ທ່ານເຄີຍປະສົບບັນຫາຊື້ຜັກ ໝາກໄມ້ ມາແລ້ວກິນບໍ່ທັນຈົນເຮັດໃຫ້ເນົ່າຄາຕູ້ເຢັນບໍ່? ຖ້າທ່ານເປັນຜູ້ໜຶ່ງທີ່ປະສົບບັນຫາດັ່ງກ່າວ ມື້ນີ້ລາວໂພສ ໄດ້ຮວບຮວມວິທີເກັບຜັກ ແລະ ໝາກໄມ້ ໃຫ້ໄດ້ດົນຂຶ້ນມາຝາກທຸກຄົນກັນ.
- ຫົວກະຣົດ
ວິທີການຮັກສາ ຫົວກາຣົດ ໃຫ້ຢູ່ດົນເທົ່າທີ່ເປັນໄປໄດ້ ຂັ້ນຕອນທໍາອິດແມ່ນການຕັດລໍາຕົ້ນທີ່ມີສີຂຽວທີ່ຕິດຢູ່ກັບກາຣົດອອກ ເນື່ອງຈາກໃບສາມາດດູດຊຶມສານອາຫານຈາກກາຣົດໄດ້. ຫຼັງຈາກນັ້ນ, ເອົາ ກາຣົດ ໃສ່ກ່ອງທີ່ມີນໍ້າ. ເນື່ອງຈາກວ່າ ກາຣົດ ເປັນພືດທີ່ມັກຄວາມຊຸ່ມຊື່ນ. ຫຼັງຈາກນັ້ນໃຫ້ຫໍ່ດ້ວຍພາດສະຕິກ ແລະ ເກັບຮັກສາໄວ້ໃນຕູ້ເຢັນ ຫຼື ຖ້າໃຜບໍ່ຢາກເອົາແຊ່ໄວ້ໃນນ້ຳ ກໍສາມາດຫໍ່ດ້ວຍຖົງຢາງພາດສະຕິກ ແລະ ເກັບໄວ້ໃນຕູ້ເຢັນແທນກໍໄດ້ເຊັ່ນກັນ.
2 ບ໋ອກໂຄລີ່ ແລະ ຜັກກະຫຼໍ່າ
ພຽງແຕ່ນໍາເອົາບ໋ອກໂຄລີ່ ໄວ້ໃນຕູ້ເຢັນ ໂດຍເອົາໃສ່ກ່ອງແຍກຕ່າງຫາກ ບໍ່ປະສົມກັບຜັກ, ໝາກໄມ້ ຫຼື ອາຫານອື່ນໆ ພຽງເທົ່ານີ້ ກໍສາມາດຊ່ວຍຍືດອາຍຸຂອງຜັກໄດ້ດົນອີກຕື່ມແລ້ວ.
3. ຜັກສະຫຼັດ
ວິທີເກັບຮັກສາຜັກສະຫຼັດໄວ້ໃຫ້ດົນຂຶ້ນແມ່ນ ໃຫ້ເດັດໃບເນົ່າອອກໃຫ້ໝົດ ຫຼັງຈາກນັ້ນໃຫ້ຫໍ່ດ້ວຍແຜ່ນເຈ້ຍທິດຊູ້ ແລ້ວເອົາໃສ່ໃນຖົງ ziplock, ຫຼັງຈາກນັ້ນເອົາໄວ້ໃນຕູ້ເຢັນ. ມັນຈະຊ່ວຍໃຫ້ເກັບໄວ້ໄດ້ດົນຂຶ້ນເຊັ່ນກັນ.
4. ຜັກໃບຂຽວ
ຜັກໃບຂຽວເຊັ່ນ: ຜັກຫົມ ແລະ ຜັກກາດຈະຮັກສາໄດ້ດົນຂຶ້ນ ຖ້າລ້າງໃຫ້ສະອາດ ຫຼັງຈາກນັ້ນ, ເຊັດດ້ວຍເຈ້ຍ ຫຼື ຜ້າເຊັດຈານ. ກ່ອນທີ່ຈະເອົາມັນເຂົ້າໄປໃນກ່ອງ ຫຼື ຖົງຢາງ ແລະ ເກັບຮັກສາໄວ້ໃນຕູ້ເຢັນ. ເຊິ່ງນອກຈາກຈະຊ່ວຍຍືດອາຍຸຂອງຜັກບໍ່ໃຫ້ເນົ່າໄວແລ້ວ ຍັງເຮັດໃຫ້ສະດວກໃນການນໍາເອົາອອກມາແຕ່ງກິນນໍາອີກ.
- ມັນຝຣັ່ງ
ມັນຝຣັ່ງ ໃຫ້ເກັບໄວ້ກັບແອັບເປິ້ນ ເພາະແອບເປິ້ນຜະລິດແກສເອທິລີນທີ່ສາມາດເຮັດໃຫ້ມັນຝຣັ່ງສາມາດຢູ່ໄດ້ດົນເຖິງ 8 ອາທິດ ຫຼື 2 ເດືອນ ພ້ອມກັນນັ້ນ ຍັງສາມາດຫຼຸດບັນຫາມັນຝຣັ່ງແຕກໜໍ່ ຫຼື ເກີດຮາກອີກດ້ວຍ.
6. ໝາກເລັ່ນ
ວິທີຮັກສາໝາກເລັ່ນແມ່ນໃຫ້ມ້ຽນໄວ້ນອກຕູ້ເຢັນ ເພາະໝາກເລັ່ນບໍ່ມັກອາກາດເຢັນ ແຕ່ກໍຕ້ອງເກັບໃຫ້ພົ້ນຈາກແສງແດດ ແລະ ຄວາມຮ້ອນ ເພາະອາດຈະເຮັດໃຫ້ເສຍລົດຊາດໄດ້, ໃຫ້ເກັບໄວ້ຊັ້ນວາງເຄື່ອງທໍາມະດາ ແລະ ຕ້ອງວາງໄວ້ໃນທ່າທີ່ຂວ້ມຫົວລົງ ເພາະເປັນສ່ວນທີ່ສຸກຊ້າທີ່ສຸດ ພ້ອມຍັງເກັບຮັກສາໄວ້ໄດ້ດົນນໍາອີກ.
7. ໝາກອະໂວຄາໂດ
ເມື່ອເຮົາສັງເກດດີໆແລ້ວ ຈະເຫັນໄດ້ວ່າໝາກອະໂວຄາໂດທີ່ຜ່າເຄິ່ງແລ້ວຈະເຮັດໃຫ້ປ່ຽນສີໄດ້ໄວຂຶ້ນ ເນື່ອງຈາກໝາກໄມ້ຊະນິດນີ້ມີສານທີ່ຜະລິດສີນໍ້າຕານເມື່ອພົບກັບອາກາດ ສະນັ້ນ, ຖ້າຫາກຢາກຍືດອາຍຸທີ່ສາມາດເກັບຮັກສາໄດ້ດົນໃຫ້ບີບໝາກນາວໃສ່ກ່ອນ ແລ້ວນໍາເອົາໄປແຊ່ໄວ້ໃນຕູ້ເຢັນ ເພື່ອຊ່ວຍໃຫ້ກຣົດຊີຕຣິກເຂົ້າໄປປ້ອງກັນບໍ່ໃຫ້ປ່ຽນສີ ເຮັດໃຫ້ເກັບຮັກສາໄວ້ກິນໄດ້ດົນຂຶ້ນ.
8. ໝາກກ້ຽງ
ປົກກະຕິແລ້ວ ໝາກໄມ້ປະເພດ ໝາກກ້ຽງ, ໝາກກ້ຽງໃຫຍ່, ໝາກນາວ ສາມາດເກັບຮັກສາໄວ້ໄດ້ດົນເປັນອາທິດຢູ່ແລ້ວ ພຽງແຕ່ເກັບໄວ້ໃນບ່ອນທີ່ເຢັນ ແລະ ຫ່າງຈາກແສງແດດ ແຕ່ຖ້າຫາກວ່າໃຜຕ້ອງການທີ່ຈະເກັບໄວ້ໃຫ້ໄດ້ດົນຕື່ມອີກ ແນະນໍາໃຫ້ເກັບຮັກສາໃສ່ໃນກ່ອງ ຫຼື ເອົາໃສ່ໃນຖົງຕາໜ່າງ ແລ້ວເອົາໄວ້ໃນຕູ້ເຢັນ ກໍເປັນການຍືດເວລາເກັບຮັກສາໄດ້ດົນອີກຕື່ມ.
9 ໝາກກ້ວຍ
ວິທີເກັບຮັກສາໝາກກ້ວຍໃຫ້ໄດ້ກິນດົນໆ ຂັ້ນຕອນທຳອິດແມ່ນເອົາກ້ວຍແຕ່ລະໜ່ວຍອອກຈາກຫວີ ຫຼັງຈາກນັ້ນ, ຫຸ້ມກ້ວຍດ້ວຍພາດສະຕິກແລບ ເທົ່ານີ້ກໍຈະຊ່ວຍຢຸດການແຜ່ກະຈາຍຂອງອາຍແກັສ ethylene ທີ່ເປັນຕົ້ນຕໍທີ່ເຮັດໃຫ້ໝາກກ້ວຍເນົ່າເປື່ອຍ ແຕ່ຖ້າເປັນກ້ວຍສຸກເກີນໄປ ແມ່ນໃຫ້ປອກເປືອກ ແລະ ເກັບຮັກສາໄວ້ໃນຕູ້ເຢັນຊ່ອງແຊ່ແຂງ ເພື່ອນໍາມາເຮັດເປັນນໍ້າປັ່ນແທນ ກໍແຊບອີກແບບໜຶ່ງ.
10. ແອັບເປິ້ນ
ໝາກແອັບເປິ້ນສາມາດເກັບຮັກສາໄວ້ນອກຕູ້ເຢັນໄດ້ເຖິງໜຶ່ງອາທິດ. ແຕ່ຖ້າເກັບໄວ້ໃນຕູ້ເຢັນ ກໍຈະຢູ່ໄດ້ຫຼາຍກວ່າໜຶ່ງອາທິດ. ສໍາລັບຫມາກແອັບເປິ້ນທີ່ປອກແລ້ວ ແຕ່ກິນບໍ່ໝົດ ໃຫ້ເອົາໄປແຊ່ໃນນ້ໍາເກືອເພື່ອຊ່ວຍປ້ອງກັນການເກີດປະຕິກິລິຍາອອກຊິເດຊັ່ນ. ໂດຍປະສົມນ້ຳເຢັນປະມານ 1 ລິດ ກັບເກືອ 1/2 ບ່ວງກາເຟ ແລ້ວປະໄວ້ 5 ນາທີ ແລ້ວນໍາມາທາໃຫ້ແຫ້ງ, ເອົາໃສ່ໃນຖົງຢາງສູນອາກາດ ແລະ ນໍາໄປແຊ່ໄວ້ໃນຕູ້ເຢັນ ກໍຈະຊ່ວຍໃຫ້ເກັບຮັກສາໄດ້ດົນຂຶ້ນ.
ຂໍ້ມູນ: Kapook