ບໍລິສັດ ລັດວິສາຫະກິດ ນ້ຳມັນເຊື້ອໄຟລາວ ແລະ ບໍລິສັດ ກ່າຍອາ ເປໂຕຣ ຈຳກັດ (ສ ເກົາຫລີ) ໄດ້ຮ່ວມກັນເຊັນບົດບັນທຶກຄວາມເຂົ້າໃຈ ເພື່ອຮ່ວມມືກັນໃນການສຶກສາ ແລະ ພັດທະນາໂຄງການພະລັງງານຊີວະພາບ (ນ້ຳມັນໄບໂອ ອອຍ) ໂດຍຈະນຳໃຊ້ພະລັງງານມາຈາກທຳມະຊາດ 2 ແຫລ່ງຄື: ພະລັງງານຈາກການເຜົາໄໝ້ ແລະ ພະລັງງານຈາກການໝັກດອງ (ທາດເຫລົ້າ) ທີ່ນຳໃຊ້ເຕັກໂນໂລຊີທັນສະໄໝເຂົ້າໃນການຜະລິດ ເຊິ່ງ ນໍ້າມັນທີ່ຜະລິດໄດ້ນັ້ນ ຈະມີຄຸນນະພາບສູງກວ່ານ້ຳມັນແອັດຊັງທຳມະດາ.
ໃນວັຍທີ 6 ມິຖຸນາ 2022 ທີ່ຜ່ານມານີ້ ໄດ້ຈັດພິທີເຊັນບົດບັນທຶກຄວາມເຂົ້າໃຈ ໂດຍການຮ່ວມລົງນາມ ລະຫວ່າງ ທ່ານ ສີສັງຄົມ ໂຄດໂຍທາ ຜູ້ອຳນວຍການບໍລິສັດ ລັດວິສາຫະກິດ ນ້ຳມັນເຊື້ອໄຟລາວ ແລະ ທ່ານ ຊຳ ແມງ (Sam Maeng) ປະທານສະມາຄົມອຸດສາຫະກຳ ແລະ ແລກປ່ຽນວັດທະນະທຳ ສ ເກົາຫລີ-ລາວ ໂດຍມີພາກສ່ວນທີ່ກ່ຽວຂ້ອງສອງຝ່າຍ ເຂົ້າຮ່ວມເປັນສັກຂີພິຍານ.
ທ່ານ ສິດທິ ສີລາເພັດ ປະທານບໍລິສັດ ສັກສິດ ທີ່ປຶກສາ ແລະ ການຄ້າ ຈຳກັດຜູ້ດຽວ ໄດ້ກ່າວວ່າ: ໂຄງການດັ່ງກ່າວ, ເປັນໂຄງການສຳຄັນ ທີ່ຈະຊ່ວຍພັດທະນາພື້ນຖານໂຄງລ່າງ ຂອງ ສປປ ລາວ ໃນການຫລຸດຜ່ອນ ແລະ ບໍ່ນຳເຂົ້າລະບົບເພິ່ງພາພະລັງງານນ້ຳມັນຈາກຕ່າງປະເທດ ຫລັກໆກໍຄື ພະລັງງານນ້ຳມັນເຊື້ອໄຟ ທີ່ປັດຈຸບັນມີການຂາດແຄນ ເຊິ່ງການນຳເຂົ້ານ້ຳມັນເຊື້ອໄຟທັງໝົດ ແມ່ນນຳເຂົ້າມາຈາກຕ່າງປະເທດ 100%. ພາຍຫລັງທີ່ເຊັນບົດບັນທຶກແລ້ວ ພວກເຮົາຈະໃຊ້ເວລາປະມານ 3 ເດືອນ ໃນການສຶກສາໂຄງການ ເຊິ່ງຂໍ້ມູນ ແລະ ລາຍລະອຽດຕ່າງໆນັ້ນແມ່ນມີຄົບແລ້ວ ເພື່ອໃຫ້ສອດຄ່ອງກັບນະໂຍບາຍຂອງການລົງທຶນ ພວກເຮົາໄດ້ຮ່ວມງານກັບ ບໍລິດສັດລັດວິສາຫະກິດ ນ້ຳມັນເຊື້ອໄຟລາວ ທີ່ມີກຳລັງແຮງດ້ານການຕະຫລາດ, ມີສາງເກັບນ້ຳມັນຢູ່ແລ້ວ ພຽງແຕ່ເພີ່ມເຕັກໂນໂລຊີ ເຄື່ອງຈັກ ແລະ ວັດຖຸມາປະກອບເຂົ້າກັນ ກໍຈະເຮັດໃຫ້ການຜະລິດນ້ຳມັນໄວຂຶ້ນກວ່າເກົ່າ.
ສຳລັບ ມູນຄ່າການລົງທຶນໃນເບື້ອງຕົ້ນ ປະມານ 15 ລ້ານໂດລາສະຫະລັດ ສ່ວນກຳລັງການຜະລິດແມ່ນ 1 ລ້ານລິດຕໍ່ມື້ ແລະ ໃນໜຶ່ງເດືອນ ຈະສາມາດຜະລິດນໍ້າມັນພຽງແຕ່ 25 ວັນ ສະເລ່ຍແມ່ນຜະລິດໄດ້ 25 ລ້ານລິດຕໍ່ເດືອນ, ໂຮງງານຜະລິດນ້ຳມັນໃນເບື້ອງຕົ້ນ ແມ່ນຈະເອົາສາງເກັບນ້ຳມັນ ທີ່ບໍ່ໄດ້ໃຊ້ຢູ່ເຂດເມືອງຫາດຊາຍຟອງ ນະຄອນຫລວງວຽງຈັນ ເປັນບ່ອນຜະລິດກ່ອນ ໂດຍຈະຜະລິດໄວທີ່ສຸດແມ່ນນ້ຳມັນແອັດຊັງ ເຊິ່ງວັດຖຸດິບແມ່ນຈະນຳເຂົ້າມາຈາກຕ່າງປະເທດທັງໝົດ ໂດຍສະເພາະແມ່ນເຫລົ້າແອັດຕໍນໍ ທີ່ຜະລິດມາຈາກມັນຕົ້ນ ແລະ ອ້ອຍ ຄາດວ່າໃນປີ 2023 ທົ່ວປະເທດຈະໄດ້ນໍາໃຊ້ນໍ້າມັນ ແອັດຊັງຄຸນນະພາບສູງ ທີ່ຜະລິດຈາກພະລັງງານຊີວະພາບ ຢູ່ໃນ ສປປ ລາວ.
ແຫຼ່ງຂ່າວຈາກ ວຽງຈັນໃໝ່