ທ່ານ ຮສຈ.ດຣ. ສົມອົກ ກິ່ງສະດາ ລັດຖະມົນຕີຊ່ວຍວ່າການ ກະຊວງສາທາລະນະສຸກ ໄດ້ກ່າວປີດໃນກອງປະຊຸມ
ປຶກສາຫາລື ແລະ ຮັບຮອງແຜນຍຸດທະສາດ ແລະ ແຜນງານແຫ່ງຊາດ ໃນການສະກັດກັ້ນ ແລະ ຕ້ານເຊື້ອເຮສ
ໄອວີ (ພະຍາດເອດ) 5 ປີ (2016-2020) ວ່າ: ກອງປະຊຸມດັ່ງກ່າວມີຄວາມໝາຍສຳຄັນ ທີ່ຈະໄດ້ເປັນເອກະພາບ
ໃນການກຳນົດບຸລິມະສິດພື້ນທີ່ກຸ່ມເປົ້າໝາຍ ກົນໄກປະສານງານ ແບ່ງຄວາມຮັບຜິດຊອບທຸກພາກສ່ວນມີສ່ວນ
ຮ່ວມໃນການຈັດຕັ້ງປະຕິບັດ ແລະ ຮັບຜິດຊອບຮ່ວມກັນ ເຮັດວຽກບໍ່ຊ້ຳຊ້ອນກັນ ແລະ ໄດ້ສ້າງແຜນຍຸດທະສາດ
ທີ່ເປັນເອກະພາບ ໃນການຈັດຕັ້ງປະຕິບັດວຽກງານໃນການຕອບໂຕ້ຕໍ່ເຊື້ອເຮສໄອວີ ແລະ ພະຍາດເອດ.
ໃນໄລຍະຜ່ານມາ ກະຊວງສາທາ ກໍ່ຄືສູນຕ້ານເອດ ແລະ ພາກສ່ວນທີ່ກ່ຽວຂ້ອງ ກໍ່ໄດ້ພ້ອມກັນທົບທວນຄືນ ການ
ຈັດຕັ້ງປະຕິບັດແຜນຍຸດທະສາດ ແລະ ແຜນງານແຫ່ງຊາດ 5 ປີ (2011-2015) ເຫັນວ່າປະສົບຜົນສຳເລັດຫຼາຍ
ດ້ານ ສະແດງອອກຄື ສາມາດຮັກສາອັດຕາການຕິດເຊື້ອເຮສໄອວີ ໃຫ້ຢູ່ໃນລະດັບຕ່ຳໄວ້ໄດ້ ປະຊາຊົນບັນດາເຜົ່າ
ແລະ ກຸ່ມສ່ຽງໄດ້ເຂົ້າເຖິງຂໍ້ມູນຂ່າວສານ ມີຄວາມຮູ້ກັບເຊື້ອເຮສໄອວີ ແລະ ສາມາດປ້ອງກັນຕົນເອງ ບໍ່ໃຫ້ຕິດເຊື້ອ
ເຮສໄອວີໄດ້ໃນລະດັບໜຶ່ງ ພ້ອມທັງມີສະຖານທີ່ໃຫ້ຄຳປຶກສາ ແລະ ກວດເລືອດ 165 ແຫ່ງ ແລະ ມີສູນປິ່ນປົວດ້ວຍ
ຢາ 9 ແຫ່ງ ໃນຂອບເຂດທົ່ວປະເທດ ເຊິ່ງຜົນສຳເລັດດັ່ງກ່າວ ໄດ້ປະກອບສ່ວນຢ່າງຕັ້ງໜ້າ ເຂົ້າໃນການບັນລຸເປົ້າ
ໝາຍສະຫັດສະວັດທີ 6 ໃນປີ 2015 ແລະ ຕໍ່ກັບຜົນສຳເລັດ ກໍ່ຍັງມີສິ່ງທ້າທາຍຫຼາຍດ້ານ ທີ່ຈະຕ້ອງເພີ່ມມາດຕະ
ການໃນການປ້ອງກັນໃຫ້ຮັດກຸມ ໂດຍຈະນຳຂໍ້ຄົງຄ້າງ ນຳມາຄົ້ນຄວ້າພິຈາລະນາ ວິເຄາະ ວິໄຈໃຫ້ຖີ່ຖ້ວນ ເພື່ອຈະ
ໄດ້ນຳໃຊ້ເຂົ້າໃນການວາງແຜນຍຸດທະສາດ ແລະ ວາງມາດຕະການ ລວມທັງກຳນົດກິດຈະກຳຕ່າງໆໃຫ້ຄົບຖ້ວນ
ແລະ ຮັດກຸມ ເຊິ່ງການຈັດກອງປະຊຸມປຶກສາຫາລືດັ່ງກ່າວຂຶ້ນນັ້ນ ເພື່ອໃຫ້ພາກສ່ວນທີ່ກ່ຽວຂ້ອງ ກໍ່ຄືຜູ້ເຂົ້າຮ່ວມ
ພ້ອມກັນສຸມທຸກສະຕິປັນຍາ ປະກອບຄຳຄິດຄຳເຫັນໃສ່ແຜນຍຸດທະສາດດັ່ງກ່າວ ໃຫ້ມີຄວາມສົມບູນຄົບຖ້ວນ
ໄປຕາມທິດທາງລວມຂອງມະຕິIX ຂອງສູນກາງພັກ ແຜນພັດທະນາເສດຖະກິດ-ສັງຄົມຂອງລັດຖະບານ ເວົ້າລວມ
ເວົ້າສະເພາະ ໃຫ້ສອດຄ່ອງກັບແຜນພັດທະນາສາທາລະນະສຸກ ຄັ້ງທີ VIII ແລະ ແຜນປະຕິຮູບສາທາລະນະສຸກທີ່ໄດ້
ກຳນົດໄວ້ ເຊິ່ງຍຸດທະສາດດັ່ງກ່າວ ຈະເປັນບ່ອນອີງໃນການຈັດຕັ້ງປະຕິບັດ ວຽກງານໃນການສະກັດກັ້ນ ແລະ ຕ້ານ
ເຊື້ອເຮສໄອວີ ພະຍາດເອດໃນຕໍ່ໜ້າ ແລະ ເປັນບ່ອນອີງສຳຄັນໃນການລະດົມທຶນໃນອະນາຄົດ.
ກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 7 ພະຈິກ 2014 ທີ່ໂຮງແຮມແລນມາກ ນະຄອນຫຼວງວຽງຈັນ ເປັນປະທານ
ຂອງທ່ານ ຮສຈ.ດຣ. ສົມອົກ ກິ່ງສະດາ ລັດຖະມົນຕີຊ່ວຍວ່າ ການກະຊວງສາທາລະນະສຸກ ໂດຍມີຄະນະກຳມະການ
ຕ້ານເອດແຫ່ງຊາດ ຫົວໜ້າ ຮອງຫົວໜ້າສາທາລະນະສຸກ ແຂວງ ແລະ ນວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ແຫລ່ງຂ່າວ: ວຽງຈັນໃໝ່