄົນເຂົາມີຄວາມອົດທົນ, ມີວິໄນ, ມີຄວາມຮັບຜິດຊອບ, ທັກສະດ້ານພາສາທີ່ແຂງແຮງກວ່າ ແຕ່ວ່າເມື່ອມາທຽບລາຄາແລ້ວເຫັນວ່າ ຖືກກວ່າຄົນລາວດ້ວຍຊໍ້າ.

ສິ່ງທີ່ຢາກມານໍາມາແຊຣ໌ໃຫ້ນ້ອງໆຟັງວ່າ ນ້ອງໆຄວນຈະຄິດໃຫ້ເປັນ ແລະ ບຸກບືນແຕ່ດຽວນີ້ແລ້ວ ເພາະໃນປັດຈຸບັນຍັງເຫັນຫຼາຍຄົນທີ່ຮຽນຈົບມາແລ້ວລໍຖ້າເຂົ້າແຕ່ເຮັດວຽກນໍາລັດ ປີນີ້ບໍ່ໄດ້ ກໍ່ຖ້າປີໜ້າ ປີໜ້າບໍ່ໄດ້ກໍ່ຖ້າໄປເລື້ອຍໆ… ໂດຍທີ່ບໍ່ຄິດໄປຊອກວຽກເຮັດເພື່ອເກັບເງິນ ເກັບປະສົບການເລີຍ. ຖ້າເປັນແບບນີ້ອະນາຄົດລໍາບາກແນ່ນອນ ແມ່ນຢູ່ວ່າຕອນນີ້ອາໄສກິນນໍາພໍແມ່ ຜູ້ຂຽນເຊື່ອວ່າ ອາຍຸນ້ອງໆຮອດ 3 5ຂຶ້ນໄປແລ້ວ ພໍ່ແມ່ຄົງບໍ່ມາລ້ຽງຢູ່ແນ່ນອນ… ແລະ ປີໜ້າເປີດ AEC ແລ້ວ ຍິ່ງຈະຊອກວຽກຍາກຂຶ້ນອີກເພາະຄົນນອກຈະເຂົ້າມາຍາດວຽກຄົນລາວຫຼາຍຂຶ້ນ.

ຢາກໃຫ້ນ້ອງໆເອົາໃຈໃສ່ ບຸກບືນ ບໍ່ຮູ້ກໍ່ຕ້ອງຊອກຫາຮຽນຮູ້ ທຸກຢ່າງມີທາງອອກສະເໝີ. ດ້ວຍຄວາມຫວັງດີ ຈາກ: ແອັດມິນ ເພຈ iJOB.la