Homeຂ່າວພາຍ​ໃນສາເຫດທີ່ເຮັດໃຫ້ລາຄາຊີ້ນໝູໃນນະຄອນຫຼວງວຽງຈັນ ມີລາຄາສູງຂຶ້ນ

ສາເຫດທີ່ເຮັດໃຫ້ລາຄາຊີ້ນໝູໃນນະຄອນຫຼວງວຽງຈັນ ມີລາຄາສູງຂຶ້ນ

Published on

ວັນທີ 20 ມັງກອນ 2022 ເພຈ Lao National Radio ໄດ້ລາຍງານກ່ຽວກັບ ບັນຫາລາຄາຊີ້ນໝູຕາມທ້ອງຕະຫລາດພາຍໃນນະຄອນຫລວງວຽງຈັນ ມີການເໜັງຕີງເພີ່ມຂຶ້ນໃນປັດຈຸບັນນີ້ ເຮັດໃຫ້ສົ່ງຜົນກະທົບໂດຍກົງຕໍ່ຜູ້ບໍລິໂພກທົ່ວໄປໃນສັງຄົມ.

ທ່ານ ຫລ້າສາຍ ນວນທາສິງ, ຫົວໜ້າພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ໃຫ້ສໍາພາດວ່າ: ສາເຫດທີ່ເຮັດໃຫ້ລາຄາຊີ້ນໝູເໜັງຕີງເພີ່ມຂຶ້ນ ຍ້ອນຄວາມຕ້ອງການບໍລິໂພກຊີ້ນໝູຢູ່ປະເທດໃກ້ຄຽງຍັງບໍພຽງພໍກັບຄວາມຕ້ອງການ ເຮັດໃຫ້ມີການຂາຍໝູຊີ້ນໄປຕ່າງປະເທດ, ຕົ້ນທຶນໃນການຜະລິດຂອງຜູ້ຜະລິດເພີ່ມຂຶ້ນ ເຊັ່ນ: ອາຫານໝູ, ໝູນ້ອຍ, ຄ່າຂົນສົ່ງ, ບວກກັບອັດຕາເງິນເຟີ້, ສະພາບເສດຖະກິດມີການຟື້ນໂຕຫຼັງຈາກການຜ່ອນຜັນມາດຕະການປ້ອງກັນພະຍາດໂດວິດ-19, ມີການເປີດຮ້ານອາຫານ, ທ່ອງທ່ຽວ ແລະ ການຈັດງານຕ່າງໆ ກັບຄືນສູ່ປົກກະຕິ ແຕ່ສະ ພາບການປັບໂຕຂອງການຜະລິດບໍ່ທັນກັບຄວາມຕ້ອງການ. ນອກຈາກນີ້ ມີຫລາຍຟາມຢຸດເຊົາການລ້ຽງໝູ ເຮັດໃຫ້ກໍາລັງການຜະລິດບໍ່ເຕັມຄວາມສາມາດຜະລິດ, ມີບໍລິສັດຍ້າຍຖານການຜະລິດໄປຕ່າງແຂວງ ຍ້ອນຄວາມບໍ່ເອກະພາບໃນການຈັດຕັ້ງປະຕິ ບັດລະບຽບ ເຊັ່ນ: ການເກັບອາກອນ, ຄ່າບໍລິການວິຊາການ, ການຄວບຄຸມລາຄາຂາຍຫນ້າຟາມ-ຊີ້ນຢູ່ຕະຫຼາດ, ການຂະຫຍາຍຕົວເມືອງ-ທີ່ຢູ່ອາໃສທີ່ບັບເຂົ້າໃກ້ແຫຼ່ງການຜະລິດ.

ນອກຈາກນີ້ ຍ້ອນການລ້ຽງຫມູພໍ່-ແມ່ພັນ ຜະລິດລູກຫມູນ້ອຍ ສະຫນອງໃຫ້ຜູ້ລ້ຽງບໍ່ພຽງພໍກັບການລ້ຽງ ແລະ ການລ້ຽງຫມູຍັງບໍ່ທັນຈັກຕັ້ງເປັນກຸ່ມການຜະລິດຕັ້ງແຕ່ຂອດລ້ຽງຫາຂອດຈໍາຫນ່າຍ.


ທ່ານ ຫລ້າສາຍ ນວນທາສິງ ໃຫ້ຮູ້ຕື່ມວ່າ: ເພື່ອແກ້ໄຂບັນຫາຊີ້ນໝູທີ່ມີລາຄາແພງ, ພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ພວມສຸມໃສ່ຈັດຕັ້ງປະຕິບັດຫລາຍມາດຕະການ ເປັນຕົ້ນ: ສ້າງຕັ້ງກຸ່ມຜູ້ລ້ຽງ ແລະ ສະ ຫນອງຊີ້ນ ເພື່ອສະດວກໃນການຈັດການຈັດຮອບວຽນ, ແບ່ງສັດສ່ວນ ແລະ ເອກະພາບກັນໃນການຜະລິດ, ການສະຫນອງ ແລະ ລາຄາການຈໍາຫນ່າຍ; ເພີ່ມການລ້ຽງຫມູແມ່ພັນເພີ່ມຂຶ້ນ 3.000 ແມ່ ແລະ ຟື້ນຟູຟາມຫມູຊີ້ນທີ່ເຊົາລ້ຽງກັບມາລ້ຽງດິນ ໂດຍລັດຕ້ອງມີນະໂຍບາຍສະເພາະ, ລວມເຖີງ ຊຸກຍູ້ໂຮງງານຜະລິດອາຫານສັດໃຫ້ເພີ່ມກໍາລັງການຜະລິດເພີ່ມຂຶ້ນ ໂດຍຕິດພັນກັບການສົ່ງເສີມການຜະລິດວັດຖຸດິບອາຫານສັດ, ການແບ່ງພື້ນທີ່ການຕະຫຼາດໃຫ້ຄົນລາວ 2/3 ໃນນະຄອນຫຼວງວຽງຈັນ ແລະ ອື່ນໆ.


ຫົວໜ້າພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ໃຫ້ຮູ້ຕື່ມວ່າ: ປີ 2021 ຜ່ານມາ ຄວາມຕ້ອງການຊີ້ນຫມູຢູ່ນະຄອນຫລວງວຽງຈັນ ແມ່ນ 18.478 ໂຕນ ຫລື 284.276 ໂຕ, ສາມາດສະຫນອງໄດ້ 15.802 ໂຕນ ຫລື 243.107 ໂຕ. ສ່ວນປີ 2022 ຄາດວ່າຄວາມຕ້ອງການຊີ້ນຫມູ ປະມານ 19.088 ໂຕນ ຫລື 293.661 ໂຕ ແຕ່ຈະສາມາດສະຫນອງ ໄດ້ປະມານ 15.892 ໂຕນ ຫລື 244.492 ໂຕ.
ປັດຈຸບັນ ທົ່ວນະຄອນຫລວງວຽງຈັນ ມີຟາມລ້ຽງໝູ 188 ຟາມ ແຕ່ໄດ້ຢຸດເຊົາໄປ 33 ຟາມ ເຮັດໃຫ້ມີ 155 ຟາມທີ່ຍັງສືບຕໍ່ລ້ຽງ ມີໝູທັງໝົດ 126.084 ໂຕ.
Cr: ບຸນຕຽງ ຈັນທະວົງ

ບົດຄວາມຫຼ້າສຸດ

ຟ້າຜ່າ ເລື່ອງໃກ້ຕົວທີ່ຫຼາຍຄົນເບິ່ງຂ້າມ

ໃນໄລຍະຊ່ວງຍາມຝົນແບບນີ້ ຫຼີກລ່ຽງບໍ່ໄດ້ທີ່ເຮົາຈະພົບກັບສະພາບຝົນຕົກ ຟ້າເຫຼື້ອມ ຟ້າຜ່າ, ໂດຍສະເພາະ ຟ້າຜ່າ ເປັນໜຶ່ງໃນເຫດການທຳມະຊາດທີ່ສ້າງຄວາມສູນເສຍແກ່ຊີວິດ ແລະ ຊັບສິນ, ບາງຄົນກໍອາດຈະບໍ່ຮູ້ ຫຼື ບາງຄົນກໍຮູ້ແລ້ວ ແຕ່ກໍອາດຈະປະໝາດ ແລະ...

ຄວາມຍາວ 376 ກິໂລແມັດ ແຂວງຊຽງຂວາງ ຜ່ານແບບ ແລະ ຮັບຮອງເອົາ ແລວທາງທີ 3 ໃນການກໍ່ສ້າງເສັ້ນທາງດ່ວນ ນະຄອນຫຼວງ-ໄຊສົມບູນ-ຊຽງຂວາງ-ຫົວພັນ.

ກອງປະຊຸມຜ່ານແບບ, ຮັບຮອງແບບການກໍ່ສ້າງເສັ້ນທາງດ່ວນນະຄອນຫຼວງວຽງຈັນ-ໄຊສົມບູນ-ຊຽງຂວາງ-ຫົວພັນ ຈັດຂຶ້ນເມື່ອບໍ່ດົນມານີ້ ທີ່ຫ້ອງວ່າການແຂວງຊຽງຂວາງ ໂດຍການເປັນປະທານຂອງທ່ານ ບົວເງິນ ຫຸມໄຊຍະພົມ ປະທານຄະນະກຳມະການປົກຄອງແຂວງຊຽງຂວາງ ພ້ອມດ້ວຍການນຳ, ພາກສ່ວນທີ່ກ່ຽວຂອງຂອງແຂວງ, ເມືອງ ແລະ ຄະນະຂອງບໍລິສັດທີ່ອອກແບບກໍ່ສ້າງເສັ້ນທາງດ່ວນ ເຂົ້າຮ່ວມ. ທ່ານ...

ແຈ້ງມອດໄຟ 15-17 ພຶດສະພາ 2026 ໄຟຟ້າ ນວ ແຈ້ງເຖິງບັນດາຜູ້ຊົມໃຊ້ໄຟຟ້າ ພາຍໃນນະຄອນຫຼວງວຽຈັນ ເລື່ອງການຂໍມອດໄຟຟ້າ ໃນລະຫວ່າງ ວັນທີ 15-17/05/2026

ອີງຕາມແຈ້ງການຂອງ ລັດວິສາຫະກິດໄຟຟ້າລາວ ຝ່າຍຄຸ້ມຄອງລະບົບໄຟຟ້າພາກກາງ ສາຂານະຄອນຫຼວງວຽງຈັນ 1 ໄດ້ແຈ້ງເຖິງບັນດາຜູ້ຊົມໃຊ້ໄຟຟ້າພາຍໃນນະຄອນຫຼວງວຽຈັນ ເລື່ອງການຂໍມອດໄຟຟ້າ ໃນລະຫວ່າງ ວັນທີ 15-17/05/2026 ເຊິ່ງມີລາຍລະອຍດດັ່ງນີ້: