ທ່ານ ຍູນ ຊ໋ອກ-ຍໍ (Yoon Seok-yeol) ຜູ້ສະໝັກພັກຝ່າຍຄ້ານສາຍອານຸລັກນິຍົມ ໄດ້ຊະນະການເລືອກຕັ້ງປະທານາທິບໍດີເກົາຫຼີໃຕ້ ໃນວັນພຸດວານນີ້ ໃນການເລືອກຕັ້ງຄູ່ທີ່ສູສີທີ່ສຸດຄັ້ງໜຶ່ງໃນປະຫວັດສາດຍຸກໃໝ່ຂອງປະເທດເຊິ່ງຈະເປັນຕົວກຳນົດທິດທາງເສດຖະກິດໃຫຍ່ອັນດັບ 4 ຂອງອາຊີໃນ 5 ປີຂ້າງໜ້າ
ອີງຕາມການລາຍງານຂອງສຳນັກຂ່າວ Reuters ລາຍງານຈາກກຸງໂຊລ ເກົາຫຼີ ໃນວັນທີ 9 ມີນາ ຜ່ານມານີ້ວ່າ: ທ່ານ ຍູນ ຊ໋ອກ-ຍໍ (Yoon Sook-yeol) ອະດີດໄອຍະການຜູ້ໜຶ່ງອາຍຸ 60 ປີຂອງພັກພະລັງປະຊາຊົນ (PPP) ໄດ້ເອົາຊະນະຜູ້ແຂ່ງຂັນສຳຄັນຄື ທ່ານ ອີ ແຈງ-ມະຍອງ (Lee Jae-myeong) ຕົວແທນພັກປະຊາທິປະໄຕ ສ.ເກົາຫຼີ (DPK). ຊຶ່ງເປັນພັກຕົ້ນຕໍຂອງລັດຖະບານປະສົມຊຸດປັດຈຸບັນ. ດ້ວຍການລົງຄະແນນສຽງ 48.6% ທຽບກັບ 47.8% ຫຼັງຈາກການນັບບັດຜ່ານໄປ 99.3% ໃນ 5 ໂມງເຊົ້າວັນພະຫັດ ຕາມເວລາທ້ອງຖິ່ນ.
ທ່ານ ຍູນ ໄດ້ກ່າວພາຍຫຼັງໄດ້ຮັບຮູ້ຜົນຄະແນນເບືອ້ງຕົ້ນ ຢ່າງບໍ່ເປັນທາງການນວ່າ: ລາວຈະໃຫ້ກຽດແກ່ລັດຖະທໍາມະນູນແລະລັດຖະສະພາ. ແລະເຮັດວຽກຮ່ວມກັບພັກຝ່າຍຄ້ານ ເພື່ອແກ້ໄຂຄວາມຂັດແຍ່ງທາງການເມືອງ ແລະ ສົ່ງເສີມຄວາມສາມັກຄີ ພ້ອມກັບເອີ້ນການເລືອກຕັ້ງນີ້ວ່າ “ໄຊຊະນະຂອງປະຊາຊົນທຜູ້ຍິ່ງໃຫຍ່” ແລະ “ການແຂ່ງຂັນໄດ້ສິ້ນສຸດລົງແລ້ວ ພວກເຮົາຕ້ອງຈັບມືກັນ ແລະ ສາມັກຄີກັນເພື່ອປະຊາຊົນ ແລະປະເທດຊາດ”
ທ່ານ ອີ ໄດ້ຖະແຫຼງຍອມຮັບຄວາມພ່າຍແພ້ ແລະ ຍິນດີກັບທ່ານ ຍູນ ຄູ່ແຂ່ງຂັນຂອງຕົນ “ປະທານາທິບໍດີ ຂໍຮ້ອງໃຫ້ທ່ານເອົາຊະນະຄວາມແຕກແຍກ, ຄວາມຂັດແຍ້ງ ແລະເປີດຍຸກໃໝ່ແຫ່ງຄວາມສາມັກຄີປອງດອງ”
ຢ່າງໃດກໍຕາມເຖິງຈະບໍ່ມີປະສົບການທາງດ້ານການເມືອງ ທ່ານ ຍູນ ໄດ້ກາຍເປັນຄົນເດັ່ນດັງ ຫຼັງຈາກທີ່ເປັນຫົວໜ້າໃນການສືບສວນສອບສວນເລື່ອງສໍ້ລາດບັງຫຼວງ ກ່ຽວກັບກຸ່ມຄົນໃກ້ຊິດຂອງປະທານາທິບໍດີ ມຸນ ແຈ-ອິນ (Moon Jae-in) ຜູ້ນຳຄົນປັດຈຸບັນ. ໃນລະຫວ່າງການໂຄສະນາຫາສຽງ ທ່ານ ຍູນ ປະກາດທີ່ຈະກໍາຈັດການສໍ້ລາດບັງຫຼວງ ສົ່ງເສີມຄວາມຍຸດຕິທໍາ ລວມທັງການຊອກຫາວິທີ “ປັບປຸງ” ການພົວພັນກັບຈີນ ແລະມີຈຸດຍືນທີ່ແຂງຕໍ່ເກົາຫຼີເໜືອ.