ຈາກເຫດການນ້ຳຖ້ວມ ແລະ ດິນຖະຫຼົ່ມກະທັນຫັນໃນລັດອັສສຳ ທາງຕາເວັນອອກສຽງເໜືອຂອງອິນເດຍ ມີຜູ້ເສຍຊີວິດຢ່າງນ້ອຍ 25 ຄົນ ແລະ ຕ້ອງອົບພະຍົບຄໄນອອກຈາກພຶ້ນທີ່ຢູ່ອາໄສອີກຫຼາຍກວ່າ 650,000 ຄົນ ຕະຫຼອດໃນຊ່ວງສອງອາທິດທີ່ຜ່ານມາ.

ໃນວັນທີ 24 ພຶດສະພາ 2022 ສຳນັກງານ ລອຍເຕີ ລາຍງານຈາກເມືອງ ກູວາຮາຕິ ວ່າ: ພາຍຸມໍລະສຸມຊິ່ງເກີດຂຶ້ນທຸກປີໃນໄລຍະນີ້ຂອງລັດອັສສຳ ເຮັດໃຫ້ເກີດນ້ຳຖ້ວມ ແລະ ດິນຖະຫຼົ່ມເຮັດໃຫ້ຊາວບ້ານຕ້ອງອົບພະຍົບອອກຈາກພຶ້ນທີ່

ສຳລັບເຫດການນ້ຳຖ້ວມແມ່ນມາຈາກ ແມ່ນ້ຳພົມບຸດ ໜຶ່ງໃນແມ່ນ້ຳທີ່ໃຫຍ່ທີ່ສຸດໃນໂລກ ຊຶ່ງໄຫຼຈາກ ທິເບດ ຜ່ານອິນເດຍ ແລະ ສຶ້ນສຸດຢູ່ທີ່ບັງກາລາເທດ ໄດ້ຂຶ້ນສູງຈົນລົ້ນຝັ່ງ ແລະ ໄຫຼຖ້ວມເຂົ້າໝູ່ບ້ານຫຼາຍກວ່າ 1,800 ໝູ່ບ້ານໃນ 26 ເຂດ ຕັ້ງແຕ່ຕົ້ນເດືອນ.

ຢ່າງໃດກໍຕາມຈາກເຫດການດັ່ງກ່າວໄດ້ສ້າງຄວາມເສຍຫາຍຢ່າງຫຼວງຫຼາຍ ແລະ ເຮັດໃຫ້ມີຜູ້ເສຍຊີວິດ 20 ຄົນ ແລະ ອີກ 5 ຄົນເສຍຊີວິດຈາກດິນຖະຫຼົ່ມໃນຊ່ວງ 10 ມື້ທີ່ຜ່ານມາ. ທັງນີ້ ເຈົ້າໜ້າທີ່ລັດຈໄດ້ຈັດຕັ້ງຄ້າຍບັນເທົາທຸກ 366 ຈຸດທົ່ວ 20 ເຂດ ເປັນທີ່ພັກຊົ່ວຄາວໃຫ້ປະຊາຊົນກວ່າ 95,000 ຄົນ, ສ່ວນຫົນທາງ, ບ້ານເຮືອນ ແລະ ອາຄານຫຼາຍແຫ່ງໃນລັດ ຍັງຄົງຢູ່ພາຍໃຕ້ລະດັບນ້ຳທີ່ຖ້ວມສູງ.